Эрүүл байвал улсын наадам үзэхдээ л нэг үзнэ...

Twitter Print
2021 оны 07-р сар 02-нд 13:16 цагт
Мэдээний зураг,

Хүмүүсийн цугларалтаар COVID-19-ийн халдвар нэмэгдэж байгаа талаар хамгийн танил жишээ болгон АНУ-аас төрсөн өдөр (төрсөн өдрийн үдэшлэг)-ийн талаарх судалгааны мэдээлэл нийтлэгдэж.

Мөн хүмүүсийн цугларалтаар халдварын тархалт ихэсдэг болохын бас нэг жишээ бол өнгөрсөн 6-р сарын 11-13-ний өдрүүдэд Английн Корнуоллд (Cornwall) зохион байгуулагдсан Их Долоогийн уулзалтаас хойш тус бүс нутагт Дельта омгийн шинэ халдварын тархалт нэмэгдсэн тухай мэдээ.

Эх сурвалж: https://bit.ly/3x04Gdo

Их Британи даяар Дельта омгийн вирусийн илрэх давтамж 90% болж, бараг л Альфа омогтой байраа бүрэн солих хэмжээнд хүрсэн байгаа боловч вакцинжуулалтын түвшин 80%-иас дээш гэсэн өндөр хувьтай байгаатай холбоотойгоор халдвар авсан хүмүүсийн тоо нэмэгдсэн ч нас баралтын тоо өсөөгүй байгаа байдал харагдаж байгаа.

ХҮМҮҮС ЦУГЛАРАХ ЯМАР Ч АРГА ХЭМЖЭЭ БАЙСАН (ЖИШЭЭ НЬ ТӨРСӨН ӨДӨР БАЙСАН Ч ГЭСЭН) ХАЛДВАР АВАХ ХҮМҮҮСИЙН ТОО НЭМЭГДЭНЭ /АНУ

Хүмүүс цуглардаг аливаа нэг арга хэмжээ нь COVID-19-ийн халдвар авсан хүмүүсийн тоог нэмэгдүүлж байгаа эсэхийг маш ойлгомжтой байдлаар төрсөн өдрийг жишээ болгон судлаж үзсэн судалгааны үр дүн нийтлэгдэж.

Эх сурвалж: JAMA Intern Med. 2021 Jun 21. doi.org/10.1001/jamainternmed.2021.2915

Судалгаанд хамрагдсан өрхийн тоо 2.9 сая. Тухайн бүс нутгуудын халдварын нөхцөл байдлыг ялгаатай гэж тооцон халдварын нөхцөл байдлыг 10 шатлалд ангилж анализ хийж үзсэн байна.

Халдварын нөхцөл хамгийн муу байгаа бүс нутгуудад 2 долоо хоногийн өмнө төрсөн өдрөө тэмдэглэсэн айл өрхүүдийг төрсөн өдрөө тэмдэглээгүй айл өрхүүдтэй харьцуулж үзэхэд халдвар авсан хүмүүсийн хүмүүс 31%-иар өссөн байж.

Мөн хүүхдийн төрсөн өдөр тэмдэглэсний дараа халдвар авсан хүмүүсийн тоо 10,000 хүн тутамд 15,8 тохиолдлоор нэмэгдсэн байсан бол насанд хүрсэн хүний төрсөн өдрөө тэмдэглэсний дараах халдвар авсан тохиолдлын тоо 5,8-аар нэмэгдсэн байна гэнэ.

Миний бодол:

Энэ судалгаагаар төрсөн өдрүүд, ялангуяа хүүхдүүдийн төрсөн өдөр гэх мэт том жижиг гэлтгүй албан бус нийгмийн уулзалт, үйл явдлууд нь SARS-CoV-2 вирусийн халдвар дамжих чухал эх үүсвэр болохыг харуулж байна.

Бидэнд энэ жил наадам тэмдэглээд хэрэггүй ээ гэсэн бэлээхэн жишээг олон улсын хэмжээнд бидний амьдралын хамгийн ойрхон жишээгээр судлаад гаргаад иржээ.

Бүр улс төрчдөд ойрхон жишээ гэж хэлбэл дээр дурдсан Английн Корнуоллд халдвар хамгааллын маш өндөр дэглэм дор зохион байгуулагдсан гэж үзэгдэж буй Их Долоогийн уулзалт.

Оршин суугч иргэд нь вакцинжуулалтын хамгийн өндөр хувьтай байсан ч энэ уулзалтаас хойш тухайн бүс нутагт Дельта омгийн шинэ халдвар огцом өссөн тухай Олон улсын мэдээллийн эх сурвалжууд шуугиж байна.

Яагаад ийм болов?

Тэнд том гүрнүүдийн удирдагчдын уулзалтыг сурвалжлахаар сонирхохоор дэлхийн өнцаг булан бүрээс хүмүүс олноор цугларсан. Хүмүүсийн хөдөлгөөн нэмэгдсэн.

Угаасаа энэ өвчин өөрөө хүмүүсийн хөдөлгөөнийг дагаж шилжиж явдаг халдварт өвчин.

Дотоодод халдварын тархалтгүй байсан бол бас яая гэхэв. Гэтэл өнөөдөр халдварын тохиолдол тасралтгүй 2000 тохиолдлоос огт буурахгүй, өдөр бүр 10 гаруй монгол хүний амь нас цаг бусаар эрсдэж байгаа нөхцөл байдалтай байна.

Их долоогийн уулзалт, Наадам хоёрт, бүр ойлгомжтойгоор хэлэх юм бол наадам төрсөн өдрийн баяр хоёрт ялгарах юм ерөөсөө байхгүй. Олон хүн цугларна, тэр тусмаа байнга уулздаггүй хүмүүс нэг дор цугларна. Тэд хоорондоо ойрхоноос ярилцана. Инээж наргина. Идэж ууна.

Хүүхдийн төрсөн өдрийн жишээг харахад цар тахал дэгдсэн байсан ч хүүхэд л бол хүүхэд. Тэдний зан үйл өөрчлөгддөггүй гэдгийг илэрхийлээд байна. Тоглоно инээнэ наадна баярлана. Тэд халдварын аюулыг мэдэхгүй.

Хүүхдүүдийг халдвараас хэн хамгаалах уу. Томчууд бид. Бид хариуцлагатай байх ёстой.

Наадам тэмдэглэх гээд байгаа дарга нар маань үүнийг яагаад ойлгохгүй байна вэ. Хэний, юуны эрх ашгийн төлөөх наадам вэ гэдгийг эргэж нэг бодоосой.

Эсэн мэнд байвал ирэх жилийн наадам үзэхдээ л нэг үзнэ, тийм үү?!

Ойдовын Батгэрэл Ph.D

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.