Зарим нэр төрлийн Хятад мотоциклийг хилээр оруулахгүй

Twitter Print
2014 оны 06-р сар 18-нд 09:36 цагт
Мэдээний зураг,

Сүүлийн үед манай малчдын гол хэрэглээ болсон Хятад мотоциклоос үүдэстэй осол хэргийн талаар бид өмнө мэдээлж байсан. Энэ асуудалтай холбогдуулан

Мэргэжлийн хяналтын ерөнхий газраас мэдээлэл хийсэн.

МХЕГ-ын дарга импортоор орж ирж байгаа мотоциклийн техник болон ашиглалтын аюулгүй байдалд тандалт судалгаа мотоцикльтой холбоотой ослыг бууруулахын тулд Зам тээврийн яам мөн аймгуудын Засаг дарга нартай хамтарч ажиллах албан тоот хүргүүлэх гэж байгаа тухайгаа дурдлаа.

Манай улсад өнгөрөгч онд 18 оронд үйлдвэрлэсэн мотоцикль БНХАУ-аас импортоор орж ирснийг ГЕГ-ын судалгаанаас тайлбарлалаа. Энэ нь нийт импортоор орж ирж буй мотоциклын 97.1 хувийг эзэлж байгаа аж.

Мөн онд мотоциклийн 330 осол гарсан нь бүгд хятад мотоцикль ашигласантай холбоотой аж. Манайхан мотоциклийг зориулалтын бус зам буюу хад асга, бартаа ихтэй газар унах, хурд, хүчийг тааруулж ашиглаагүйгээс осол, аваар гардаг. Тиймээс Хятад улсаас орж ирж буй мотоциклийн техник хийцийг нь шалгаж, манай улсын байгаль орчин цаг уурын нөхцөлд зохицох үгүйг нь тогтоолгох шаардлагатай гэлээ. Мөн зарим нэр, төрлийг нь импортлохыг хориглох шийдвэр гаргуулах саналыг Зам тээврийн яаманд хүргүүлж байгааг онцолсон.

Мөн мотоциклийг хилээр нэвтрүүлэхэд шалгалт хийх зөвлөмж боловсруулах, мотоциклиор нийтийн тээврийн үйлчилгээ эрхэлж байгааг таслан зогсоож бүртгэлийг сайжруулах зэргийг санал болгожээ. Харин аймгуудын Засаг дарга нарт иргэдийнхээ мотоциклийг бүртгэлд хамруулж, улсын дугаартай болгох, мотоциклиос үүдэлтэй ослыг бууруулахын тулд цагдаагийн байгууллагатай уялдаатай ажиллах үүрэг чиглэлийг өгч байна.

Замын хөдөлгөөний аюулгүй байдлын төвөөс хийсэн судалгаагаар өнгөрсөн онд улсын хэмжээнд мотоциклийн 330 осол гарч 112 хүн амиа алдаж, 191 хүн гэмтэж бэртэн, эд хөрөнгөөрөө хохирсон байна. Шалтгаан нь дээр хэлсэнчлэн уул хад, бартаатай замд тохирохгүй, ослоос хамгаалах хувцас хэрэглэл өмсөөгүй, согтуугаар жолоо барьснаас болсон гэнэ. Мөн мотоциклиор нийтийн зорчигч тээврийн үйлчилгээ эрхлэгчдийн буруутай үйлдлээс болж 10 хүний амь нас эрсдсэн тухай мэдээлэл байна. 

Дорнод, Баян-Өлгий, Архангай, Говь-Алтай, Өвөрхангай гэх таван аймагт мотоциклиор нийтийн тээврийн үйлчилгээ буюу иргэдэд таксины үйлчилгээ үзүүлдэг аж. Эдгээр аймагт үйлчилгээ үзүүлдэг нийт 258 хятад мотоциклийн үйлчилгээг зогсоохоор болсон. Тэд ашиглалтын байдал хангалтгүй, бүрэн бус тээврийн хэрэгсэлтэйгээр иргэдэд үйлчилж байсан гэдгийг тогтоосон байна.

Энэ шаардлагын дагуу Өвөрхангай, Дорнод аймгийн ЗДТГ-аас мотоциклиор нийтийн тээврийн үйлчилгээ үзүүлэхийг зогсоосон ч зарим иргэдийн хэнэггүй зангаас болж одоо хүртэл нийтийн тээврийн үйлчилгээнд мотоцикл явсаар байгаа юм. Ийнхүү ЗДТГ-аас гаргасан шийдвэр захирамж хэрэгждэггүй гол шалтгаан нь манай улсын Автотээврийн тухай хуулинд мотоциклиор нийтийн тээврийн үйлчилгээ эрхлэх талаар ямар ч заалт, зохицуулалт байдаггүйтай холбоотой.

 

Х.Эрдэнэсолонго

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.