77 улсын 2997 хүн амийг авч одсон аллага

9/11. Эдүгээгээс 21 жилийн тэртээ Нэгдсэн улсад байдаг л нэг намрын налгар өглөө эхэлж байлаа. Өглөөний 07:59-д Бостоноос Лос-Анжелесийг зорин хөөрсөн Американ Эйрлайнс компаний АА-11 нислэгийн дугаар бүхий, зорчигч, экипаж нийлсэн 92 хүнтэй, Боинг 767 онгоц 08:13-т удирдлагын төвтэй холбоо тасрав. Онгоц хөөрснөөс 10 минутын дараа Мухаммад Атта тэргүүтэй хутгаар зэвсэглэсэн таван террорист хөлгийн дарга, туслах нисгэгчийг бизнес ангиллын нэгэн зорчигчийн хамт хөнөөгөөд онгоцыг барьцаалсан нь тэр ажээ. 08:24-т Мухаммад Ата зорчигчдод хандан анхааруулга хэлэхдээ андуурч удирдлагын төвтэй холбогдох товч дарснаар онгоц барьцаалагдсан нь тодорхой болов.

Өглөөний 08:46-д Боинг 767 хөлөг Нью-Йоркийн тэнгэрт радараас гэнэт алга болохтой зэрэгцэн онгоцны зорчигчийн танхимын холбоогоор удирдлагын төвд мэдээлэл өгч байсан үйлчлэгч ч чимээгүй болов. Энэ бол алан хядагчид дэлхийн эдийн засгийн төв Нью-Иорк хотын ландмарк-Дэлхийн худалдааны төвийн 110 давхар ихэр хоёр өндрийн хойд цамхаг буюу 1-р цамхгийн 93-99 давхрыг барьцаалсан онгоцоороо 720 км/цагийн хурдтайгаар мөргөсөн цаг мөч юм. Энэ бол 2001 оны 9 дүгээр сарын 11-ний өдөр болсон дэлхийг цочроосон аймшигт алан хядах үйл ажиллагааны эхлэл байлаа.

1-р цамхагийг мөргөснөөс 17 минутын дараа буюу хоёр дахь онгоц буюу Бостоноос Лос Анжелесийн чиглэлд нисч байсан Юнайтед Эйрлайнс компаний 65 хүнтэй, UA-175 нислэгийн дугаартай Боинг 767 онгоц мөн барьцаалагдаж 09:03-т Дэлхийн худалдааны төвийн 2-р цамхгийн 77-85 давхрыг 950км/ цагийн хурдтай шумбан ирж мөргөв. Хэвлэл мэдээллийн бүх дуран хар утаа олгойдон байгаа 1-р цамхгийг шууд дамжуулж, хүн төрөлхтөн амьсгал даран телевизээ харж байх тэр агшинд 2-р цамхаг халдлагад өртөж АНУ төдийгүй дэлхий даяараа шоконд орж, паникт автлаа. Чухам энэ л алан хядагчдын зорилго байжээ. Энэ бол осол, золгүй явдал биш хэн нэгний санаатай алан хядах үйл ажиллагаа гэдэг нь хэнд ч тодорхой боллоо.

1941 оны 12 дугаар сарын 7-нд Японы арми Хавайн арал дахь Сувдан эргийн боомтыг гэнэдүүлэн довтолсноос хойш анх удаагаа АНУ-ын нутаг дэвсгэр гадны халдлагад өртөж байгаа нь энэ. “Mr President, America is under attack”. 1941 онд АНУ-ын 32 дахь ерөнхийлөгч Франклин Рузвельт энэ үгийг сонссоноос хойш яг нэгэн жарны дараа 43 дахь ерөнхийлөгч Жорж Буш энэ үгийн сонсох тавилантай байжээ. Флоридагийн нэгэн сургуульд хүүхдүүдийн хичээлд сууж байсан ерөнхийлөгчид нарийн бичгийн дарга нь энэ үгийг чихэнд нь шивэгнэхэд хүүхдүүдийг айлгахгүй гэж 7 минутын турш царайны хувиралгүй сууж байгаад гарсан ерөнхийлөгчийн бичлэг сурвалжлагчийн дуранд буусан нь одоо ч youtube-д бий.

