Европын 4 улс Оросын жуулчдыг хүлээн авахаа зогсоожээ

ОХУ-тай хиллэдэг Европын холбооны 4 улс энэ даваа гарагийн шөнө дундаас эхлэн ОХУ-ын жуулчдыг хилээрээ нэвтрүүлэхийг хоригложээ. ОХУ Украинд дайн өрнүүлж байгаа нөхцөлд оросууд юу ч болоогүй юм шиг аялж зугаалах ёсгүй хэмээн дээрх улс орнууд үзэж байгаа аж.

Польш, Эстони, Латви, Литва улс оросуудад олгох визэнд шинэ хязгаарлалт тогтоосон бол Финлянд улсын хил нээлттэй ч оросуудад олгох жуулчлалын визний тоогоо бууруулсан билээ.

ОХУ Украин руу цэргээ оруулснаас хойш Европын холбоо болон Европын гишүүн орнууд ОХУ-ын эсрэг хориг тогтоосоор байгаа билээ.

Европын холбоо ОХУ-аас нислэг хүлээн авахаа зогсоосон ба энэ сард оросуудад Шенгений виз олгох явцад хязгаарлалт тогтоох дээр зөвшилцөлд хүрсэн юм.

Польш, Эстони, Латви, Литва улсын хоригт ОХУ-ын эрх баригчдыг шүүмжлэгчид, сөрөг хүчнийхэн, ачааны тээврийн жолоочид, дүрвэгсэд, Европын улсын байнгын оршин суугч, Европт амьдардаг гэр бүл, хамаатан садныдаа зочлох хүсэлтэй иргэд орохгүй аж.

Өнгөрсөн ням гарагт хүн амынх нь 90 гаруй хувь орос хэлээр ярьдаг Эстонийн Нарва хотын хилээр оросууд яаран орж ирж байгаа дүр зураг ажиглагдаж байжээ.

Эстонийн хилээр өдөртөө 4000 орчим оросууд нэвтэрдэг ба шинэ журмын дагуу тэдгээрийн 10 хүрэхгүй хувь нь л Эстонийн хилээр орох боломжгүй болж байгааг Эстонийн эрх баригчид онцолжээ.

Латвийн Гадаад харилцааны сайд Эдгар Ринкевич өөрийн твиттер хуудаснаа, "Оросын ард иргэд ээ, хилээр нэвтрэх гэж оролдоод хэрэггүй, та бүхнийг хүлээж авах хүсэлтэй хүн энд байхгүй. Та нар Украины эсрэг явуулж байгаа дайнаа зогсоогоод тэр сайхан улсаас гарах хэрэгтэй байна!" хэмээн бичжээ.

Оросын иргэдэд визний хориг тогтоох тал дээр Европын холбоог хоёр хуваагдаад байгаа ба Берлин, Парис Оросын энгийн иргэдэд хориг тавих нь үр дүнгүй хэмээн үзэж байгаагаа илэрхийлсэн билээ.

Финляндын Ерөнхий сайд Санна Марин оросын иргэдийг хилээрээ нэвтрүүлэхгүй байх нь Шенгений бүсийн орнууд иус бүс нутгийн аль нэг орны олгосон визийг хүлээн зөвшөөрөх ёстой гэсэн зөвшилцлийг зөрчиж байна хэмээн мэдэгджээ.

Эстонийн Ерөнхий сайд Кайя Каллас дээрх асуудал дээр Европын холбооны улс орнууд талцаж байгаад сэтгэл дундуур байгаагаа илэрхийлж, Финлянд удахгүй Оросын жуулчдыг хүлээн авахаа зогсооно гэж найдаж байгаагаа онцолсон байна.

Эх сурвалж: Reuters

Содномцэрэнгийн Энхзаяа 

mongolcom.mn 

Энэ мэдээ танд таалагдаж байвал LIKE хийгээрэй. Танд баярлалаа.