Ард түмэнд тустай хууль батлуулдаг ардчилсан капитан

Содномзундуйн Эрдэнэ. УИХ-ын гишүүн, Ардчилсан намын дарга. Адармаатай түүхтэй, адайр ааштай. Магтъя гэвэл туйлбартай, муулъя гэвэл гөжүүд. Муутгая гэвэл Баянголын “хаан”. Муулаад суухад үг нэмэхээс татгалзахгүй тоймгүй олон дайсантай.

Магадгүй магтаалын үг хэлхэж, талархал илэрхийлэхээс татгалзахгүй ойрын дэмжигч ч олонтой. Аль аль дүгнэлт нь бусдад итгэл төрүүлэхүйцээр өрнөдгөөс нь харвал тэр зарим хүний хувьд гайхалтай сайн, заримынх нь хувьд тоймгүй муу хүн. Хоёр туйл гэмээр энэ сонин дүгнэлт болоод харилцааны ар руу өнгийж харах нь ээ С.Эрдэнэ гэдэг улс төрч яах аргагүй сонин бас содон дүр төрх гэж нэгэн нийтлэлч тодорхойлжээ.

Тийм ээ. С.Эрдэнэ үнэхээр сонин бас содон улс төрч. Түүний талаар сонин хэвлэлд, цахим орчинд зах замбараагүй сэтгэгдэл, гүтгэлэг хөвөрдөг. С.Эрдэнийг муучилснаар бол тэр их муу хүн. Цаашилбал Монголд хортой нэгэн байлтай. Гэлээ гэхдээ тэрийг нь олоод тогтоочихсон хууль шүүхийн шийдвэр өнөөдөр гарчхаагүй байна. Тэглээ гээд тэрбээр ган хийж гасалж үзээгүй, гон хийж гонгинож, гоншгонож яваагүй нэгэн. Угаас ажил хийж байгаа, амжилт дүүрэн яваа хэнийг ч болов хов жив дагаж л байдаг гэлтэй.

Ардчилсан хувьсгалын 30 жилийн хугацаанд арай дөмөгхөн улс төрчийг нэрлэвэл АН-ын дарга, УИХ-ын гишүүн С.Эрдэнэ их дээгүүрт яах аргагүй нэрлэгдэнэ. Учир нь тэрбээр өрсөлдөгч нартаа муу нэртэй ч ард түмэнд сайн, тустай хууль батлуулж чаддаг Ардчилсан капитан юм. Түүний батлуулсан хуулиуд өнөөдөр ч Монголын ард түмэнд өгөөжөө өгсөөр байна.

Тодруулбал, С.Эрдэнэ парламентад гурвантаа сонгогдон ажиллахдаа 50 гаруй хууль санаачилж, тэдгээрийн 31-ийг нь УИХ-аар батлуулж чадсан байна. Тэдгээрээс  нь онцолбол, Ажилласан жил, тэтгэврийн даатгалын шимтгэлийг нөхөн тооцох тухай хуулийг санаачлан боловсруулж Улсын Их Хурлаас 2012 онд батлуулж хэрэгжүүлснээр Улсын хэмжээнд нийт 646 мянган иргэдийн ажилласан хугацааг 5-11 жилээр нөхөн тооцсон нь нийгмийн хамгааллын томоохон арга хэмжээ болсон юм. Тус хууль хэрэгжснээр Нийгмийн шилжилтийн үед нэрвэгдсэн олон мянган иргэд төрөөс тэтгэвэр авах боломжтой болсон билээ.

Түүнчлэн Эрүүл мэндийн даатгалын тухай хуулийн шинэчилсэн найруулгыг санаачлан боловсруулсан нь цагаа олсон хууль байлаа. Түүний үр дүнд даатгуулагч чанартай, аюулгүй эрүүл мэндийн тусламж, үйлчилгээг хүртээмжтэй авах эрүүл мэндийн тусламж үйлчилгээний зардлаа Эрүүл мэндийн даатгалын цахим картаар шууд төлөх, төлбөрт хяналт тавих зэрэг эрх бүрдсэн юм. Мөн тэрбээр, Хамтын тэтгэврийн тухай хуулийг санаачлан батлуулсан нь ахмад настны амьдралын чанарыг сайжруулах, гэр бүлийн үнэ цэнийг нэмэгдүүлэх ач холбогдолтой хууль болсон билээ.

Одоо ч тэрбээр ард түмэнд тустай хууль батлуулж чаддаг Ардчилсан капитан гэдгээ нотолсоор Зээлийн хүүгийн дээд хязгаар тогтоох болон Мөнгө хүүлэлттэй тэмцэх тухай хууль, СӨХ-ны тухай болон Дундын өмчлөлийн эд хөрөнгийн тухай хуулийн төсөл санаачлаад УИХ-аар дэмжигдээд явж байна. 

А.ТАМИР

 ZASGIINMEDEE.MN

 

Энэ мэдээ танд таалагдаж байвал LIKE хийгээрэй. Танд баярлалаа.