Гиннесийн номд бичигдсэн дэлхийн хамгийн хөгшин нохой Боби 30 нас хүрлээ

Португалийн төвд байрлах жижиг тосгонд 30 жилийн өмнө Боби анх мэндлэхэд түүний эзэн Леонель Коста дөнгөж 8 настай байв. Хайртай нохой нь нэг л өдөр рекорд тогтоож, Гиннесийн номонд дэлхийн хамгийн хөгшин нохой гэж бичигдэнэ гэж Л. Коста төсөөлөөгүй биз.

Боби Рафейру ду Алентежу цэвэр үүлдрийн нохой бөгөөд өнгөрсөн жил түүний 30 насны өдөр болох үед Л. Коста Боби Гиннессийн рекордыг эвдсэн болохыг мэджээ.

1939 онд Австралийн хоньч нохой Блюи 29 нас 5 сартайдаа дэлхийн хамгийн өндөр насалсан нохойгоор нэрлэгдэж, Гиннесийн рекорд тогтоож байжээ.

Л. Коста шаардлагатай бүх бичиг баримтаа Гиннессийн Дэлхийн Рекордод илгээжээ. Ингээд жилийн дараа Боби албан ёсоор дэлхийн хамгийн өндөр насалсан нохойгоор нэрлэгдсэн байна.

2-р сарын 4-ны өдрийн байдлаар Боби 30 нас 269 өдрийн настайд тооцогдож байгаа аж. Бобигийн эзэн 38 настай Л. Коста Ройтерст өгсөн ярилцлагадаа, "Үгээр хэлэхийн аргагүй бахархал төрж байна. Зарим хүмүүс бид нарыг Гиннест бүртгүүлж чадахгүй гэж байсан. Гэхдээ бид нар Бобигийнхоо насыг сайн мэднэ, шалгалтаар ч тэр нь батлагдсан." хэмээн ярьжээ.

Гиннессийн Дэлхийн Рекорд өнгөрсөн пүрэв гарагт Бобийг албан ёсоор хамгийн хөгшин нохойгоор нэрлэж, түүний түүхийг "гайхамшиг" хэмээн дүрсэлжээ.

Бобийг төрөх үед Л. Костагийн гэр бүл олон амьтан тэжээдэг, мөнгө багатай айл байв. Тухайн үед Л. Костагийн аав шинээр төрсөн гөлөгнүүдийг тэжээхийн оронд нүдээ нээхээс нь өмнө газарт булсан аж. Гэтэл Боби түлээнүүдийн ард нуугдан амьд гарсан байсныг нь Л. Коста ах дүү нарынхаа хамт олжээ.

Тэд Бобийг нүдээ нээтэл нь ээж ааваасаа нууцаар тэжээжээ. Рафейру ду Алентежу үүлдрийн нохойнууд дунджаар 12-14 насалдаг ба Боби өндөр насалсан нь хөдөө тайван орчинд, уяулж, гинжлүүлэлгүйгээр амьдарсан, мөн эздийнхээ хийсэн хоолноос иддэгтэй холбоотой хэмээн Л. Коста үзэж байгаа аж. "Мэдээж хайр халамжаар дутаагаагүй нь ч бас үүнд нөлөөлсөн байх" хэмээн Л. Коста инээмсэглэн дурджээ.

Боби зугаалах дуртай хэвээр байгаа ч өндөр наснаасаа болж удаан болж, үс нь шингэрч, хараа нь мууджээ.

Л. Коста Боби дахин олон жил наслаасай гэж хүсэж байгаа ба нохой нь Португалийн төвд орших жижиг тосгоных нь нэрийг Гиннессийн Рекордын номонд оруулсанд талархаж байгаа гэжээ.

Эх сурвалж: google.com

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.