Ж.Батзандан: Салхитын мөнгөний ордоос орох 750 тэрбумыг зээлтэй, зээлгүй бүх ахмадуудад тэгш олгох ёстой

Засгийн газраас Тэтгэврийн зээлийг нэг удаа тэглэх хуулийн төсөл өргөн мэдүүлсэнтэй холбогдуулан ШИНЭ нам байр сууриа илэрхийллээ.

Намын дарга, УИХ-ын гишүүн Ж.Батзандан, Салхитын мөнгөний ордыг барьцаалж бонд босгох замаар 750 тэрбум төгрөгийг ахмадын тэтгэврийн зээлийг тэглэхэд зарцуулна гэж ҮАБЗ-ийн зөвлөмж гаргасан. Энэ зөвлөмж хуулийн төсөл болж, өнөөдөр Төрийн байгуулалтын байнгын хорооны хуралдаанаар хэлэлцүүллээ.

200 мянган ахмад тэтгэрийн зээлээ тэглүүлээд, 150 гаруй мянган ахмад зээл аваагүйнхээ төлөө хохирох ёсгүй. 12 дугаар сард зохиомол зээлийн хэмжээ эрс нэмэгдсэн, зарим банканд тэтгэврийн зээлийн зохиомол бичилт хийсэн гэсэн гомдлууд ирж байна. Салхитын мөнгөний ордоос орох 750 тэрбум төгрөгийг бүх ахмадуудад ижил тэгш олгох ёстой. Тэгэхээр нэг өндөр настанд ойролцоогоор 2.5 сая төгрөг оногдохоор байгаа. ШИНЭ нам Үндсэн хуулийнхаа суурь зарчмын хүрээнд ахмадуудыг ялгаварлан гадуурхахгүй, бүх ахмадуудад олгох нь зүйтэй гэсэн саналаа УИХ-д оруулна. Үүний төлөө ШИНЭ нам улс төрийн тэмцэл явуулах болно. Ийм байр суурьтай иргэд байвал бидэнтэй нэгдээрэй.

Ахмадын зээлийг тэглэх нэрийн цаадах явцуу санаархлыг хэлэх ёстой. Тэтгэврийн зээл ХААН, Төрийн банканд дийлэнх нь байгаа. ХААН банканд 500 орчим тэрбум нь байна. 1990 оноос хойш хувьчлал бүрийн цаана хулгай луйвар байсан. Төрийн мөнгөөр Монголын луйварддаг МАНАН бүлэглэлийн эсрэг зогсоно. Ахмадын зээлийн хаах нэрээр Монгол банкнаас 500 тэрбум төгрөг ХААН банк руу шилжүүлэх гэж байна. Ийм  хууль бус бизнесийн санаархал байна гэсэн мэдээлэл бидэнд ирж байна. Одоо ХААН, Төрийн банкийг хувьчлах тухай асуудал яригдаж байгаа. Хулгай луйвартай тэмцэнэ гэж ШИНЭ нам байгуулагдсан гэв. 

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.