Палестины ХАМАС бүлэглэл Израиль руу довтолж, дайн өргөжлөө

Twitter Print
2023 оны 10-р сар 08-нд 09:58 цагт
Мэдээний зураг,

Палестины ХАМАС бүлэглэл Израилийн газар нутаг руу довтолж, олон арван иргэдийг барьцаалж, 250 гаруй хүний аминд хүрч, 1800 орчим иргэдийг шархдуулжээ.

Түүнчлэн өнгөрсөн бямба гарагийн өглөө Газын зурвас Израильд олон мянган пуужингийн цохилт үзүүлсэн байна. Тель Авив дайны байдалд байгаагаа зарлаж, цэрэг татлага зарлаад байна. Израилийн тал ХАМАС бүлэглэлийнхэн Израилийн хилийн хэд хэдэн бүсээс зэрэг довтолсон хэмээн мэдээлжээ. Израилийн Haaretz сонинд бичсэнээр Палестины "Исламын жихад" бүлэглэл Израилийн олон арван цэргийг барьцаалснаа зарлажээ.

Үүссэн нөхцөл байдалтай холбогдуулан Тель Авив "Төмөр илд" нэртэй цэргийн ажиллагаагаа эхлүүлж, Газын зурвас дахь ХАМАС бүлэглэлийн объектуудад агаараас цохилт үзүүлж байна.

Газын зурваст Израильтай хиллэдэг бүс нутгуудад амьдардаг иргэд хилийн зурвасаас хол, аюулгүй газар луу нүүн шилжиж эхэлсэн байна.

Палестины Эрүүл мэндийн яамнаас мэдээлснээр Израилийн пуужингийн цохилтын улмаас Газын зурваст 232 хүн амь үрэгдэж, 1790 хүн шархджээ.

Израилийн засгийн газар Газын зурвасыг цахилгаан эрчим хүчээр хангахаа зогсооно хэмээн мэдэгдсэн байна. Тель Авив Газын зурвасын цахилгаан эрчим хүчний нийт хэрэглээний 2/3-ыг хангадаг аж. Израилиас эрчим хүч импортлоод ч иргэдээ эрчим хүчээр бүрэн хангаж чаддаггүй Газын зурвасын хувьд Израиль эрчим хүчний импорт зогсвол нөхцөл байдал улам хүндрэх төлөвтэй байна.

Үүссэн нөхцөл байдалтай холбогдуулан Израилийн Батлан хамгаалахын сайд өмнө нь цэргийн алба хааж байсан иргэдээ дахин цэрэгт дайчлах явдлыг дэмжсэн байна. Израилийн Ерөнхий сайд Беньямин Нетаньяху, "Бид дайны байдалд байна. ХАМАС бүлэглэл Израиль улс, Израилийн иргэдийн эсрэг гэнэтийн довтолгоо явууллаа. Хамгийн түрүүнд би ХАМАС бүлэглэлийнхний нэвтэрсэн бүс нутгуудыг алан хядагчдаас чөлөөлж, цэргийн дайчилгаа явуулахыг үүрэг болгосон. Дайснууд хийсэн үйлийнхээ төлөө асар өндөр үнэ төлөх болно." хэмээн мэдэгджээ.

Израилийн Эрүүл мэнлийн яамнаас мэдээлснээр ХАМАС бүлэглэлийн халдлагын улмаас 250 хүн амь үрэгдэж, 1452 хүн эмнэлэгт хүргэгдсэний 18 нь маш хүнд, 267 нь хүндэвтэр байдалтай байгаа аж. Израилийн хилийн өмнөд хэсгийн эмнэлгүүд мөн Газын зурвас дахь эмнэлгүүд шархдсан иргэдээр дүүрчээ.

Израилийн Батлан хамгаалахын яамнаас мэдээлснээр ХАМАС бүлэглэлийн цэргүүд Израилийн газар нутаг руу хуурай газар, далай болон агаараар дамжин орж иржээ. Мэргэжилтнүүд тагнуулын үйл ажиллагаагаараа дэлхийд тэргүүлдэг улс орнуудын нэг болох Израиль улсын хувьд ХАМАС бүлэглэлийн довтолгоо гэнэтийн байсан нь ХАМАС бүлэглэл довтолгоогоо маш нарийн бөгөөд маш нууц байдалд нарийн чанд боловсруулсан нь харагдаж байна хэмээн онцолж байна.

Өнгөрсөн бямба гарагийн өглөө Газын зурвасаас Израилийн нутаг дэвсгэр лүү 5 мянга орчим пуужин харважээ. Израилийн зэвсэгт хүчин ХАМАС бүлэглэлийн эсрэг хариу довтолгоо явуулахтай холбоотойгоор Газын зурвасын орчимд амьдардаг иргэдийг нүүлгэн шилжүүлж эхэлсэн байна. Бямба гарагийн орой Тель Авив болон Израилийн төвийн хот суурингууд пуужингийн цохилтонд өртсөн ба израильчууд палестинчуудын эсрэг нийт 22 байршилд тулалдаж байгаагаа мэдэгджээ.

Эх сурвалж: CNN

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.