Махыг хөлдөөж хадгалах тухай: Хөлдөөсөн махыг гэсгээгээд дахин хөлдөөж болохгүй

Twitter Print
2022 оны 09-р сар 27-нд 12:15 цагт
Мэдээний зураг,

МАХЫГ ХӨЛДӨӨЖ ХАДГАЛАХ ТУХАЙ

Ер нь бол мах гэлтгүй хүнсийг хэрэглэхээс илүүтэй хадгалах бол хамгийн чухал. Зөвхөн өнөөдөр байгаа нөөцөө хэрэглээд дуусах биш, дараа хэрэглэхээр хадгалах шаардлага тулгардаг, угаасаа өнөөдөр идье гээд ч барахгүй.

Манайд гэхэд л дөрвөн улирал ээлжилдэг, өвөл тариа ногоо ургахгүй, мал нь намар хээлтэж, хавар төллөдөг болохоор сүү, махны нөөцийг хадгалах хэрэгцээ зайлшгүй тулгардаг.

Органик, шинэхэн, хадгалсан гэх мэт ойлголтуудыг хооронд нь холиод байгаа нь их ажиглагддаг. Хүн болгон шинэ бүтээгдэхүүн хэрэглэхийг эрмэлздэг, хадгалахыг хүсдэггүй мөртлөө өлсөхийг бас хүсдэггүй.

Нэгэнтээ бичиж байсан. Хүнсийг маргааш буюу дараа идэх боломжийг Хүнсний технологи олгодог оо гээд.

Ерөнхийдөө мэргэжлийнхээр ярьвал махын физикийн, химийн, биологийн аргаар хадгалдаг. Зөвхөн эдгээрийн аль нэгээр нь хадгалахаас гадна, эдгээрийг хослуулан хадгалсан ч болно.

Физикийн гэх аргад хатаах, хөлдөөх, дулааны боловсруулалт хийж лаазлах гэх мэт аргууд орох бөгөөд химийн аргад ямар нэгэн давсаар давслаж хадгалах аргыг оруулж болно. Биологийн арга гэдэгт махыг бичил биетний нөлөөгөөр хадгалах аргыг хэлэх ба үүнийг бид сайн мэдэхгүй мөртлөө хэрэглэсээр байдаг.

Хөргөж хадгалах

Махыг 4 хэм хүртэл хөргөж хадгалдаг бөгөөд энэ хадгалалт бол бидний хүсдэг “шинэ” байдлаар нь хэрэглэх боломжийг олгодог сайн арга. Гол нь найдвартай хөргөдөг систем хэрэгтэй, горимыг хянах маш найдвартай хяналт хэрэгтэй. Дэнжийн мянгынхан шиг "хөргүүрэн" лангуу бол тэгээд худлаа болно.

Харьцангуй богино хугацаанд хадгалалт даах тул хөргөсөн байдлаар нээх экспортлоод байдаггүй, харин хөргүүртэй онгоцоор хурдан хугацаанд ингэж экспортловол мах маш үнэд хүрдэг.

Өөрсдөө хэрэглэхээ бичихгүй, экспортлохыг яагаад байн байн яриад байна аа гэж бодож магадгүй, бид махаа идээд барахгүй тул бичихээс өөр аргагүй.

Хөлдөөж, гүн хөлдөөж хадгалах

Хөлдөөгчийн тусламжтай махны гүний хэмийг -8 хэм хүргэж хадгалахыг хөлдөөж хадгалах гэнэ. Гүний хэмийг ийм хэмжээнд хүргэхийн тулд хөлдөөгчийн хэмийг -18 хэм дээр тохируулах шаардлагатай.

Гүн хөлдөөсөн махны гүний хэм -18 хэм байх ёстой бөгөөд мөн л гүн хөлдөөгчийн хэмийг -32 хэм дээр тохируулах шаардлагатай. Хөлдөөх аргыг бид өдөр тутамдаа хэрэглэдэг харин удаан хугацаанд хадгалах, нөөцлөх шаардлагатай махыг гүн хөлдөөж хадгалах шаардлагатай.

Шаазан аяганд ус хийгээд хөлдөөхөөр ус нь тэлж хөлдөн, аягаа хагалаад хөлдчихдөг. Мах хөлдөөж хадгалахын нэг сул тал нь энэ. Махны эс дотор байгаа сийвэн хөлдөхдөө махны эсийн ханын бүрэн бүтэн байдлыг гэмтээгээд хөлдчихдөг. Түүнээс бус агуулагдах уураг, тосны бүрдэл, эрдэс, аминдэмийн агууламжид ямар ч өөрчлөлт гарахгүйгээс гадна микробийн өсөлт ч зогсчихдог. Устахгүй, зүгээр зогсонги байдалд орчихдог.

Тиймээс махыг хөлдөөсөн бол зөв гэсгээх хэрэгтэй. Буруу гэсгээвэл махны шим шүүс нь ялгараад, урсаад махны амтанд нөлөөлөх бөгөөд нэг хөлдөөсөн махыг гэсгээгээд дахин хөлдөөж огт болохгүй. Аль ч байдлаар хөлдөөсөн эргээд хөргөж хадгалах хэм буюу 4 хэмд гэсгээх нь хамгийн зөв. Тэгэхээр махаа хөлдөөгчнөөсөө гаргаад хөргөгчиндөө гэсгээх нь хамгийн тохиромжтой.

Яахав жаахан цаг орно л доо, гэхдээ өглөө ажилдаа явахдаа махаа хөргүүр хэсэгтээ хийчихвэл орой ирэхэд чинь яг сайхан гэсчихсэн байдаг. Хурдан гэсгээхийн тулд хүйтэн усанд хийгээд байдаг нь иймэрхүү байдлаар гэсгээхийг л оролдоод буй хэрэг.

Хэдийгээр ингэж эсийн бүтцэд гэмтэл учруулдаг, нэг хөлдөөсөн махыг гэсгээгээд дахин хөлдөөхөд махны шим бодисын алдагдал маш их байдаг сул талтай ч гэлээ хөлдөөж хадгалах бол урт удаан хугацаанд шинэлэг байдлаар нь хэрэглэх боломжийг олгодог одоогийн байдлаар бидний олсон хамгийн төгс арга.

Махаа хэрэглэх хэмжээгээр нь урьдчилан хувааж хөлдөөвөл нэг л удаа гэсгээж хэрэглэхэд тохиромжтойгоос гадна бүүр урьдчилан хэрчээд хөлдөөчихвөл бүүр амар байдаг. Мах ангилах үйлдвэрүүд иймэрхүү бэлтгэсэн мах их гаргадаг болсон байна лээ, хүмүүсийн хэрэглээ ч нэмэгдэж байна, хүмүүс их завгүй, түгжрэл ихтэй, катеринг, хоолны газруудын үйлчилгээ нэмэгдэж байгаа тул мах ангилах үйлдвэрийн хэрэгцээ улам л нэмэгдэнэ.

Эх сурвалж: Хүнсний инженер О.Гал-Очир

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.