МАН-ын 100 онигоо

Twitter Print
2014 оны 09-р сар 10-нд 09:51 цагт
Мэдээний зураг,

Аль эртнээс л засгийг унагах адын хүсэл нь МАН-ынхныг зунжингаа шаналгаж, энэ байдлаараа бол намрын чуулган ойртох тусам шөнө ч унтаж чадахгүйд хүрэх шинжтэй байна. Эдийн засгийг эрчимжүүлэх 100 хоногийн хүрээнд Н.Алтанхуягийн танхим УИХ-аас авсан  үүрэг даалгавраа биелүүлэхээр чамгүй зовсон бол сөрөг хүчин 100 факт олохоор тархиа багагүй гашилгажээ.

Гурван сарын хугацаанд телевиз, сонин, сайт гарчиглаж, унтаж, амарч чадалгүй зохиолоо бичиж суусан МАН-ынхан товчхондоо хошин шогийн мэдрэмж өндөртэй гэдгээ тодорхой харуулав. Энд тэнд явж, олж, түүж цуглуулсан 100 фактаа намынхаа албан ёсны сайтад байршуулснаас нь харахад манай МАН-ынхан ийм хөөрхөн онигоонуудыг хаанаас олоод ирэв ээ гэж олзуурхмаар. Үүнийгээ эмхэтгэж, янзлаад хэвлэлтэд өгчихвөл үнэ хүрч гийгүүлдэггүй юм аа гэхэд олон хүний элгийг хөшөөх “эм” болж магадгүй юм. Ялангуяа хошин шогийнхон энэ 100 фактаас инээдмийн зохиолынхоо санааг олоход ч илүүдэхгүй нь байна лээ.

Дэлхийн зах зээл дэх эрдэс баялгийн уналт болон дотоодын хууль эрх зүйн алдаанаас болж, хөрөнгө оруулалтаа алдан улам бүр хүндэрсээр байгаа эдийн засгаа эрчимжүүлэхийн тулд Засгийн газар УИХ-аас 100 хоногийн хугацаатай даалгавар авсан.

Мэдээж, энэ 100 хоногт долларын ханш эрс суларч, гадаадын шууд хөрөнгө оруулалт огцом нэмэгдэхгүй гэдгийг хүн бүр гадарлаж байсан нь худлаа биш. Хамгийн гол нь энэ 100 хоногт гаргасан шийдвэр, хийсэн ажил нь эдийн засгийн хүндрэлээс гаргах итгэлцлийг бий болгох, ойлголцлын зөрүүг арилгах, цаашдаа хөрөнгө оруулалт татах, мөнгө олох боломжийг бүрдүүлэхэд чиглэгдэх ёстой юм. Түүнээс МАН-ыхны дэлгэсэн 100 фактад байгаа шиг Архангайд гарсан байгалийн гамшгийг Н.Алтанхуяг эндээс үлээгээд явуулчихсан хэрэг ердөө биш. Элсэлтийн ерөнхий шалгалтад оролцсон хүүхдүүд хангалтгүй дүн үзүүлснийг эдийн засгийг эрчимжүүлэх 100 хоногт гарсан 100 фактын нэгд багтаасан МАН-ынхныг элэглэх нэг хэцүү, өрөвдөх нэг хэцүү.

Түүнчлэн Ц.Мөнхбаярт оноосон долоон жилийг ялыг шүүх хэвээр үлдээснийг нь эдийн засгийн эрчимжүүлэх 100 хоногт гарсан нэг факт хэмээн сөрөг хүчин үзжээ. Шүүхийг хараат бус, гурав дахь засаглал гэдгийг МАН-ын удирдлагууд мэдэхгүй байна гэвэл ичгэвтэр. Гэтэл шүүхээс гаргасан шийдвэр УИХ-аас үүрэг авсан Засгийн газарт ямар хамаатай вэ гэсэн хөнгөхөн асуулт тавигдаж байна.

Мөн гахайн мялзан болон малын боом өвчин гарсан нь эдийн засгийн 100 хоног доторх 100 фактын нэгээр бичигдэж. Тэгвэл МАН-ыг Засгийн эрх барьж байх үед Н1/N1 вирус дэлгэрдэг байсан нь ямар учиртай хэрэг вэ.

