Э.Бат-Үүл: Тэр үед Х.Баттулга, С.Эрдэнэ нарыг хөөсөн бол нэг нь Ерөнхийлөгч, нөгөө нь АН-ын дарга болох тухай мөрөөдөх ч эрхгүй үлдэх байсан юм

Twitter Print
2021 оны 09-р сар 16-нд 12:47 цагт
Мэдээний зураг,

Манай нам дотроо хагаралтай байгааг Монгол улсын иргэн бүр харж, бас мэдэж буй. Харин, энэ хагарал даамжирсаар өдгөө, Ардчилсан Нам “орших уу, эс орших уу” гэдэг хязгаарт хүрч ирээд байгааг олон хүн мэдэхгүй. Тэр бүү хэл, намын олон гишүүд, цөөнгүй манлайлагчид хүртэл асуудал иймдээ тулсныг сайтар ойлгоогүй яваа мэт санагдах юм!

Ардчилсан хувьсгалаас хойших 30 жилд; Монгол Улсын үндэсний эрх чөлөө, жинхэнэ тусгаар тогтнолыг түших улс төрийн хоёр багана нь “Монголын ХХ зууны түүхийн дуудлагаар гарч ирсэн Ардчилсан Нам болон МАН юм” хэмээх “далд ухамсар” манай нийгмийн улс төрийн харилцааг тогтоон барьж ирсэн байдаг. Ардчилсан Нам, МАН хоёрын хооронд үзэл санааны том зөрүү, засгийн эрх мэдлийн төлөө тус тусын хүчтэй амбиц байсан хэдий ч хэзээд “модон сэлмээр л байлддаг” байв. Сонгуулиар ялсан нэгэндээ засгийн эрхийг тайван замаар шилжүүлэн өгч, бие биеийнхээ засаглах эрхийг хүлээн зөвшөөрдөг байв. Нэн чухал нь, хэн хэнийхээ оршихуйн эрх, түүний ач холбогдлыг гүнзгий ухамсарлан, хүндэтгэн үзсээр ирсэн. Гэтэл, Амарбаясгалант тэргүүтэй МАН-ын шинэ үеийн удирдлага гарч ирснээс хойш “хоёр баганын зарчим” хөсөрдөж, манай намыг “чадвал устгах” зорилготой үйл ажиллагаа, явуулгууд эхэлсэн. Хамгийн харамсалтай явдал нь тэдний гар хөл бологсод манай нам дотор бий болоод, улам бүр хүчийг авахдаа хүрсэн байна. Ардчилсан Намыг “хорлон сүйтгэх” нь МАН-д “зардаг” бизнес болж байгаа юм биш биз?! гэж хардмаар, хармаар явдлууд сүүлийн үед манай нам дотроос олон гарах болсон. Үүний нэг тод жишээ нь дөнгөж нөхөн сонгууль эхлэх үетэй зэрэгцүүлэн, УИХ-ын гишүүн Ц.Туваан тэргүүтэй хэсэг журмын нөхдийг хөөсөн, зориудын санаатай хорон акц мөн болно. Сонгуульд эв нэгдэл хамгийн чухал гэж мэдсээр атлаа шүү!

Коммунист, фашист намуудад л “гишүүнээ хөөнө” гэсэн бүдүүлэг ойлголт байдаг юм. Харин, ардчилсан намууд, тэр тусмаа баруун төвийн үзэлтэй намуудад, хүний улс төрийн эрхийг намын удирдлага нь үгүйсэгдэг балай явдал үгүй билээ. Зөвхөн үзэл санаанаасаа “урвасан” тохиолдолд, гишүүнийхээ улс төрийн карьерийг дэмжихгүй гэдгээ илэрхийлэх төдий л арга хэмжээ авдаг!

2016 оны намрын Үндэсний Бодлогын Хорооны Хурлын хуралдаанаар Ерөнхийлөгч асан Х.Баттулга, намын дарга асан С.Эрдэнэ нарыг Ардчилсан Намаас хөөх тухай шийдвэр гаргах гэж тухайн үеийн удирдлага муйхарлаж байхад нь миний бие зад эсэргүүцэж таслан зогсоосны гол шалтгаан бол, миний ардчилсан баруун төвийн үзэл маань байсан бөлгөө. Тэр үед Х.Баттулга, С.Эрдэнэ нарыг хөөсөн бол нэг нь Монгол Улсын Ерөнхийлөгч, нөгөө нь Ардчилсан Намын дарга болох тухай мөрөөдөх ч эрхгүй үлдэх байсан юм. Өдгөө МАН-ын даргын зөвлөх болоод байгаа Х.Баттулга, Тувааныг “хөөсөн” С.Эрдэнэ хоёр тэр өдрийг тод санах ёстой!

