М.Анхцэцэг: Ажлаа хийснийхээ төлөө цалингийнхаа талыг зогсоолдоо төлөх хэрэг үү

Спортын төв ордон зогсоолынхоо үнийг нэмжээ. Тодруулбал, тухайн спорт ордонд бэлтгэлээ хийдэг тамирчин байх эсэхээс үл хамааран зогсоолд машинаа байрлуулсан бол 30 минут тутамд 500 төгрөг төлөхөөр зохицуулалт хийсэн аж. 

Гэвч, энэ нь бэлтгэл сургуулилтаа спортын төв ордонд хангадаг, 500 мянган төгрөг хүрэхгүй цалин авдаг улсын шигшээ багийн тамирчдын эсэргүүцэлтэй тулгараад буй бололтой. Энэ талаар хүндийн өргөлтийн Дэлхийн аваргын хүрэл медальт тамирчин М.Анхцэцэг өөрийн фэйсбүүк хуудсаараа дамжуулан эсэргүүцлээ илэрхийллээ. 

Тэрбээр "За нэг юм хэлэхгүй бол болохгүй нь ээ. Миний бие хүндийн өргөлтийн улсын шигшээ багийн тамирчин бөгөөд спортын төв ордонд бэлтгэл сургуулилтаа хангадаг. Насанд хүрэгчдийн шигшээ багийн цалин 380.000 байж байгаад төсвийн байгууллагын цалин нэмэгдэхэд 406.000 болсон. Залуучуудынх биднээс 100.000 төгрөгөөр бага. Өмнө нь бид ажилдаа ирээд явахдаа спортын төв ордны авто зогсоолд 1000 төгрөг тамирчин гэж хэлж тушаагаад гардаг байлаа. Гэтэл сая 12-р сарын эхээс 30 минут тутамд 500 төгрөг авна гэх юм. Өдөрт нэг бэлтгэл хийгээл гарахад 3000-3500 төгрөг. Хоёр бэлтгэл хийхэд 6000-7000 төгрөгийг нэг өдөрт ажлаа хийснийхээ төлөө тушаах нь.

Заримдаа 2 бэлтгэлийн хооронд зааландаа амрахад 10,000 төгрөг тушаа гэнэ. Сард дунджаар 150,000-200,000 өгнө. Ойр хавьд зогсоол байхгүй. Бид тэгээд улсын шигшээ багт харъяалагдаж цалин авдаг хэрнээ тал цалингаа ажлын газрын зогсоолдоо төлөх хэрэг үү? Бидний цаана цалин мөнгөгүй спортод хайртай зүтгэсээр байгаа тэр олон хүмүүс яах вэ? Энэ арай дэндүү биш үү? Мэддэг байгууллага, албан тушаалтнууд байвал бор зүрхээрээ бэлтгэлээ хийгээд явж байгаа тамирчин дасгалжуулагч нарынхаа халаасыг битгий ухаач гэж та нараас хичээнгүйлэн гуйя !!!" гэсэн байна. 

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.