Монголын Үндэсний бөхийн холбооноос зохион байгуулах бөхийн барилдааны хуваарийг гаргаж, нийтэд танилцуулжээ.
Үүнд:
Монголын Үндэсний Бөхийн Холбооноос 8-р сард задгай талбайд зохион байгуулах барилдааны хуваарь:
08-р сарын 16-17-нд Хүй Долоон худагт Улс, аймгийн алдар цолтой бөхийн барилдаан,
08-р сарын 21-22-нд Монголын Залуучуудын Холбооны 100 жилийн ойд зориулсан улс, аймгийн алдар цолтой 128 бөхийн барилдаан,
08-р сарын 28-д СХДүүрэгт шилдэг сумын заан цолтой 64 бөхийн барилдаан тус тус болно гэсэн байна.
Тэрчлэн бөхийн барилдааны дүрмийн өөрчлөлтийн талаар мэдээлжээ. Үүнд:
"Улсын Онцгой Комиссын 2021 оны 07-р сарын 23-ны өдрийн хуралдааны 25 дугаар тэмдэглэлийн 5 дахь заалтын 5.1 дэх хэсэгт заасны дагуу Аймгийн бөхийн холбоод орон нутгийн онцгой комиссоос зөвшөөрлийг аван зохион байгуулах 128 бөхийн барилдааныг Монголын Үндэсний Бөхийн Холбооны 2010 оны Бөхийн барилдааны дүрмийн дагуу зохион байгуулах бөгөөд МҮБХ-ны Цэцдийн зөвлөлийн 2021 оны 05-р сарын 15 болон 06-р сарын 12-ны хурлаар тус тус хэлэлцэн баталсан "Үндэсний бөхийн барилдааны дүрэм"-д орсон дараах өөрчлөлтүүдийг баримтлан ажиллана. Үүнд:
1. Барилдааны хугацаа нь 1-4 даваа 10 минут, 5-10 даваа 20 минут байна.
2. Хоёр бөхийн барилдаан дээрх хугацаанд үргэлжлэх бөгөөд заасан хугацаа дуусахад талаа шодож элэг бүс, сэнжигний барьцанд хүрнэ. Элэг бүс, сэнжигний барьц задарвал дан, давхар золгооноос барилдааныг үргэлжлүүлж, тухайн барилдааныг дуусгана. (Золгооны барилдаанд эмчийн цаг нэг удаа 2 минутаар үргэлжлэхээс өөр завсарлагагүй барилдана. Мөн шуудгыг бүрэн атгаж барьж болно.)
МҮБХ-ноос "Үндэсний бөхийн барилдааны дүрэм-2021" товхимлыг аймаг, сумдын бөхийн холбоод руу “Монгол Шуудан” ХК-ийн илгээмжээр хүргүүлж байгаа болно" гэжээ.
Өмнө нь Монголын Үндэсний бөхийн холбооноос "Засгийн газрын 2021 оны 07-р сарын 21-ний өдрийн хуралдаанд Ерөнхий сайд Л.Оюун-Эрдэнэ спортын уралдаан тэмцээнийг үзэгчгүйгээр зохион байгуулах чиглэлийг Улсын онцгой комисст өгсний дагуу Монголын Үндэсний Бөхийн Холбоо баяр наадмын бөхийн барилдаанаа, Морин спорт уяачдын холбоод хурдан морины уралдаанаа, Монголын Хөлбөмбөгийн Холбоо лигийн тэмцээнээ зохион байгуулах саналаа дурдсан хугацаанд нь хүргүүлсэн.
УОК-ын 2021 оны 07-р сарын 23-ны өдрийн хуралдаанаар "...Цар тахлын үе учир Бөхийн барилдааныг 128 бөхийн хязгаартайгаар зөвхөн задгай талбайд, хурдан морины уралдааныг орон нутаг тус бүрд нь зохион байгуулуулах..." шийдвэрийг гаргалаа" хэмээн мэдээлсэн.
Гэсэн ч энэ талаар Шадар сайдын хэвлэлийн албанаас "УОК-ын хуралдаанд санал орж ирсэн. Гэхдээ наадам хийнэ гэсэн шийдвэр гаргаагүй. Гадна талбайд тэмцээн хийх асуудлыг тухайн орон нутгийн халдварын нөхцөл байдлаас хамаараад аймаг, нийслэлийн Засаг дарга нарт онцгой комиссоороо шийдвэрлэх чиглэлийг УОК-оос өгсөн" гэх тайлбарыг өгч байсан юм.
Г.Ганаа
Энэ мэдээ танд таалагдаж байвал LIKE хийгээрэй. Танд баярлалаа.
