ОХУ Украин руу халдсан явдалтай холбоотойгоор Европын аюулгүй байдал, Атлантын цэргийн эвслийн бүтэц бүрэлдэхүүнд өөрчлөлт хийх шаардлагатай болсныг барууны мэргэжилтнүүд онцолсоор байгаа билээ.
Тэгвэл Финлянд Улс НАТО-гийн гишүүнээр элсэх түүхэн шийдвэрээ гаргалаа. Орос-Украины дайныг олон орон том гүрэн жижиг улс орны дотоод асуудал, нутаг дэвсгэрийн бүрэн бүтэн байдалд оролцож, халдаж буйг эрс буруушаав. Финляндын ерөнхий сайд Санна Марин "Финляндын аюулгүй байдал, Балтийн тэнгисийн бүс нутаг, Хойд Европын тогтвортой байдал, аюулгүй байдлыг нэмэгдүүлэх болно" гэж ард түмэндээ мэдэгдэл хийлээ.
Тэгвэл Кремлийн зүгээс Финлянд улс НАТО-д нэгдэх нь ОХУ-ын аюулгүй байдалд заналхийлсэн үйлдэл болох бөгөөд ОХУ үүнд хариу арга хэмжээ авах болно хэмээн мэдэгдээд байгаа юм. Финляндын Ерөнхийлөгч болон Ерөнхий сайд нар хамтарсан мэдэгдэлдээ, "НАТО-гийн гишүүн орон болсноор Финлянд улсын аюулгүй байдал бэхжиж, Финляндыг гишүүн орноороо хүлээн авснаар Умард Атлантын Гэрээний байгууллага ч мөн хүчирхэгжинэ. Финлянд улс НАТО-гийн гишүүн орон болох хүсэлтээ түргэн хугацаанд өгөх ёстой гэж үзэж байна. Уг шийдвэрийг гаргахад шаардлагатай алхмуудыг ойрын өдрүүдэд хийх байх гэж найдаж байна." гэжээ. Уг мэдэгдэл гарсны дараа ОХУ-ын Гадаад харилцааны яам "Финляндын гадаад харилцааны бодлого огцом өөрчлөгдсөнийг" цохон тэмдэглэж, "Хельсинки ийм алхам хийх нь ямар үр дагавартайг мэддэг байх ёстой." хэмээн ОХУ-ын зүгээс хариу арга хэмжээ авахыг анхааруулсан билээ.
Түүнээс гадна Финлянд НАТО-д элсэх нь Умард Европын аюулгүй байдлын гол тулгуур болсон ОХУ-Финляндын харилцаанд ноцтой хохирол учруулахыг Кремлийн зүгээс онцолжээ. "ОХУ-ын зүгээс хариу алхам хийх болно. ОХУ-ын үндэсний аюулгүй байдалд заналхийлж буй явдлыг зогсоохын тулд цэрэг техникийн болон өөр бусад төрлийн хариу арга хэмжээг авах болно." хэмээн ОХУ-ын Гадаад харилцааны яамнаас мэдэгджээ. ОХУ-ын Ерөнхийлөгч Владимир Путины хэвлэлийн төлөөлөгч Дмитрий Песков Финлянд НАТО-д элсэх нь дэлхийн аюулгүй байдалд ямар ч нөлөө үзүүлэхгүй хэмээн мэдэгдсэн байна. Тэрээр, "Өмнө нь хэлсэнчлэн НАТО өргөжин тэлсэнээр дэлхий илүү тогтвортой, аюулгүй болно гэж байхгүй." хэмээн ОХУ-ын авах хариу арга хэмжээ нь НАТО-гийн ОХУ-ын хилийн ойролцоо ямар үйл ажиллагаа явуулахаас мөн уг үйл ажиллагаа нь ОХУ-ын хилтэй хэр ойрхон эсвэл хол байхаас хамаарна гэжээ.
ОХУ Украин руу довтлохоох өмнө Финляндын иргэдийн 30 орчим хувь нь НАТО-д элсэхийг дэмжиж байсан бол ОХУ Украин руу халдсанаас хойш уг үзүүлэлт 80 хувь болтлоо өсчээ. Финляндын засгийн газрын НАТО-д элсэх хүсэлтийг эхлээд Финляндын парламент батлах ёстой ба энэ талаар НАТО-гийн Ерөнхий нарийн бичгийн дарга Йенс Столтэнберг, "Ерөнхийлөгч Саули Нийнисто болон Ерөнхий сайд Санна Марин нарын НАТО-д түргэн хугацаанд элсэх хүсэлтэй байгаагаа илэрхийлсэн хамтын мэдэгдлийг таатай хүлээн авч байна. Тусгаар тогтносон улсын энэ шийдвэрийг НАТО хүндэтгэж байна. Финляндыг байгууллагадаа халуун дулаанаар хүлээн авахад бэлэн байгаагаас гадна гишүүнчлэлийнх нь асуудлыг саадгүй шийдэхийг хичээх болно." хэмээн мэдэгджээ.
Финлянд улсын хувьд батлан хамгаалах салбартаа маш их хөрөнгө мөнгө зарцуулдгаас гадна хуулиндаа насанд хүрсэн бүх эрэгтэйчүүдийг цэргийн албанд татах тухай заасан байдаг. Үндэсний аюулгүй байдал, батлан хамгаалах салбартаа өндөр ач холбогдол үзүүлдэг Финлянд улс НАТО-д элссэнээр НАТО-гийн ОХУ-ын түрэмгийллийн эсрэг зогсох хүч чадал мэдэгдэхүйц нэмэгдэнэ хэмээн НАТО-гийн гишүүн орнууд үзэж байна.
Умард Европын Норвеги, Дани болон ОХУ-тай хиллэдэг Эстони, Латви, Литва зэрэг орнууд хэдийн НАТО-гийн гишүүн улс бөгөөд НАТО өргөжин тэлэх нь үндэсний аюулгүй байдалд заналхийлсэн явдал гэж Москва үздэг.
Тэгвэл Финланд, Швед улс НАТО-д элсэх нь ОХУ-ын уур бухимдлыг нь төрүүлэх нь гарцаагүй юм. Украин улс НАТО-д элсэх хүсэлт тавьсан нь ОХУ Украин руу халдах болсон гол шалтгаануудын нэг гэдгийг ч ОХУ-ын Ерөнхийлөгч Владимир Путин нэг бус удаа дурдаж байсан билээ.
Эх сурвалж: Reuters
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