 Цөөнхийн олж цуглуулсан эдийн засгийг эрчимжүүлэх 100 хоногт гарсан зуун фактаас сонирхуулбал, 

-“Засгийн газрын хуралдаанаар Улсын баяр, наадмаа тэмдэглэн, зохион байгуулахад 2,2 тэрбум төгрөг төсөвлөснөөс нэг тэрбумыг нь нээлтийн үйл ажиллагаанд зарцуулсан ч иргэд сэтгэл хангалуун байсангүй.

*Наадмын нээлтэд “Хонхны дуу” эгшиглэсэнд иргэд дургүйцэв.

*Наадмын бүжигчдийн хөдөлгөөн зөрж байлаа.

*Энхийг сахиулж яваа цэрэг эрс дүрэмт хувцастайгаа биелэгээ бүжиг хийснийг олон нийт шүүмжлэв.

*Наадмын нээлтэд буруу төрийн далбаа ашигласан. Загас нь буруу эргэсэн байсан, төрийн далбаан дээр өөр зүйл дүрсэлсэн гэх мэт шүүмжлэл тасарсангүй.

*Монголын Үндэсний телевизийн хөтлөгч Ж.Батбаяр “Сүүлийн хоёр жилийн наадмын нээлт их утга төгөлдөр боллоо” гэж зарласан ба түүний энэ улстөржсөн үгэнд олон нийт дургүйцэв.

*Хуушуур 800-2000 төг болж өсөв. /Наадмаар хуушуурыг үнэ тэнгэрт хаддагийг МАН анх удаа мэдэрсэн нь энэ бололтой/

*Бие засах газар 200-300төг болж мөн үнээ өсгөв. /Наадмын талбайд нийтийн бие засах газар өмнө нь олддогүй байв/

*Харангын Лхагвасүрэн төрийн түшээдийн өмнөхөн мориноосоо уналаа. Тэрээр 2 жил дараалан мориноосоо унасныг монголчууд “муу ёр”, “бэлэг дэмбэрэлгүй” хэмээн жигшив.

*Улсын Наадмыг улстөржүүлж, Ардчилсан Намын олигархиудын компанийн ажилчдыг жагсааж,  найруулсан Төрийн соёрхолт Д.Сосорбарам муу үнэлгээ авав”,

-Түлэнхий төвтэй болохгүй талаар Эрүүл мэндийн сайд өөрөө батлаад өглөө. Түлэнхийн төв сард 30 сая жилд 360 төгрөгийн түрээс өгч байна. /Түлэнхийн төв аль Засгийн газрын үед орон байргүй болсныг ард түмэн мэдэж байгаа болов уу/

-Улаанбаатар хот дэлхийн агаарын бохирдолт ихтэй арван хотын хоёрдугаарт орсныг олон улсынТайм” сэтгүүл дурджээ. Public Medical” тавьсан судалгаагаас харахад  Улаанбаатар хотын агаарын бохирдолт дэлхийн эрүүл мэндийн байгууллагын агаарын чанарын заалтаас долоо дахин их байсныг тогтоожээ. Улаанбаатар хотод зүрх, уушигны өвчнөөр нас барагсдын 29 хувь, уушигны хорт хавдраар нас барагсдын 40 хувь нь агаарын бохирдолтой шууд холбоотой гэж үзэв. /Үүнийг МАН-ынхан одоо л мэдэж байгаа нь харамсалтай/

-Хичээлийн хэрэгслийн үнэ 50-100 төгрөгөөр нэмэгдэв. “Оргил”, “Бөмбөгөр”, “Нарантуул” гэх 3 том худалдааны төвийн үнийн харьцуулсан судалгаагаас харахад хичээлийн хэрэгслийн жижиглэнгийн үнэ 50-100 төгрөгөөр нэмэгдэв. /МАН-ын үед 500 хүртлэх төгрөгөөр нэмэгддэг байлаа/

Энэ мэтчилэнгээр эдийн засгийн эрчимжүүлэх 100 хоногт цуглуулсан 100 факт  уншсан хүний инээдийг хүргэсэн хөөрхөн онигооны цуглуулга болсон байна лээ. Манай МАН-ынхан үнэн хошин шогийн авъяастай шүү.

www.mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.