Хятадад лалын сүмийг нураах гэсэн цагдаа нар иргэдийн эсэргүүцэлтэй тулжээ

Хятадын Юннань мужийн Нагу хотод байрлах 14-р зууны үеийн лалын сүмийн сүүлд баригдсан хэсгийг хэсэгчлэн нураах шийдвэр гарсантай холбоотойгоор цагдаа нар болон иргэдийн хооронд мөргөлдөөн үүсжээ.

2020 онд шүүх дээрх лалын сүмд сүүлд нэмж барьсан дугуй дээвэр, цамхаг зэрэг нь хууль бусаар баригдсан хэмээн тогтоож, тэдгээрийг нураах ёстой гэсэн шийдвэр гаргажээ.

Нагу хотын хүн амын дийлэнх нь лалын шашитнай Хуэй үндэстнүүд бөгөөд өнгөрсөн амралтын өдрүүдээр шүүхийн шийдвэрийг гүйцэтгэхээр очсон цагдаа нар иргэдийн эсэргүүцэлтэй тулсан байна.

Нийгмийн сүлжээнд нийтлэгдсэн бичлэгт лалын сүмийн гадаа цагдаа нар болон иргэдийн хооронд мөргөлдөөн үүсэж, иргэд цагдаа нар луу сандал, чулуу зэрэг зүйлс шидэж байгааг харж болох юм. Гэрчүүдийн мэдээлснээр цагдаа нар хэд хэдэн хүнийг баривчилсан байна.

Өнгөрсөн ням гарагт Нагу хотын цагдаагийн газраас эмх замбараагүй байдал үүсгэж, цагдаагийн албан хаагчдын эсрэг хүч хэрэглэсэн иргэдийг 6-р сарын 6-ны дотор цагдаагийн газарт ирж хэргээ хүлээхийг шаардсан мэдэгдэл гаргажээ.

Нагу хотод болсон уг явдалтай холбоотой мэдээ мэдээллийг Хятадын цахим орчинд хатуу хязгаарласан байна.

Хуэй үндэстнүүд нь Хятадын хамгийн том үндэстний цөнхүүдийн нэг бөгөөд уйгурчуудтай харьцуулахад Хуэй үндэстнүүд нь мандарин хэлээр ярьдаг, хүн амын дийлэнх болох Хан үндэстнүүдтэй адил төсөө ихтэй аж.

2015 онд Хятадын Ерөнхийлөгч Си Жиньпин шашинд итгэгчдийн тоо өсөн нэмэгдэж буй асуудалд болгоомжтой хандах ёстой хэмээн мэдэгдэж байсан билээ.

Тус улсад иргэд нь шашин шүтэх, эс шүтэх эрхтэй ч сүүлийн жилүүдэд Хятадын эрх баригчид ялангуяа лалын шашинтай иргэдэд тавих хяналтаа чангатгасан юм.

2018 онд Хятадын төвд Ниньша мужид олон зуун Хуэй үндэстнүүд лалын сүмээ авч үлдэхийн тулд сүмийн гадна суулт хийж байсан ч эрх баригчид тус сүмийн хэд хэдэн цамхгуудыг нурааж байжээ.

Эх сурвалж: https://www.reuters.com/world/americas/haitians

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.