УИХ-ын гишүүн Б.Энхбаяр: Нэг сумын иргэдийн тал нь тахир дутуугийн групп тогтоолгон, тэтгэмж авч байна

Twitter Print
2020 оны 10-р сар 09-нд 12:28 цагт
Мэдээний зураг,

УИХ-ын өчигдрийн чуулганы хуралдаанаар УИХ-ын гишүүн Б.Энхбаяр ЭМД-ын сан үр ашиггүй зарцуулагдаж байгаа талаар дурдаад үүнд хяналт, шалгалт хийхийг ЭМ-ийн сайд Т.Мөнхсайханаас хүслээ.

УИХ-ын гишүүн Б.Энхбаяр: Нэг сумын иргэдийн тал нь тахир дутуугийн групп тогтоолгон, тэтгэмж авч байна

Хөнгөлөлттэй эмийг 10 гаруйн жилийн өмнө хоёрхон эмийн сангаар олгодог байсан. Шуудхан хэлэхэд энэ нь мөнгө угаадаг байсан гэсэн үг. Энэ чиглэлд хэрэгжүүлэх санал санаачлагыг би дэмжинэ.

ЭМД-ын үндэсний зөвлөлийн дарга /Эрүүл мэндийн сайд Т.Мөнхсайхан/ нь сангаас зарцуулах хөрөнгө мөнгө зөв зүйтэй зарцуулагдаж байна уу гэдгийг хянах ёстой. Нэг үгээр иргэдийн эрх ашгийн үүднээс үүнд маш нээлттэй, хяналттай болгох юм. Ялангуяа ЭМД-аас олгогдож байгаа групп, тэтгэмжийн асуудалд тусгайлан хөндлөнгийн шалгалт оруулаасай гэж хүсэж байна. Монгол улсад нийт хэдэн хүн группт байдаг, яг үнэн эсэхийг газар дээр нь шалгаж, дүгнэлт гаргах шаардлагатай байна.

Нэг аймгийн нэг сумын иргэдийн тал нь тахир дутуугийн групп, тэтгэмж авч байна. Бүхэл бүтэн нэг сумын тал нь тахир дутуу байх боломжгүй. Хэрэв тийм бол энэ нь үндэсний хэмжээнд эмгэнэлтэй зүйл. Үүний цаана үгсэн хуйвалдан худал дүгнэлт гаргаж,  ЭМД-ын санг үр ашиггүй зарцуулж байна гэсэн үг. Тиймээс үүнийг бодитой эсэхийг та өөрөө шалгаж үзэх хэрэгтэй байна.

Эрүүл мэндийн сайд Т.Мөнхсайхан: Зарим аймгийн 60 хувь нь хүртэл группт орчихсон, халамжийн мөнгө авдаг

Хяналтын тогтолцоог бид маш сайжруулах ёстой. Манай эмч нар групп тогтоон, олгогдох мөнгийг нь Нийгмийн халамжаас олгодог. Бид аймгуудад тооцоо судалгаа хийж үзсэн.  Зарим аймгийн 60 хувь нь хүртэл группт орчихсон, халамжийн мөнгө авдаг хавтгайрсан байдал байна.

Нийт ард иргэдийн эрүүл мэндийн нэгдсэн бүртгэлийн цахим санг бий болгохоор ажиллаж байна. Хэрэв энэ мэдээллийг цуглуулчихвал бид үүнийг хяналтдаа авах боломжтой болно. Мөн шалгалт хийх тусгайлсан хяналтын багийг ажиллуулж, сэжигтэй тохиолдол бүрт нь нягталж, группт орох шаардлагатай хүн эсэхийг тогтоон, тухайн мөнгийг зөв зохистой зүйлд зарцуулах боломж бүрдэнэ.  ЭМ-ийн нэгдсэн санг 2021 оны нэгдүгээр сарын 1-нээс ажиллуулж эхэлнэ.

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.