Токио хотод коронавирусын халдварын тархалт нэмэгдэж байгаатай холбоотойгоор Японы эрх баригчид эрүүл мэндийн тогтолцоонд ачаалал үүсгэхээс сэргийлж, зөвхөн коронавирусын халдварын шинж тэмдэг хүндээр илэрч буй болон хүндрэх эрсдэл өндөртэй өвчтнүүдийг эмнэлэгт хэвтүүлэх бодлого баримтлах аж.
Япон даяар коронавирусын халдварын тохиолдлуудыг онцом нэмэгдсэн ба нэг өдөрт бүртгэгдэх халдварын тохиолдлын тоо 10 мянгыг даваад байна.
Зуны Олимпын наадам зохион байгуулагдаж байгаа Токио хотод л гэхэд өнгөрсөн бямба гарагт коронавирусын халдварын 4058 тохиолдол бүртгэгдэж рекорд тогтоожээ. Коронавирусын халдварын шинж тэмдэг хүндээр илрээгүй иргэд гэртээ тусгаарлагдах ба тухайн иргэдийн биеийн байдал хүндэрсэн тохиолдолд эмнэлэгт хэвтүүлэх арга хэмжээг цаг алдалгүй авах болно хэмээн Ерөнхий сайд Ёшихидэ Суга онцолжээ.
Энэ даваа гарагаас эхлэн нийслэл Токио болон Осакагийн засаг захиргааны нэгжтэй хөрш байрлах засаг захиргааны 3 нэгжид онц байдлын дэглэмийг сунгажээ.
Өнгөрсөн ням гарагийн байдлаар Японд коронавирусын цар тахал эхэлснээс хойш коронавирусын халдварын нийт 932 мянган тохиолдол бүртгэгдээд байгаа ба уг вирусын халдварын улмаас 15 мянга гаруй хүн нас баржээ. Өнөөдрийн байдлаар Японы эрх баригчид коронавирусын "дельта" хувилбарын тархалтыг хяналтандаа авахаар тэмцэж байна. Нөгөө талаас тус улсын нийт хүн амын 30 хүрэхгүй хувь нь коронавирусын эсрэг вакцинд бүрэн хамрагдсан ба залуус вакцинд хамрагдах нь идэвх муутай байна гэдгийг Японы эрх баригчид онцолжээ.
Түүнээс гадна Японы эрх баригчдын мэдээлснээр коронавирусын халдварын шинж тэмдэг хүндээр илэрч буй өвчтнүүдэд зориулсан эмнэлгүүдийн нийт орны 70 орчим хувь нь хэдийн дүүрчээ.
Коронавирусын халдварын тархалттай тэмцэх зориогоор Японы эрх баригчид тусгаарлалтын журмыг зөрчсөн иргэдийн нэрийг олон нийтэд зарлаж эхэлсэн байна.
Японы засгийн газраас гаргасан журмын дагуу гадаадын улс орнуудаас ирсэн иргэд хоёр долоо хоногийн турш өөрсдийгөө тусгаарлаж, утсан дээрээ байршил тогтоох тусгай аппликейшн суулгаж, биеийн байдлаа тогтмол мэдээлэх ёстой аж.
Эх сурвалж: https://www.reuters.com/world/asia-pacific/japan
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