Сүүлд мөргүүлсэн 2 дугаар цамхгийн бүтэц дэлбэрэлтээс үүссэн их халалтыг тэсэлгүй 09:59-т тэнгэр газар нийлэм их дуу чимээ тос шороо манаруулан нуран унав. Удалгүй 10:28-д 1 дүгээр цамхаг ч мөн адил нуран уналаа. Үүнээс гадна 47 давхар 7-р цамхаг нурж ойролцоо цогцолбор барилгуудын бүтцэд ч өөрчлөлт оржээ. Тухайн үеийнхээ барилга архитектурын шилдэг бүтээл Дэлхийн худалдааны төвийн ихэр цамхаг 1973 оны 4 дүгээр сарын 4-нд ашиглалтад орсноосоо хойш 28 жилийн дараа хүн төрөлхтнийг цочоосон аймшигт аллагын хохирогч болон газрын хөрснөөс үүрд алга боллоо.

Гурав дахь онгоц буюу Вашингтоноос Лос-Анжелесийн чиглэлд нисэж байсан Американ Эйрлайнсын АА-77 дугаартай нислэг, 64 хүнтэй Боинг 757 онгоц 09:37-д АНУ-ын Батлан хамгаалах яамны байр Пентагоны баруун хэсгийг мөргөж мөн их хэмжээний дэлбэрэлт болов.

Дөрөв дэх онгоц буюу Ньюварк Сан-Франсиско чиглэлийн Юнайтед Эйрлайнсын UA-93 дугаартай 45 хүнтэй онгоц нислэгийн маршрутаас гарч Вашингтоныг чиглэн явж байгаад барьцаалагдаж 10:03-т Пенсилваны ойролцоо хээр газар унаж сүйрэв. Барьцаалагдсан бусад онгоц алан хядагчдын төлөвлөсөн байгаа оносон бол UA-93 байндаа хүрэлгүй унасан юм. Зорчигчид онгоцыг барьцаалсан алан хядагчидтэй амь өрсөн тэмцэж онгоцыг хяналтандаа авахыг оролдсон бөгөөд энэ үеэр байндаа хүрэх боломжгүйгээ мэдсэн алан хядагчид онгоцыг унагаасан байдаг. Энэ онгоцны бай нь парламентын ордон-Капитол юм уу Цагаан ордон байсан гэдэг нь хожим нотлогджээ. Э

Хүн төрөлхтний түүхэнд хамгийн олон хүний амь насыг авч одсон 9.11-ний аймшигт алан хядах үйл ажиллагааны үр дүнд 77 улсын 2997 хүн амь эрсэджээ. Барьцаалагдсан 4 онгоцонд 266 хүн, Худалдааны төвийн барилгад 2606 хүн, Пентагонд 125 хүн амиа алджээ. Үүнээс гадна ихэр цамхгийн нуралтаас үүдсэн агаарын бохирдол, хорт хийн улмаас олон хүмүүс эрүүл мэндээрээ хохирч өнөө хир нь хавдар, шалтгаан нь үл мэдэгдэх өвчинд нэрвэгдэж байна гэсэн судалгаа байдаг. Мөн энэ аймшигт үйл явдлыг дэргэдээс нь нүдээрээ харсан, телевизээр үзэж гэрч нь болсон үй олон хүн сэтгэцийн эмгэг, траумагаар шаналж байна.

Америкчууд онц байдал зарлаж тухайн үед АНУ-ын агаарын хилд байсан 4200 гаруй онгоцыг нэн даруй буулгах буюу буцааж байлдааны онгоцыг хөөргөн агаарын хилээ бүрэн хааж, хяналтандаа авах зэргээр яаралтай арга хэмжээ авсан боловч үнэн худал нь мэдэгдэхгүй цуу яриа, айдас хүйдэс газар авч орон даяар паникт оров.

Алан хядагчид урьдчилан сайтар бэлтгэж төлөвлөсний дагуу АНУ-ын эдийн засаг, улс төр, батлан хамгаалахын бэлэг тэмдэг болсон обьектуудыг зориуд сонгож авсан нь харагддаг. Мөн баруун эрэг хүрэх холын нислэгийн их түлштэй онгоцуудыг барьцаалсан нь аль болох их хохирол учруулахаар бодож тооцсон гэлтэй.

Энэ аймшигт ажиллагааг гүйцэтгэж АНУ төдийгүй дэлхий нийтийг цочроосон этгээдүүд бол 4 онгоц барьцаалсан 19 хүн. Тэдний 15 нь Саудын Араб, бусад нь Египт, Арабын нэгдсэн Эмират, Лебаноны иргэд бөгөөд ахлагч 33 настай Мухаммед Аттагаас бусад нь дөнгөж хорь гарсан залуучууд байлаа. Тэдний дотор нэртэй их сургуулийн оюутан, чинээлэг айлын хүүхэд ч байжээ. Атта тэднийг “Диваажинд олон онгон охин хүлээж байгаа” хэмээн сэнхрүүлж мессеж явуулж байсан байдаг. Египтын элит гэр бүлээс гаралтай Атта исламын шашны үндэсэрхэг үзлийг дэмжигч бөгөөд эцгийнхээ танил Осама Бин Ладентай уулзаж танилцсанаар энэ үйл ажиллагаанд татагдан оржээ.

