“Лозанн-2020” залуучуудын олимпийн наадамд оролцох баг тамирчдад амжилт хүслээ

Twitter Print
2019 оны 12-р сар 30-нд 16:45 цагт
Мэдээний зураг,

Залуучуудын өвлийн олимпийн III наадам Швейцар улсын Лозанн хотноо 2020 оны 1 дүгээр сарын 09-22 өдрүүдэд 16 спортын төрлөөр зохион байгуулагдана.

Тус наадамд дэлхийн 70 гаруй орны 1800 гаруй тамирчид хурд хүч, авхаалж самбаа, оюун ухаанаа сорин өрсөлдөхөөс, Монгол улсаас Гүйлтийн цана, Биатлонын төрлөөр нийт 6 тамирчин эрхээ аван оролцох болсон билээ. Энэ нь залуучуудын өвлийн олимпийн наадмын түүхэнд Монгол улсаас хамгийн олон баг тамирчдын бүрэлдэхүүнтэй оролцох, онцлох явдал юм. Өнөөдөр/2019.12.30/ "Лозанн - 2020" Залуучуудын олимпийн наадамд оролцох, Монголын баг тамирчдад хүндэтгэл үзүүлэх ёслол Монголын үндэсний олимпийн хороо/МҮОХ/-ны хурлын танхимд зохион байгуулагдав.

Ёслолд МҮОХ-ны Ерөнхий нарийн бичгийн дарга Э.Бадар-Ууган, БСШУСЯ-ны Биеийн тамир, спортын бодлогын газрын дарга Э.Мөнхбилэг нар оролцож, баг тамирчдад амжилт хүслээ. "Лозанн - 2020" Монголын баг тамирчдын ахлагчаар МҮОХ-ны Гүйцэтгэх зөвлөлийн гишүүн Т.Амаржаргал ажиллах бөгөөд, Монголын багийн тугчаар Биатлоны тамирчин Э.Энхсайхан сонгогдсон бол, Тамирчдын тангарагыг Гүйлтийн цанын тамирчин Д.Урангоо өргөв.

Монголын биатлоны баг тамирчид одоогоор Итали улсад бэлтгэл сургуулилтаа базааж буй бөгөөд, Итали улсаас Швейцарын Лозанн хотноо шууд хүрэлцэн очиж тэмцээндээ оролцох юм.

Г.Ганаа 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.