Өнгөрсөн ням гарагт шинэ үндсэн хуулийн тухай олон нийтийн санал асуулга болж өндөрлөжээ. Шинэ үндсэн хуулийн дагуу тус улсын одоогийн Ерөнхийлөгч Шавкат Мирзиёев төрийн эрхэнд 2040 он хүртэл суух эрхтэй болох аж.
Санал хураах байрууд өглөөний 8 цагт онгойж, оройны 8 цагт хаалгаа барьсан ба санал асуулгын дүнг тус улсын сонгуулийн ерөнхий хороо 10 хоногийн дотор зарлана гэдгээ мэдэгдсэн байна.
2016 онд Узбекистаны удирдагч Ислам Каримовыг өөд болсны дараа Ерөнхийлөгчөөр томилогдсон 65 настай Ш. Мирзиёев шинэ үндсэн хууль батлах нь далайд гарцгүй, 35 сая хүн амтай Узбекистан улсын төр засаглалын тогтолцоо, амьдралын чанар зэргийг сайжруулахад томоохон нөлөө үзүүлнэ хэмээн үзэж байгаа бол шинэ үндсэн хуулиас хамгийн их хожих хүн бол Ш. Мирзиёев өөрөө хэмээн ажиглагчид үзэж байна.
Шинэ үндсэн хуульд ерөнхийлөгчийн бүрэн эрхийн хугацааг 5-аас 7 жил болгон сунгаж байгаа нь Шавкат Мирзиёевт 2040 он хүртэл хоёр ч удаа төрийн тэргүүний алба хаших боломжийг олгох аж. Тэрээр гэр бүлийнхээ гишүүдийн хамтаар нийслэл Ташкент хотод саналаа өгсөн байна.
Санал хураах байрууд онгойсноос хойш 7 цагийн дараа сонгогчдын ирц 73.17 хувьд хүрсэн ба засгийн газрын зүгээс олонд танигдсан алдартай хүмүүсийн тусламжтай шинэ үндсэн хуулийг дэмжиж саналаа өгөхийг иргэдэд уриалж, жагсаал цуглаан, концерт зохион байгуулж, Ташкент хот даяар олон нийтийн санал асуулгад идэвхтэй оролцохыг уриалсан самбарууд байршуулжээ.
И. Каримовыг өөд болсны дараа Ш. Мирзиёев хэд хэдэн өөрчлөлт шинэчлэлт хийсэн ба хөдөлмөрийн мөлжлөгийг зогсоох ажлыг эхлүүлсэн ч тус улсад хүний эрхийг ноцтой зөрчсөөр, улс төрийн сөрөг хүчнийг хүлээн зөвшөөрөхгүй байсаар байгааг хүний эрхийг хамгаалагчид онцолсоор байгаа юм.
Өнгөрсөн онд Каракалпакстан өөртөө засах бүс нутагт болсон жагсаалын үеэр 21 хүн амиа алдсан юм. Жагсаалын үеэр иргэд амиа алдсан нь эрх баригчид жагсагчдын эсрэг хүч ашигласантай холбоотой хэмээн хүний эрхийн мэргэжилтнүүд үзэж байгаа юм.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
