Бээжин ДЭМБ-ын коронавирусын эх үүсвэрийг дахин судлах саналыг дэмжсэнгүй

Twitter Print
2021 оны 07-р сар 23-нд 10:29 цагт
Мэдээний зураг,

Бээжин Дэлхийн Эрүүл Мэндийн Байгууллагаас КОВИД-19 өвчний үүсгэгч коронавирусын эх үүсвэрийг судлах хоёр дахь шатны судалгаа явжулах санал тавьсаныг дэмжихгүй хэмээн БНХАУ-ын Эрүүлийг хамгаалах төрийн зөвлөлийн орлогч дарга Жэнь Исинь мэдэгджээ. Түүний хэлж байгаагаар уг саналаараа ДЭМБ "шинжлэх ухааныг хүндлэхгүй" байгаагаа илэрхийлсэн ба Хятадын засгийн газар коронавирусын эх үүсвэрийг судлах ажлыг улстөржүүлэхийг эрс эсэргүүцэж байгаа гэдгийг онцолжээ.

Өнгөрсөн 5-р сард АНУ-ын Ерөнхийлөгч Жо Байден Америкийн тусгай албаныханд КОВИД-19 өвчний үүсгэгчийн эх үүсвэрийг олж илрүүлэх ажилд хоёр дахин их хүчин чармайлт гаргаж ажиллаж, 90 хоногийн дотор ажлын үр дүнгээ танилцуулахыг үүрэг болгосон билээ.

Нью Йорк Таймс сонинд бичсэнээр Америкийн тагнуулын албаныхан өөрсдийнх нь мэдэлд коронавирусын эх үүсвэрийн тухай бүрэн судлагдаагүй баримтууд байгаагаа Цагаан ордонд танилцуулсантай холбоотойгоор Ерөнхийлөгч Жо Байден ийнхүү мэдэгдсэн аж.

ДЭМБ-ын тэргүүн Тедрос Гебрейесус өнгөрсөн 6-р сард коронавирусын цар тахал нь Хятадын вирус судлалын лабораториос коронавирус алдагдсантай холбоотой байж болох хувилбарыг хэтэрхий эрт хассан хэмээн хүлээн зөвшөөрсөн юм.

ДЭМБ-ын эрдэмтдийн баг өнгөрсөн 1 болон 2-р сард коронавирусын халдварын эх үүсвэрийг олж илрүүлэх ажлаар БНХАУ-д ажилласан юм. Эрдэмтэд Ухань хотын вирус судлалын институтэд ажилласныхаа дараа коронавирус нь лабораториос алдагдсан байх боломжгүй гэсэн дүгнэлтэд хүрсэн билээ.

Уг дүгнэлтэд Их Британи, АНУ хоёр маш шүүмжлэлтэй хандсан ба Бээжин эрдэмтдэд шаардлагатай чухал мэдээлэл, сорьц зэргүүдийг үзүүлэхээс татгалзсан хэмээн мэдэгдсэн юм.

Бээжингийн зүгээс коронавирус нь лабораториос алдагдсан байх боломжгүй, АНУ болон барууны орнууд коронавирус нь Хятадын нутаг дэвсгэрээс үүсэлтэй болгохыг хичээж байгаа нь улс төрийн зорилготой гэжээ.

Эх сурвалж: https://www.interfax.ru/world

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.