А. Меркель АНУ-д айлчилж байна

Twitter Print
2021 оны 07-р сар 16-нд 17:19 цагт
Мэдээний зураг,

АНУ-ын Ерөнхийлөгч Жо Байден, ХБНГУ-ын канцлер Ангела Меркель нар ОХУ-ын "Северный поток-2" хий дамжуулах хоолойн төслийн асуудал дээр өөр өөр үзэл бодолтой байгаа ч ОХУ-ын түрэмгийлэл, БНХАУ-ын ардчиллын эсрэг үйл ажиллагааны эсрэг хамтдаа зогсохоо өнгөрсөн пүрэв гарагт хийсэн уулзалтынхаа үеэр мэдэгджээ. 

Ангела Меркелийн хувьд энэ нь албан тушаалаасаа буухаасаа өмнө Цагаан ордонд Германы канцлерийн хувиар хийж буй сүүлчийн айлчлал болж байгаа онцлогтой юм. 

АНУ-ын өмнөх Ерөнхийлөгч Доналд Трампын үед хоёр талын харилцаа таагүй байсан бол энэ удаагийн уулзалтын үеэр А. Меркель, Ж. Байден нар хоёр улсын харилцаа сайжирч буйг онцлохыг хичээж байв. 

Уулзалтын үеэр А. Меркель Дэлхийн 2-р дайны дараа эрх чөлөөтэй, ардчилсан Герман улсыг байгуулахад АНУ чухал үүрэг гүйцэтгэснийг онцолж, хоёр улсын  нөхөрлөлийг хүндэтгэдэг болохоо илэрхийлжээ. А. Меркелийн хувьд АНУ-ын Ерөнхийлөгч Жо Байденыг тангараг өргөснөөс хойш Цагаан ордонд айлчилж буй Европын анхны тэргүүн болж байгаа юм. 

Ерөнхийлөгч Ж. Байдений хувьд Москва  Балтын тэнгисийн доогуур явж буй хий дамжуулах хоолойгоо ашиглан Украинд дарамт шахалт үзүүлнэ хэмээн эмээж буйгаа  илэрхийлжээ. 11 тэрбум ам. доллараар босч буй "Северный поток-2" хий дамжуулах хоолойн бүтээн байгуулалт ирэх 9-р сард дуусах ба уг хоолой ашиглалтанд орсноор Оросын хийг Европ руу дамжуулж, их хэмжээний төлбөр авдаг Украин улс уг орлогоосоо салах эрсдэлд орох юм. 

Нөгөөтэйгүүр Ерөнхийлөгч Ж. Байден хийн хоолойн бүтээн байгуулалт дуусах дөхсөнтэй холбоотойгоор тус хоолойг барьж буй компанийн эсрэг хориг арга хэмжээ авахаас татгалзсан нь АНУ-ын Ардчилсан болон Бүгд Найрамдах намын гишүүдийн шүүмжлэлийг дагуулсан билээ. 

Ерөнхийлөгч Ж. Байден, канцлер А. Меркель нар ОХУ эрчим хүчийг геополитикийн зэвсгээ болгон ашиглах ёсгүй хэмээн, Москвагийн түрэмгийллийн эсрэг хамтдаа зогсоох ёстой гэдэг дээр санал нийлж буйгаа илэрхийлсэн байна.

Хоёр улсын тэргүүн зарим нэг асуудал дээр "сайн найзуудад санал зөрөлдөх" явдал байж болно хэмээн онцолжээ. 

Дэлхийн хамгийн том эдийн засагтай АНУ болон Европын хамгийн том эдийн засагтай ХБНГУ-ын харилцаа нь ОХУ, Ойрх Дорнод,  Хойд Африкийн бүс нутагтай харилцаа тогтооход чухал ач холбогдолтой гэдгийг мэргэжилтнүүд онцолж байна. 

Хоёр улсын төрийн тэргүүний уулзалт дууссаны дараа Ангела Меркель нөхрийн хамт Цагаан ордонд болсон хүндэтгэлийн зоог барьсан ба уг арга хэмжээнд АНУ - ын улс төрийн зүтгэлтнүүд, Төрийн нарийн бичгийн дарга асан Колин Пауэлл, Хиллари Клинтон, АНУ-ын Конгрессын Төлөөлөгчдийн танхимын гишүүд оролцжээ.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.