Жо Байден, В.Путин нар Швейцарьт уулзах өндөр магадлалтай байна

Twitter Print
2021 оны 05-р сар 18-нд 11:50 цагт
Мэдээний зураг,

Оросын Коммерсантъ сонинд бичсэнээр АНУ-ын Ерөнхийлөгч Жо Байден болон ОХУ-ын Ерөнхийлөгч Владимир Путин нарын ирэх 6-р сард болох уулзалт Швейцарь улсад болох магадлал өндөртэй байгааг Оросын засгийн газрын эх сурвалж мэдээлжээ.

Өнгөрсөн 3-р сард Америкийн телевизийн сувагт өгсөн ярилцлагадаа АНУ-ын Төрийн тэргүүн Ж.Байден ОХУ-ын Ерөнхийлөгч В.Путинг "алуурчин" хэмээн нэрлэж, ОХУ-ыг Вашингтонд суугаа элчин сайдаа Москва руу дуудахад хүргэсэн билээ. Гэсэн хэдий ч Ж.Байден ирэх сард Европт хийх айлчлалынхаа үеэр Ерөнхийлөгч Владимир Путинтэй уулзаж ярилцах хүсэлтэй гэдгээ илэрхийлсээр байгаа юм.

Цагаан ордон тухайн уулзалтын өмнө Вашингтон болон Москва хоёрын дунд үүссэн үл ойлголцлыг шийдэх ёстой хэмээн үзэж байгаа бол Кремлийн зүгээс Ерөнхийлөгч В. Путин Ж. Байдентай уулзах боломжтой эсэхийг судалж байгаа гэжээ.

Энэ долоо хоногийн сүүлээр Оросын Гадаад хэргийн сайд Сергей Лавров АНУ-ын Төрийн нарийн бичгийн дарга Энтони Блинкентэй Исландад уулзах юм. Энэ нь Жо Байден АНУ-ын Төрийн тэргүүнээр сонгогдсоноос хойшхи хоёр улсын хооронд зохион байгуулагдаж байгаа анхны төрийн дээд уулзалт юм.

С.Лавров, Э.Блинкен нар хоёр улсын төрийн тэргүүнүүдийн уулзалтын бэлтгэл ажлын талаар ярилцах аж. Коммерсантъ сонинд бичсэнээр Ерөнхийлөгч Жо Байден Владимир Путинтэй ирэх сарын 15-наас 16-ны хооронд Европын аль нэг улсад уулзах хүсэлтэйгээ илэрхийлсэн аж.

Эх сурвалж: https://www.reuters.com/world/switzerland

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.