Хятадын нийслэл Бээжинд үргэлжлэн орсон аадар борооны улмаас 20 хүн амь үрэгджээ. CCTV сувгийн мэдээлснээр Доксури хар салхи Хятадын нутаг дэвсгэрээр дайран өнгөрснөөс хойш 27 хүн сураггүй алга болоод байгаа аж. Голуудын усны төвшин аюултай хэмжээнд хүрсэн учраас Бээжин хотын удирдлагууд тус хотод 25 жилийн өмнө баригдсан үерийн усыг нөөцлөх усан сангаа анх удаагаа ашигласан байна.
Түүнчлэн уулын 100 гаруй авто замыг хааж, 52 мянга гаруй хүнийг нүүлгэн шилжүүлсэн байна. Бээжин хотын удирдлагуудын мэдээлснээр өнгөрсөн хэдэн өдрүүдэд орсон хур тунадасны хэмжээ 2021 оны 7-р сард бүртгэгдсэн түүхэн рекордыг эвдсэн аж.
Доксури нь Хятадыг сүүлийн жилүүдэд дайран өнгөрсөн хамгийн хүчтэй хар салхи бөгөөд тус хар салхины хүч суларсан ч үер ус, хөрсний нуралтын аюул үүсэх эрсдэл байсаар байгааг Хятадын эрх баригчид анхааруулсаар байна.
Өнгөрсөн бямба гарагаас даваа гараг хүртэл Бээжинд дунджаар 260 мм хур тунадас орсон байна. 7-р сар нь Бээжин хотод хамгийн их хур тунадас ордог сар ба сарын турш дунджаар 150-180 мм хур тунадас ордог аж.
Бээжингээс өмнөд зүгт байрлах Хэбэй мужид бямба гарагаас даваа гараг хүртэл 3 өдрийн хугацаанд 1003 мм хур тунадас орж, рекорд тогтоожээ.
Нийслэл Бээжинд метро болон галт тэрэгний хэд хэдэн шугамын ажиллагааг зогсоосон байна. Мягмар гарагийн өглөөнөөс эхлэн зэвсэгт хүчний 26 цэрэг, 4 нисдэг тэрэгнээс бүрдэх баг Мэньтоугоу дүүрэгт гацсан иргэдэд хоол хүнс, дулаан нөмрөг тарааж эхэлжээ.
Эх сурвалж: The Guardian
Содноицэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
