АстраЗенека компанийн вакциныг үргэлжлүүлэн хийхийг ДЭМБ-аас зөвлөжээ

Twitter Print
2021 оны 03-р сар 16-нд 11:51 цагт
Мэдээний зураг,

ДЭМБ улс орнуудыг иргэдийг коронавирусын эсрэг вакцинд хамруулах ажлаа зогсоохгүй байхыг уриалжээ. Энэ нь Европын хэд хэдэн улс орнууд Оксфордын их сургуулийн AstraZeneca компанитай хамтран бүтээсэн вакциныг тарихаа зогсоосонтой холбоотой аж.

ДЭМБ-аас АстраЗенека компанийн вакцин нь венийн судасны бөглөрөл эмгэгийг үүсгэдэг гэсэн баримт нотолгоо байхгүй гэдгийг онцолжээ. ДЭМБ-ын вакцины аюулгүй байдлыг хариуцсан мэргэжилтнүүд энэ мягмар гарагт уулзаж, АстраЗенека компанийн вакцины талаар хэлэлцэхээр болсон байна. Европын зарим улс оронд АстраЗенека компанийн коронавирусын эсрэг вакциныг хийлгэсний дараа венийн судаснй бүлэн буюу бөглөрөл эмгэгтэй болсон хэд хэдэн тохиолдол бүртгэгдсэн ч мэргэжилтнүүд энэ нь цар тахлаас өмнөх үеийн хүн амын дундаж үзүүлэлтээс даваагүй гэдгийг онцолж байна.

Европын холбоо болон Их Британид AstraZeneca компанийн вакциныг ойролцоогоор 17 сая хүн хийлгэсний дотор 40 хүнд венийн судасны бөглөрөл эмгэг илэрчээ. ХБНГУ-ын Эрүүл мэндийн сайд Йенс Шпан өнгөрсөн даваа гарагт Пол Эрлихийн нэрэмжит институтээс зөвлөснөөр AstraZeneca компанийн вакциныг тарихаа зогсоосноо мэдэгдсэн байна. Германы эрх баригчид ийнхүү шийдвэр гаргасны дараа Францын Ерөнхийлөгч Эммануэль Макрон Европын Анагаах ухааны агентлагаас шинээр зөвлөмж гарах хүртэл AstraZeneca компанийн вакциныг тарихаа мөн зогсоох шийдвэр гаргажээ. Италийн Эрүүл мэндийн яам мөн л Европын Анагаах ухааны агентлагийн шийдвэрийг хүлээхээ мэдэгдсэн байна. Испанийн эрх баригчид AstraZeneca компанийн вакциныг тарих явдлыг 2 долоо хоногоор хойшлуулсан бол Нидерланд улс уг вакциныг 3-р сарын 29 хүртэл тарихаа зогсоожээ.

Covid-19: NI to keep using AstraZeneca jab after Irish suspension - BBC News

Ирланд, Португал, Дани, Норвеги, Болгар, Исланд, Словени, Австри зэрэг улс орнууд мөн адил AstraZeneca компанийн вакциныг иргэдэд тарих явдлыг хойшлуулсан бол Конго болон Индонез улс АстраЗенека компанийн вакцины нийлүүлэлтийг хойшлуулжээ. Нөгөөтэйгүүр Бельги, Польш, Чех, Украин зэрэг улс орнууд AstraZeneca компанийн вакциныг үргэлжлүүлэн хийнэ гэдгээ мэдэгдээд байна. Бельгийн Эрүүл мэндийн сайд Франк Ванденбрук улсад нь коронавирусын халдварын тохиолдлуудын тоо өндөр байгаа учраас вакцинжуулалтыг зогсоох боломжгүй гэдгийг онцолжээ. Тайландын эрх баригчид АстраЗенека компанийн коронавирусын эсрэг вакциныг энэ мягмар гарагаас эхлэн хийж эхлэх бол Канадын Ерөнхий сайд сайд Жастин Трюдо Канад улсад хийгдэж байгаа бүх вакцинууд тэр дундаа АстраЗенека компанийн вакцин нь аюулгүй гэдгийг онцолжээ.

Их Британийн эрүүл мэндийн яам АстраЗенека компанийн вакцин нь венийн судасны бөглөрөл үүсгэдэг гэсэн баримт нотолгоо байхгүй учраас иргэдийг вакциндаа идэвхтэй хамрагдахыг уриалжээ. Уг вакциныг бүтээх багийг ахласан профессор Эндрю Поллард БиБиСи агентлагт өгсөн ярилцлагадаа АстраЗенека компанитай хамтран бүтээсэн вакцин нь судасны бөглөрөл эмгэг үүсгэдэггүй хэмээн ярьжээ.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.