Эдгээр залуусыг лалын хэт даврагсдын Ал Кайда бүлэглэлийн толгойлогч Осама Бин Ладен бэлтгэн санхүүжүүлж энэ аллагыг гүйцэтгэжээ. Осама Бин Ладен бол Арабын шэйхийн дотны найз, Арабын толгой баян Мухаммед Бин Ладены 10 дах эхнэрээс төржээ. Ээжийгээ дуурайсан их өндөр, бараг 2м шахам нуруулаг залуу байжээ. Элит гэр бүлд хүмүүжиж, нэртэй сургуульд сурсан тэрбээр багаасаа шашны номд нэн сонирхолтой байжээ. Коран судар болон бусад шашны номыг англиар орчуулж байсан гэдэг. Тэрбээр Дундад Ази дахь Америкийн оролцоог эрс буруушааж, Америк, Еврей зэрэг “ буруу номтон”-ыг хүч хэрэглээд ч болов холдуулах ёстой гэж үздэг байжээ.

Чинээлэг, нуруулаг Араб эр маань Орос Афганы дайны үеэр Арабын орнуудаас хандив босгон Оросыг эсэргүүцэгч Афганы Мүжэхэдин-ийг дэмжиж байгаад эцэст бүр өөрөө цэрэг элсүүлэн Афганистанд очиж цэрэг дайны үйл ажиллагаанд оролцох болов. Улмаар Афганистанд зэвсэглэсэн бүлэглэлтэй болоод авч. Тэр нь ч нэлээн томорч. Ийнхүү Ал Кайда хэмээх террорист байгууллага бий болжээ. Бин Ладен Афганистанд Оросуудтай үзэж байхдаа АНУ-ын нууц байгууллагуудтай холбоотой болсон гэсэн яриа байдаг. Оросууд Афганаас 1989 онд цэргээ татсаны ердөө дараа жил нь буюу 1990 онд Персийн булангийн дайн болсныг бид мэднэ.

Олон жилийн Иран Иракийн дайны дараа сульдсан эдийн засгаа өөд татах гэсэн Иракийн Саддам Хуссейн цэрэг зэвсэг сул хэрнээ “хөөрхөн” чинээлэг Кувейтийг шохоорхож улмаар Кувейтэд цэрэглэн халдаж Арабын хил дээр тулж ирээд байлаа. Нутагтаа ирээд удаагүй байсан Осама Бин Ладен Арабын Батлан хамгаалахын сайдтай уулзаж Иракийн түрэмгийллийг зогсоохын тулд Америкийн цэрэг оруулах шаардлагагүй, өөрийн Ал Кайда бүлэглэлийн цэргийг Афганаас авчирч Саддамтай байлдъя гэж ятгаж байжээ. Гэвч Бин Ладены санаснаар болсонгүй. АНУ-ын цэргүүд Арабын хойгт байрлаж, Персийн булангийн дайн эхлэв.

Исламын шашны хамгийн ариун газарт тооцогддог Мека, Мединагийн эх орон Арабын хойгт “буруу номын” Америк цэргүүд байрлах нь Бин Ладены хувьд хэзээ ч эвлэршгүй зүйл байлаа. Тэрбээр үүнээс болж Арабын эрх баригчидтай зөрчилдөж улмаар эх орноосоо хөөгдөв. Энэ үеэс террорист үйл ажиллагаа эхлүүлсэн байдаг. Арабаас хөөгдсөний дараа хэсэг хугацаанд Суданд байрлан террорист үйл ажиллагаагаа эрчимжүүлэв. 9/11-нээс өмнө бүр аль 1993 Дэлхийн худалдааны төвд дэлбэрэлт зохион байгуулж, Танзани, Кенид байгаа АНУ-ын ЭСЯ-ыг дэлбэлэв. АНУ-ын шахалтад орсон Сүдан мөн Бин Ладенийг нутгаасаа хөөв. Ийнхүү Осама Бин Ладен Афганистанд ирж террорист үйл ажиллагаагаа үргэлжлүүлж байхдаа 2001 оны 9 дүгээр сарын 11-ний өдрийн аймшигт аллагыг зохион байгуулсан юм.

Жигжидсүрэнгийн Гантулга

 

Энэ мэдээ танд таалагдаж байвал LIKE хийгээрэй. Танд баярлалаа.