Манай намд, жирийн гишүүн байхдаа ардчилсан үзэлтэй, дарга болохоороо дарангуйлагч болчих гээд байдаг лидерүүд цөөнгүй байсан. Эрх мэдэл дагаж өөрчлөгддөг үзэл санаа бол үзэл санаа биш юм. Тэр бол зүгээр л жижигхэн дүр гаргагч карьерист төдий этгээдийн байгаа царай юм. Ийм, үзэл санаа төлөвшөөгүй карьеристуудаас болж манай нам хагараад, одоо мөхлийн ирмэг дээр ирээд байна! Ардчилсан Нам мөхвөл Монголын ардчилал хамгаалагчгүй үлдэнэ. Монголын ардчилал хамгаалагчгүй үлдвэл Ардчилал устана. Ардчилал уствал Монгол орон үндэсний эрх чөлөө-тусгаар тогтнолоо алдана. Монгол хүн бүр өөрийн эрхээр амьдрах эрх чөлөөгөө алдана. Ингэж бодоод үзвэл, Монгол болон монголчууд Ардчилсан Намаа алдвал ямар гай түйтгэр болох нь ойлгомжтой.

Ардчилсан Намын ачаар л Монгол Улс үндэсний эрх чөлөө, тусгаар тогтнолоо жинхэнэ ёсоор олж авсан. Ардчилсан Намын ачаар л монгол хүн, бусдын эрхээр “жаргах” бус, өөрийн эрхээр амьдрах хувьтай болсон. Тийм болохоор Ардчилсан Нам Монголын түүхэнд “алтан үсэг”-ээр бичигдэнэ.

Ардчилсан Намын гишүүд ээ! Ардчилсан Нам түүхэнд алтан үсгээр бичигдчихээд мөхөхдөө тулах ёсгүй. Ардчилсан Нам оршин байвал эрх чөлөөт Монгол оршин байна. Ардчилсан Нам уствал эрх чөлөөт Монгол мөхнө!

Тийм учраас Ардчилсан Намынхан бид өөр хоорондын гомдлоо хойш тавьж, зоригоо чангалан нэгдэж, намаа аврах хэрэгтэй! Монголдоо буян, ачаа түгээсээр амьдарцгаая! Бид ийм хувь ерөөлтэй байх ёстой улс!Түүх бидэнд оноосон хувь ерөөлийг гутаах эрх бидэнд үгүй!

Нэгдэцгээе! Бид нэгдсэн үедээ ямагт ялж байсан юм шүү! Намаа нэгтгэх энэ цагийн түүхэн хариуцлага Цогтгэрэл, Тулгат хоёрт очсон! Манай хоёр залуу лидерүүд санаачлагыг гартаа авах цаг нь болсон байна!

Ардчилсан Намыг минь хөх тэнгэр ивээх болтугай!

Монгол Улсын Баатар, АН-ын гишүүн С.Бат-Үүл

 

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Иргэн

      (70.93.178.224) 2021-09-18 22:47
      • 0
      • 0

      AH ын цагаан толгойт юу гэж мөөрч ориллооч та нарын мөс чанар чадавхийг хангалттай танисан өөрийн бурууг бусдаас хайдаг өөрийн толгой дээрх эвэрээ хараагүй бж бусдын толгой дээрээс өвс хардаг монголын ардчлагчид монголд бсан бүх үйлдвэрийг хувааж залгигчид ардчлагчид биш анархистууд талбай дээр өөрийн намын нөхөрт үсдүүлчээд хүрэлсүх манай намыг устгаж чадахгүй гэж хашгирдаг намынхнаасаа айсан уу яасан эсвэл тал зассан уу

      Хариулах

    • Бат

      (202.55.188.93) 2021-09-17 11:54
      • 0
      • 0

      Хүн хоббигоороо спортын олимпизмын зөвлөх хиихэд Монгол Улсад хэрэгтэй. Энд улс төр түй ч хамаагүй бөгөөд түүнийг ойртуулах ч үгүй гэдгииг та ойлгож бж мушгидаг нь яаж бгаа юм.

      Хариулах

    • Зочин

      (202.21.109.35) 2021-09-16 21:11
      • 0
      • 1

      Ардчилсан хувьсгал хийхдээ МАХН-ыг татан буулгаж бүх намууд нэг гараанаас эхлээгүй нь нэг буруу, хүчээ алдаагүй МАХН-ыг сонгуульд ялахгүй болохоор үзэл баримтлал хамаагүй баахан намуудыг нэгтгэж шуудайд хийсэн үхрийн эвэр шиг болгосон бас нэг буруу, хальт засгийн эрх авсан ч анхныхаа тэмцлийн зорилгоосоо ухарч авилга хээл хахууль тусгай хангамжийг МАХН-с ч дутахгүй цэцэглүүлж ард түмний итгэлийг алдсан бас буруу... Одоо МАН, АН ямар ч ялгаагүй шахуу болсон. Олигархиуд цүнх баригчдаар дүүрсэн

      Хариулах