Энэтхэгт үйлдвэрлэсэн эмнүүдийн 3 хувь нь стандартын шаардлага хангахгүй байна

Twitter Print
2023 оны 05-р сар 29-нд 17:20 цагт
Мэдээний зураг,

Энэтхэгчүүдийн өдөр тутамдаа хэрэглэдэг даралтны эм, бактерийн эсрэг болон харшлын эсрэг зэрэг эмнүүдийн 3 орчим хувь нь стандартын шаардлага хангахгүй байгааг Энэтхэгийн засгийн газраас томилсон байцаагчид тогтоожээ.

Африкийн хэд хэдэн улсад хүүхдүүд Энэтхэгт үйлдвэрлэсэн ханиадны сироп хүүхдүүдийн үхэлтэй холбоотой гэх асуудлын улмаас Энэтхэгийн эрх баригчид эмийн үйлдвэрүүдэд гэнэтийн шалгалт явуулжээ. Шаардлага хангахгүй гэдэг нь өвчин эмгэгийг эдгээх, хянах явдалд үр дүн үзүүлэхгүй, өвчин эмгэгийг цааш хүндрүүлэх, тархах эсвэл эмэнд тэсвэртэй болох үндэс суурийг тавьж өгдөг гэсэн тодорхойлолтонд багтах аж.

Гуравдугаар сард байцаагчид эмийн үйлдвэрүүдээс хураан авсан 1497 эмэнд шалгалт хийсний 48 нь буюу ойролцоогоор 3 хувь "стандартын шаардлага хангаагүй" аж. Энэ нь өнгөрсөн 1, 2-р сарынхаас сайжирсан үзүүлэлт аж. 1, 2-р сард хийсэн шалгалтын дүнд 5 хувь нь стандартын шаардлага хангаагүй аж. Шаардлага хангаагүй эмнүүд дотор Тельмисартан нэртэй даралтны эм багтсан ч тус эмийг үйлдвэрлэгч Гленмарк компанийн зүгээс байцаагчдын шалгасан эм хуурамч, Гленмарк компанид үйлдвэрлээгүй эм байсан хэмээн буруушаажээ.

Ханиадны сироптой холбоотой асуудлаас болж Энэтхэгийн Эрүүл мэнд, Гэр бүлийн халамжийн яам тус улсад үйл ажиллагаа явуулдаг эмийн үйлдвэрүүдэд шалгалт хийж эхэлсэн ба өнгөрсөн мягмар гарагийн байдлаар 18 компанийн лицензийг цуцлаад байна.

Өнгөрсөн онд ДЭМБ Узбекистан болон Африкийн орнуудын хүүхдүүдийн дунд Энэтхэгт үйлдвэрлэсэн ханиадны сироптой холбоотой нас баралт бүртгэгдсэн асуудлыг хөндсөн юм.

АНУ-д эмэнд тэсвэртэй нянгийн халдвар тархсан нь Энэтхэгт үйлдвэрлэсэн нүдний дусаалгатай холбоотой болохыг тогтоожээ. Америкийн Өвчнийг хянах, урьдчилан сэргийлэх төвөөс мэдээлснээр ховор төрлийн нянгийн халдвар авсан 68 өвчтөн бүртгэгдсэний 3 нь нас барж, 8 нь сохорч, 4 нь нүдээ мэс заслын аргаар авахуулахад хүрчээ. Америкийн Хүнс ба Эмийн албанаас энэ сард гаргасан тайландаа Энэтхэгийн Глобал Фарма компанийн Ченнай дахь үйлдвэрт хийсэн шалгалтаар тус үйлдвэр аюулгүй ажиллагааны хэд хэдэн заалтыг ноцтой зөрчсөн болохыг тогтоосон тухай бичжээ.

Энэтхэгийн засгийн газар Энэтхэг нь дэлхийн "эмийн сан" хэмээн бахархдаг ба өнгөрсөн лхагва гарагт Ерөнхий сайд Нарендра Моди Дели хотод болсон эрүүл мэндийн чуулганы үеэр, "Энэтхэг улсын зорилго нь эрүүлийг хамгаалах хэрэгслүүдийг зөвхөн энэтхэгчүүдэд бус бүх дэлхийн хүн амд хүртээмжтэй болгох юм." хэмээн мэдэгджээ.

Мэргэжилтнүүд Энэтхэгийн эмнүүд стандартын шаардлага хангахгүй байгаа нь, мөн хуурамч эм олноор үйлдвэрлэгдэж байгаа нь тус улсын хяналтын тогтолцоо нь хуучирсан, алдаа дутагдал ихтэй, сул байгаатай холбоотой гэж үзэж байна.

Эх сурвалж: The Guardian

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.