Шанхайн хөл хорио 6 дахь долоо хоногоо үргэлжилж байна

Twitter Print
2022 оны 05-р сар 10-нд 13:00 цагт
Мэдээний зураг,

Коронавирусын цар тахлын улмаас 6 дахь долоо хоногоо хөл хорионд орж, бухимдсан Шанхай хотын иргэд эрх баригчдын цар тахалтай тэмцэх бодлогыг буруушааж байна.

Шанхай хотын иргэдийн нийгмийн сүлжээнд бичиж нийтэлж байгаагаар эрх баригчид коронавирусын халдвартай байж болзошгүй иргэдийг хүчээр тусгаарлаж, орон сууцны хотхонд коронавирусын халдварын зөвхөн нэг тохиолдол бүртгэгдэхэд тухайн хотхоны бүх оршин суугчдыг тусгаарлаж байгаа аж.

Хятадын эрх баригчид нийгмийн сүлжээнд тавигдсан зураг бичлэгүүдийг устгасаар байгаа ч иргэд Хятадын эрх баригчдын өөрсдийнх нь хууль журмаа дагах ёстой хэмээн ярьж байсан бичлэгүүдийг нийтэлж, коронавирусын цар тахалтай мөн адил хүний эрхийг зөрчихгүйгээр тэмцэх ёстойг онцолж, одоогийн баримталж буй бодлогыг нь эсэргүүцэж буйгаа илэрхийлсээр байна.

Өнгөрсөн долоо хоногт Хятадын Ерөнхийлөгч Си Жиньпин коронавирусын цар тахалтай тэмцэх бодлогоо өөрчлөхгүй хэмээн мэдэгдэж, уг бодлогыг тууштай дагахыг албан тушаалтнуудад үүрэг болгож, уг бодлоготой холбоотой ямар ч шүүмжлэл, эргэлзээг хүлээн авахгүй гэдгийг анхааруулсан билээ.

Өнгөрсөн амралтын өдрүүдээр Шанхай хотын 16 дүүргийн 4 дүүргийнх нь оршин суугчдад хүргэлтээр хоол авах, гэрээс гарахыг нь хориглосон нь иргэдийн бухимдлыг төрүүлсэн байна.

Түүнчлэн халдвар хамгааллын ажилчид иргэдийн гэрт зөвшөөрөлгүй орж, ариутгалын уусмал цацаж буй, хөрш нь коронавирусын халдвартай учраас бусад оршин суугчдыг ч мөн адил тусгаарлаж буй бичлэгүүд нийгмийн сүлжээгээр тархжээ.

Өнгөрсөн 4-р сард Азийн эдийн засгийн төв гэгддэг 25 сая хүн амтай Шанхай хотын Пудон дүүргийн оршин суугчид болон халдвар хамгааллын ажилчид хооронд мөргөлдөөн үүссэн тохиолдол ч гарсан юм.

Шанхай хотод бүртгэгдэж буй коронавирусын халдварын тохиолдлууд 10 дахь өдрөө дараалан буурч байгаа ч хөл хорионы дэглэм үргэлжилсээр байна.

Нийслэл Бээжин хотод Шанхай хоттой харьцуулахад коронавирусын халдварын тохиолдлын тоо харьцангуй бага бүртгэгдэж байгаа ч эрх баригчид оршин суугчдыг гэрээсээ ажиллахыг үүрэг болгож, нийтийн тээврийн хөдөлгөөнийг хязгаарлаад байна.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.