ОХУ-ын Гадаад харилцааны сайд Сергей Лавров Францын TF1 сувагт өгсөн ярилцлагадаа, "ОХУ-аас тусгаар тогтносон улс хэмээн хүлээн зөвшөөрөгдсөн Донецк болон Луганск мужийг чөлөөлөх нь ОХУ-ын нэн тэргүүний зорилт." хэмээн онцолжээ.
Түүнчлэн тэрээр ОХУ-ын зэвсэгт хүчний хяналтанд орсон Украины бусад бүс нутгуудад иргэд нь ирээдүйгээ өөрсдөө шийдэх ёстой гэжээ.
ОХУ-ын зэвсэгт хүчнийхний хувьд сүүлийн хэдэн долоо хоног Донецк болон Луганск мужуудын байрлах Донбассын бүс нутагт төвлөрч, тус бүс нутгийн гол хотуудыг хяналтандаа авах зорилт тавин довтолгоогоо үргэлжлүүлсээр байгаа билээ.
Сергей Лавровын хэлснээр Украины Ерөнхийлөгч Владимир Зеленскийн бий болгосон орчинд "Оросын боловсрол, хэвлэл мэдээллийн хэрэгслүүд, соёл, мөн орос хэлээр ярих явдлыг хориглодог" бол ОХУ-ын хяналтанд байгаа бүс нутгуудад иргэдэд "үр хүүхдүүдээ В. Зеленский болон түүний багийнхны хүслээр бус өөрсдийн хүслээр өсгөх боломжтой" орчин бүрдэх аж.
Түүнчлэн ОХУ-ын Украин дахь" цэргийн тусгай ажиллагаа" сунжирч байгаа нь ОХУ-ын зэвсэгт хүчнийхэнд энгийн иргэд байрлаж буй дэд бүтцүүдэд цохилт үзүүлэхгүй байхыг хатуу үүрэг болгосонтой холбоотой хэмээн тайлбарлажээ.
ОХУ Украин руу цэргээ оруулснаас хойш 3 сар өнгөрч байгаа энэ хугацаанд Украинд хэдэн мянган хүн амиа алдаж, 6.7 сая гаруй хүн орон байраа орхин өөр улс орнууд руу дүрвэсэн байна.
Украины Ерөнхий Прокурорын албанд ОХУ-ын Украинд үйлдсэн байж болзошгүй дайны 14 388 гэмт хэрэг шалгагдаж байгаа ба энгийн иргэд руу гал нээж, амь насыг нь хороосон хэрэгт Оросын хэд хэдэн цэргийн албан хаагч буруутай нь тогтоогдоод байна.
Эх сурвалж: The Reuters
Содномцэрэнгийн Энхзаяа
Mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
