Эх орноосоо урвагч гэж цоллох ийм амархан байсан юм уу?
Сэтгүүлч Ч.Мөнхбаярын хийж байгаа акцуудын заримтай нь би санал нийлдэг, заримтай нь зөрчилддөг. Монгол бичгийн асуудлыг гаргаж тавихад нь дэмжээд харж л суулаа, өөрийнхөө үзэл бодлыг бичиж л байлаа. Хазарачуудыг Монголд авчрах талаар дуугарахад нь харин буруутгаад пост бичсэн, "Монгол туургатнуудаа би мэдье" гэсэн утгатай, бардам ч гэмээр коммент үлдээсэн байсан.
Усан цахилгаан станцуудыг эсэргүүцдэг нь таалагддаггүй, гэхдээ шинэ бүхэнд сөрж ханддаг иймэрхүү хандлага хаа сайгүй л байдаг. Дэлхийгээр нэг тарсан монгол цус, яс нэгтнүүдийнхээ төлөө үгээ хэлдэг, үйлдлээ зориулдаг, хэт үндсэрхэг гэмээр, хэзээ ч юм монгол туургатан бүхэн Монгол эх орондоо нэгдэх ёстой гэж үздэг, үзэл бодлоо хүчтэй илэрхийлдэг залуу.
Түүний энэ үзэл бодол хэзээ ч биелэхгүй байсан ч тэр тэгж мөрөөддөг. Аль ч улсад Ч.Мөнхбаяртай адил хэт үндсэрхэг үзэлтнүүд байдаг, тэр болгон урвагч гээд цоллоод байдаггүй. Хятадаас дайжсан, нутаг сэлгэж яваа өвөрмонголчуудад тусалдаг гэж саяхан нэг найз нь бичсэн байсан.
Эцэст нь түүнийг "Эх орноосоо урвагч" гэж орон даяар хайр найргүй зарлалаа. Энэ цолыг хэн нэгэндээ зүүн жигшүүлэх ийм амархан байсан юм уу? Энэ залуугийн үр хүүхэд урвагчийн үр сад болох уу? Гэрээс нь гарсан хэдхэн доллар, рублийг гадаадын валют илэрсэн гэж мэдэгдлээ. Энэ хаанаас гаралтай, ямар зориулалттай, хэний мөнгө болохыг хэлээд өгч болох уу? Урд хөршөөс амь зулбан яваа хэн нэгэнд туслах зорилготой хуримтлал байсан уу, хэрэв тийм бол энэ хүн Монголоос биш, Хятадаас урвасан болж таарах биш үү? Гадаадын тагнуул гуайд галзуу их мөнгө баймаар юм аа, ядарсан ийм тагнуул гэж юу байхав.
Тэгээд ч Монголын яамных нь бодлогын хуралд Хятадын төрийн компанийн төлөөлөл гурав дөрвөөрөө хөшилдөж байхад тагнах тагнуулдах юм цаана нь үлдэх үү? За уучлаарай, унтсан хэвтсэн, уусан идсэн бичлэг, авсан авлига, андалсан нөхөд, өгсөн лиценз, өнхрүүлсэн тамгаараа барьцаалагдсан улс төр, хүчний байгууллагын албан тушаалтнуудыг чинь тэгвэл урвагч гэх юм уу, ул долоогч гэх үү?
Өнөөдөр Ч.Мөнхбаяр урвагч болж байна, маргааш "Монголын радио хятадаар мэндлэхэд би үхнэ" гэж шүлэглэсэн Галсансүх урвагч болох уу, бас ачаад явах уу? Эл сэдвийг хөндөж байгаа би бас урвагч уу? Энэ мэтийн нэр хочийг хуулийн ямар зүйл заалтаар хүнд шууд ингэж нааж болдог вэ? Эл үйлдэлд холбоотой хуулиуддаа хэдэн онд, хэний түлхээс лообийгоор ямар өөрчлөлтүүд хийсэн бэ?
Манай жагсаал цуглаан хийх, үгээ хэлэх, үзэл бодлоо илэрхийлэх, олноороо цуглах, төрөөс явуулж байгаа аливаа арга хэмжээг өөрийнхөө хэмжээнд эсэргүүцэх зэрэг монгол иргэдийнхээ наад захын эрх, үүргийг хангасан хууль тогтоомжуудад сүүлийн үед яагаад сэм сэм өөрчлөлт ороод байна? Үүнийг мэргэжлийн хуульчид судалж, он дарааллаар нь гаргаж тавимаар байна.
Хятадын коммунист нам төвдүүдийн үндэсний уламжлал болох бүсэндээ хутга хавчуулж явдаг ёсыг хуулиар хорьж, олон жил энэ шалтгаанаар олон олон залуусыг нь шоронгийн хоригдол болгосон түүхтэй. Манжууд монголчуудын төмөр эдлэл хэрэглэхийг хорьж байж атгандаа албадан барьсан үе бас бий. Манай залуус л гэхэд ангийн буу ч агуулж болохгүй, энэ талын эрхээ эвхэртэл хаалгаад хэдэн жил болж байгаа.
Талбай дээрээ цугладаг, жагсдаг байсан, нэг л мэдэхэд үгээ хэлэхийн төлөө үзэг барьсан албан тушаалтнаас зөвшөөрөл авдаг болж хуулиа өөрчилсөн. Нэг л өглөө ташууртай давхиж явдаг эрхийг маань хуулиар хорьчихвол ташраараа ойчих уу, ойлгох уу?
Буу тулгаад ороод ирэхгүй ч буулгаж авах нүхээ төрийн хуулиар нь дамжуулаад түрүүлээд хийчихсэн байдаг энэ мэтийн туршлага бас байна. Монголчууд бид тойроогүй, дайрсан.
Өчигдөр урд хөрштэй харилцаж буй Монголын Засгийн газрын харилцааг шүүмжилсэн Ч.Мөнхбаяр өнөөдөр урвагч болчихлоо. Маргааш хэний ээлж вэ? Үнэхээр жинхэнэ урвагч нь хэн бэ, үүнээс цааш мэдэх эрх бидэнд үлдсэн үү? Энэ мэтээр олон олон асуулт ар араасаа гарч байна даа. Тэмцэгч байх, урвагч болох хоёрын дунд ганцхан алхам үлдтэл шахаж дарамталдаг цаг үе үүгээр эхэлж байгаа бол Монгол Улс хэмээх нэрийн дор ямар улсын төр оршин буйг хэлж өгнө үү?
Р.Эмүжин
Энэ мэдээ танд таалагдаж байвал LIKE хийгээрэй. Танд баярлалаа.
