ОХУ-ын Төрийн Дум болон орон нутгийн засаг захиргааны сонгууль өнгөрсөн баасан гарагаас эхлэн 3 өдөр үргэлжилж, ням гарагийн оройн 8 цагт санал хураах байрууд хаалгаа барьж, саналын хуудсуудыг тоолж эхлээд байна.
Сонгуулийн ерөнхий хорооноос мэдээлснээр нийт саналын хуудаснуудын 33 хувийг тоолсон ба урьдчилсан байдлаар Нэгдмэл Орос нам 45 хувиар тэргүүлж байна. ИНСОМАР болон Оросын Риа мэдээллийн агентлагаас явуулсан экзит поллоор Нэгдмэл Орос нам сонгуульд 45 хувиар ялалт байгуулна гэж гарчээ.
Саналын хуудаснуудыг тоолж эхэлснээс хойш хэдхэн цагийн дараа Нэгдмэл Орос нам сонгуульд ялалт байгуулснаа мэдэгджээ.
Нэгдмэл Орос намын гишүүн Андрей Турчак Нэгдмэл Ором намын гишүүд дэмжигчдэд сонгуульд шудрага бөгөөд цэвэр ялалт байгуулсан явдалд баяр хүргэжээ.
Санал хураалтын дүнгээр Ерөнхийлөгч В. Путины нам Төрийн Думд дахин олонх болох нь тодорхой ч Нэгдмэл Орос нам 2016 оны сонгуультай харьцуулахад дэмжигчдийнхээ ойролцоогоор 1/5-ийг алдсан байна. Иргэдийн амьжиргааны түвшин болоод сөрөг хүчний тэргүүн А. Навальныйгийн Оросын эрх баригчдыг авлига хээл хахуулийн хэрэгт буруутгасан зэрэг нь В. Путины намын нэр хүнд унахад нөлөөлсөн гэж ажиглагчид үзэж байна.
Нөгөөтэйгүүр Ерөнхийлөгч В. Путинг барууны улс орнуудын эсрэг хатуу байр суурь илэрхийлж, Орос үндэстний бахархлыг сэргээсэн гэж үзэх иргэд цөөнгүй байна. Оросын Төрийн Думын 450 суудлын төлөө 14 намын гишүүд өрсөлдөж байгаа ба Оросын зарим хотуудад саналын хуудсуудыг машинаар тоолж байгаа аж.
Түүнээс гадна энэ удаагийн сонгуульд Европын Аюулгүй байдал болон Хамтын ажиллагааны байгууллага 1993 оноос хойш анх удаа ОХУ-д явагдаж буй сонгуулийн үйл ажиллагаанд ажиглагчаар оролцоогүй юм. Сонгогчдын эрхийг хамгаалах ашгийн бус Голос байгууллага энэ удаагийн сонгуулиар 4500 гаруй зөрчил бүртгэжээ.Оросын эрх баригчид Голос байгууллагыг гадаадын тагнуулын байгууллага хэмээн тодорхойлсон ба Оросын Дотоод хэргийн яам сонгуулийн үеэр ямар нэг ноцтой зөрчил бүртгэгдээгүй гэдгийг онцолжээ. Голос байгууллагаас мэдээлснээр иргэдээс олон тооны санал гомдол ирсний дотор ажил олгогчид ажилчдаасаа саналаа Нэгдмэл Орос намд өгөхийг шахаж шаардсан гэх зөрчлүүд бүртгэгджээ.
Түүнээс гадна Оросын сөрөг хүчнийхний өмнөх сонгуулийн үеэр ашиглаж байсан "Ухаалаг сонгууль" нэртэй аппликейшнийг ОХУ-ын Төрийн Думын сонгууль эхэлсэн өдөр Apple болон Google платформоос хассан нь сөрөг хүчнийхний бухимдлыг төрүүлсэн юм.
Хэрэгчлэгчдэд эрх баригч намын нэр дэвшигчийг өөр ямар намын нэр дэвшигч саналаар давж чадахыг хэлж өгдөг "Ухаалаг сонгууль" аппликейшнийг платформоосоо хасаагүй тохиолдолд асар өндөр торгууль төлөх шаардлагатай болно хэмээн Оросын эрх баригчид Apple болон Google компанид анхааруулсан аж. Сөрөг хүчний тэргүүн Алексей Навальный болон Леонид Волков нар дээрх хоёр компанийг "Кремлийн сүрдүүлгэнд автсан" хэмээн тодорхойлжээ.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
