Одоо ч бие биедээ цаасан захиа илгээх нь үгүй болж дээ. Хүүхдүүд захиа гэдгийг мэдэхээ больж байх шиг. Японд ч гэсэн багассан боловч өөрийн сэтгэлийг илэрхийлэх, “найрсаг сайхан харилцаа нөхөрлөл маань үргэлж хэвээрээ шүү” гэсэн санааны үүднээс өөрийн гараар бичсэн захиаг шуудангаар илгээх нь одоо хүртэл байсаар байна.
Захиаг японоор тэгами буюу "гар цаас" гэж нэрлэдэг. НТӨ III зууны үеийн Хятадын Хан гүрний үед алгын чинээ жижиг нимгэн модон дээр захиа бичдэг байжээ. Эндээс л японоор тэгами буюу энэхүү "гар цаас" гээд байгаа нэр үүссэн болов уу. Харин хагаки буюу "навчин дээрх бичиг" гэдэг нэр бол Хятадад биш Японд үүссэн юм шиг байгаа юм. Хятад, Япон гэж бичээд байгаа маань энэ хоёр улс үндэстэн бичиг соёл ойролцоо, ижилхэн дүрс үсэг хэрэглэдгээрээ холбоотой болохор тэр.
Хагаки гэдэг бол манайхны бичдэг "ил захидал" л даа. Японы лавлах, бичиг сэлт дээрээс яагаад "навчин дээрх" гэсний учрыг олох гэж хайж үзсэн. Уг нь бол навчин дээр л бичдэг болохоор тэгж нэрлэсэн баймаар юм. Гэтэл "хагаки гэдэг нь "хажуу талд нь, буланд нь бичдэг" гэсэн утгаас үүдэлтэй нэр" гэсэн тайлбарууд байдаг. Харин миний тааврыг батлах нэгэн үйл явдал болсон юм. Энэ бол 2013 оны эхээр Мияаги мужаар аялж явахад навчин дээр бичсэн захиаг олж харсан явдал юм. Одоо ч заримдаа навчин дээр богинохон захиа бичдэг юм байна. Бүр шуудангийн марк наачихсан байгааг та бүхэн харж байгаа биз.
Шинэ жилээр япончууд цаасан ил захидлыг ёстой шидэлцэнэ дээ. Энэ уламжлал бол арилахгүй юм шиг байгаа юм. Нэг хүн шинэ жилийн мэндчилгээ бичсэн хэдэн зуун ил захидал илгээнэ гээч. Мөн төчнөөн тооны шинэ жилийн мэндчилгээ хүлээн авна. Сураггүй болсон юм уу, уулзаагүй удсан найз нөхдөөс нь ил захидал ирэхээр их баярлацгаадаг, тэр маань сайн л явж байгаа юм байна даа, хэмээн санаа амарцгаадаг гэсэн.
Япон судлаач Д.Төмөрбаатар
Энэ мэдээ танд таалагдаж байвал LIKE хийгээрэй. Танд баярлалаа.
