Мах магнаг болно гэдэг шиг Оросод байдал хүндэрчээ

Twitter Print
2014 оны 10-р сар 03-нд 09:56 цагт
Мэдээний зураг,

Монголд өнөөдөр мах асар өндөр үнэтэй байхад Буриадууд нөөшилсөн мах илүүд үзэж, Халимагууд харин цагаан хоолтон болох дээрээ тулж байна уу? Оросууд ийн гайхаж байна гэнэ. Гадаад улс орнуудаас тавьж байгаа эдийн засгийн хориг арга хэмжээний уршгаар сүүлийн үед дэндүү их "махан хүнстэн" Оросуудын хувьд уг хүнсний бүтээгдэхүүн нийгмийн онцгой ач холбогдолтой хүнсний бүтээгдэхүүн болж байгаа аж. Өдрөөс өдөрт үнэ хадах болсон мах, махан бүтээгдэхүүний хангалт, хүртээмж Буриад, Халимаг, Якутад бүр онцгой асуудал дагуулж байгаа бол Оросын зарим бүс нутгуудад Монголоос мах авах найдвар ихээхэн эргэлзээтэй болж байгааг хэвлэл мэдээллүүд онцолдог болжээ.

Нөгөө их найдвар тавьж байгаа мах нь гэтэл Монголд өнөөдөр дундаж орлоготой иргэд хүчрэхээргүй өндөр үнэтэй, тухайлбал ганц  килограмм үхрийн мах 7500-8000 төгрөг,  хонины мах 8000-10000 байгааг тэмдэглэсэн байх аж. 

 Якутын Якутия инфо цахим хуудсанд мэдээлснээр  тус бүс нутагт хүнсний бүтээгдэхүүний үнэ саяхан бас дахин өсөж, орон нутгийн зах зээл дээр үхрийн цул мах 600 рубль хүрсэн байна. Якутын хөдөө аж ахуйн яамны сайд Иван Слепцов, мах, загасны өндөр үнийн жишгийг тайлбарлахдаа, Якутын хүнсний бүтээгдэхүүн гаднаас тээвэрлэж авчирсан бус, экологийн цэвэр, чанартай бүтээгдэхүүн учир үнэ цэнээ зах зээлд тогтоодог аж.

Буриадад мөн үхэр, гахайн мах, утсан хиам, зайдасны үнэ өсчээ. Гэхдээ нөөшилсөн махны үнэ бага зэрэг буурсан тухай ИА UlanMedia цахим хуудас мэдээлжээ.

Харин ганц долоо хоногийн дотор (есдүгээр сарын 22-29-ны хооронд) үхрийн мах 0,3 хувь өсөж 247,07 рубль болсон бол гахайн мах  1,4 хувиар 268 рубльд хүрсэн байна. Тэрчлэн тахианы хөлдөөсөн махны үнэ 0,5 хувиар өсөж 149,96 рубль, зайдас 0,6 хувь (280,71 рубль). Үхэр, гахайн нөөшилсөн жигнэсэн мах 0,3 хувь (78,74 рубль) болсон нь харин Монголын бизнес эрхлэгчдийн анхаарлыг татаж болох мэдээлэл байж болох юм.

Буриадын хэвлэл мэдээллээр тэмдэглэснээр энэ оны есдүгээр сарын нэгнээс 15-ны хооронд тус улсын нутаг дэвсгэрт 90 мянган тонн мах, махан бүтээгдэхүүн орж ирсэн аж. Энэ янзаар бол Буриадууд юун бууз, хуушуур болж “тансаглах”, тушенкоо л идэж суухаас өөр аргагүй болж байгаа гэнэ. 

Энэ зэрэгцээ мах үйлдвэрлэлийн гол түшиц бүс гэж үздэг Халимаг улсад бүр хөлдөөсөн загас, гахайн мах сүүлийн долоо хоногт гэхэд дөрвөн хувиар өссөн болохыг Интерфакс агентлаг мэдээлсэн байна.

Өнгөрсөн сарын сүүлийн долоо хоногт үхрийн мах 1,3 хувь (оны эхнээс 15,3%), хонины мах – 2,7 хувь ( 6,3% өссөн), гахай – 4,3 хувь ( 19,5% өссөн), хөлдөөсөн загас – 4,1 хувь (20,9% өссөн) тус тусын үзүүлэлт гарчээ. Тэрчлэн цөцгийн тосны үнэ 0,3 хувиар буюу оны эхнээс 5,6 хувь өссөн үнэтэй болсон аж.

Халимагийн хэвлэл мэдээллүүдийн наргиан болгон тохуурхаж байгаагаар тус улсын засгийн газар ард иргэдээ цагаан хоолтон болгох бодлого баримталж эхэлсэн нь тодорхой, хүнсний дэлгүүрүүдийн лангуун дээрээс Халимагийн үхрийн алагласан алдартай “мраморный” мах олж авах аргагүй болсон гэнэ.

Сэтгүүлч Л.Отгонбат

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.