Сөүл вакцины хомсдол үүссэн асуудлыг шийдвэрлэхэд АНУ тусална гэж найдаж байна. БНСУ-ын Гадаад хэргийн сайд Чон Ы Ён улсад нь коронавирусын эсрэг вакцины хомсдол үүссэн асуудлыг шийдвэрлэхэд Вашингтоны зүгээс тусална гэж найдаж буйгаа илэрхийлжээ.
Тэрээр, "БНСУ өнгөрсөн жил АНУ-д тусалсны хариуд АНУ бидний коронавирусын эсрэг вакцинтай холбоотой үүссэн асуудлыг шийдвэрлэх явдалд туслах байх гэж найдаж байна. Бид харилцан бие биедээ хэрхэн туслах талаар ярилцаж байгаа." гэжээ. Түүний хэлж байгаагаар Сөүл өнгөрсөн жил АНУ-д 2 сая амны хаалт, коронавирусыг илрүүлэх оношлууруудыг тусламжаар илгээсэн аж.
Өмнө нь Гадаад хэргийн сайд Чон Ы Ён парламентын чуулганы үеэр Сөүл Вашингтонтой вакцин солилцох тухай гэрээ хийнэ гэдгийг дурдаж байсан ба түүний хэлж байгаагаар уг гэрээний дагуу АНУ илүү гарсан коронавирусын вакцинаа БНСУ руу илгээх ба БНСУ тодорхой хугацааны дараа адил хэмжээний вакциныг буцаад АНУ руу илгээх аж.
Өнөөдрийн байдлаар Өмнөд Солонгост коронавирусын халдварын нийт 115 мянга гаруй тохиолдол бүртгэгдээд байгаа ба тус улсад 2-р сарын 26-наас коронавирусын эсрэг вакцинжуулах аян эхэлснээс хойш нийт 1.7 сая хүн буюу хүн амынх нь 3.41 хувь нь л коронавирусын вакцин хийлгэжээ.
Өмнөд Солонгосын Эрүүл мэндийн яам коронавирусын эсрэг вакцины нийлүүлэлтийг тогтвортой байлгахын зэрэгцээ коронавирусын эсрэг вакцинд иргэдийг хамруулах ажлыг эрчимжүүлэхийг хичээж байна. Энэ сарын сүүл гэхэд БНСУ-ын эрх баригчид 3 сая иргэнийг, 6-р сарын сүүл гэхэд 12 сая хүнийг коронавирусын эсрэг вакцинд хамруулахаар төлөвлөжээ.
Эх сурвалж: https://www.interfax.ru/world/762363
Орчуулсан: Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
