Уйлаад яахав дээ Л.Оюун-Эрдэнэ минь...

Twitter Print
2022 оны 04-р сар 08-нд 13:00 цагт
Мэдээний зураг,

Уйлаад яахав дээ Л.Оюун-Эрдэнэ минь!

Улам олуулаа тэмцэхийн үндсийг урьд шөнө та нар өөрсдөө тавьчихлаа.

“Ажлаа хий” гэж залуус шаардсны төлөө юун олон цагдаа,техник хэрэгсэл гаргаж ирж, харанхуй шөнөөр баривчилна вэ?

Яг өнөөдрийнх шиг Шударга ёсны хүсэмжлэл дээр хамгийн их эрх мэдэлтэй Ерөнхий сайд, эрх баригч намын дарга болсноо мартчихсан уу? Чамайг зөөлөн суудалд суулгах жагсаал чинь талбай дүүрэн гэртэй, тайз засал, тавилт зохион байгуулалттай байсан. Өнөөдрийн жагсаалд гэр байтугай майхан ч алга. Тайз байтугай тал цаас ч алга. Гэтэл ямар том хүчээр нухчин дарахыг завдана вэ? Өөрөө өндөр дээд албанд очоод яг юу хийснээ хөндлөнгөөс нэг хар даа. “Удахгүй дэлгэнэ” гэсэн удаа дараагийн үгээрээ хүлээлт бий болгохоос хэтэрсэнгүй. Цаг хугацааны эрхээр үнэнд гүйцэгдэхийн цагт “чадахгүй” гэдгээ батлав. “Улс төрийн үхдэл” хэдийн болсноо ухаараагүй яваа чинь бүр ч эмгэнэлтэй.

Ковидоор айлгаж гэрт нь хорингуутаа өөрсдөдөө зориулж хууль баталж байгаад идэж уусан. Тэр мөнгөөрөө Их хурал,Орон нутгийн сонгуульд ялсан. 8 саяар эмчилсэн ковидыг чинь бид гэрээр эмчилж болдгийг хожим мэдсэн. Хоёр тэрбумаар “Андлалын хөшөө” барьж буулгаж тоглоход чинь асар их мөнгө хувьдаа завшиж байгааг чинь харсан.

Улсын төсвийг Хэнтий, Бэрх рүү урсгаж, хамаатан Х.Нямбаатарыгаа Хууль зүйн сайдаар томилсон цагаасаа чи Монгол улсын Ерөнхий сайд биш, жалга дов, садан төрлөөсөө салаагүй жаалхан пацаан гэдгээ баталчихсан. Цахим шоу, өдөр алгасахгүй хурал цуглаан, өндөр дээд хэмжээний хүлээн авалтад урсгаж буй мөнгийг тооцож чадахгүй мөртлөө “хэмнэлт” гэдэг үгийг танайхан хэнд зориулаад хэлчих вэ? Хөгжлийн банк, ЖДҮ, Эрдэнэтийн хулгай, “Эрдэнэс Монгол” тэргүүтэй Төрийн өмчит компаниудын “шахаа”, өөрсдөөс чинь өөр хэн ч биш.

Хөгжлийн банкийг тоногч Сангийн сайд Б.Жавхлан, Хотын дарга Д.Сумьяабазар,Монгол банкны тэргүүн дэд Ерөнхийлөгч Г.Дөлгөөн нарыг сугандаа хавчуулж үлдснээрээ сураггүй худалч, дүр исгэгч гэдгээ батлав. Төрөөс хулгайч нар зайлаагүй цагт түмний нуруу хэзээ ч амрахгүй. Хил дээр үүссэн ачаа барааны бөөгнөрөл,үнийн өсөлт, ханшийн уналт, эдийн засгийн хямрал... Энэ бүхнийг зохицуулах үндсэн үүрэг Засгийн газрынх мөн. Ажлаа хийхийг тэднээс биш тэгээд хэнээс шаардах билээ?

Авсан цалин нь амьдралд байтугай автобусныхаа мөнгөнд хүрэхгүй байх тийм нийгмийг залуус хүсэхгүй байна. Эх орондоо эзний ёсоор амьдрах эрмэлзэл хүслээ авлигачдад булаалгахыг тэвчихгүй байна. Төр нь ард түмнээсээ тасарч, авлигачид төрийн албыг үе дамжуулан зайдагнахыг хэзээ ч зөвшөөрөхгүй. Авлигачдын тансаглал, ард түмний туйлдал хоёроос өнөөдрийн зөрчилдөөн үүссэн юм шүү. Төрөө хулгайч нараас салгах нь иргэн хүний эрхэм үүрэг билээ. Үүний төлөө барьж хоригдсон залуусыг сулла!

Сэтгүүлч Б.Отгон

2022.04.08

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.