Нью Йоркийн метронд халдлага үйлдэгч этгээдийг баривчиллаа

Мягмар гарагийн өглөө Нью Йорк хотын метронд орон нутгийн цагаар өглөөний 08:30 цагт нэгэн этгээд гал нээсний улмаас 20 гаруй хүн шархадсан. Сэжигтэн хэргийн газраас зугтсаныг эрэн сурвалжилж, сэжигтний байршлын тухай үнэн бодитой мэдээлэл өгсөн иргэдэд 50 мянган ам. долларын шан харамж амлаж байсан.

Харин 30 цаг үргэлжилсэн эрэн сурвалжлах ажиллагааны дараа гэмт этгээдийг баривчилснаа Нью-Йорк хотын цагдаагийн газар мэдээлжээ. Иргэний өгсөн мэдээллийн дагуу баривчлагдсан этгээд нь 62 настай Фрэнк Жэймс гэгч байсан байна.

Цагдаагийн газраас мэдээлснээр тэрбээр мягмар гарагийн өглөө Бруклины 36-р гудамжны метроны буудал дээр утаат тэсрэх бөмбөг дэлбэлж, гар буугаараа 33 удаа буудсан аж. Энэ үеэр нийт 23 хүн шархадсаны 10 нь бууны суманд оногдсон байжээ.

Фрэнкс Жэймс өмнө нь есөн удаа цагдаад баривчлагдаж байж. Метроны өртөөн дэх хяналтын камеруудыг урьдчилан ажиллагаагүй болгосон байсан нь гэмт этгээдийг түргэн илрүүлэхэд саад болж байжээ.

Харин хэргийн газраас Жэймсийн нэг өдрийн өмнө Филадельфи хотод U-Haul үйлчилгээнээс түрээсэлсэн микро автобус олдсон юм байна. Уг автомашинд түүний нэртэй зээлийн карт, гар буу, сум, савтай бензин зэрэг олджээ.

Цагдаагийн газар халдлага үйлдэх болсон шалтгааны талаар мэдээлэл өгөөгүй байна. Гэхдээ гэмт этгээд онлайн орчинд хар арьстнуудын үндсэрхэг үзлийн талаар болон бусад хуйвалдааны онолын материалууд нийтэлж байсныг тогтоожээ.

Фрэнк Жэймсийн шүүх хурлын эхний сонсгол Пүрэв гарагт зохион байгуулагдах юм байна.

Халдлага гарах үеэр иргэдийн хийсэн бичлэгүүд нийгмийн сүлжээгээр тархсан ба бичлэгүүд дээрээс метроны буудал утаагаар дүүрч, шархдсан иргэд шалан дээр хэвтэж байгаа нь харагдаж байна.

Биеийн байдал нь хүнд 5 хүнийг эмнэлэгт хүргэжээ. Түүнчлэн утаанд угаартсан, үймээн шахцаалдааны үеэр бэртэл гэмтэл авсан 10 гаруй хүнд эмнэлгийн тусламж үйлчилгээг үзүүлсэн байна.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.