Амьд домог Адриано Челентано 84 нас хүрлээ

Twitter Print
2022 оны 01-р сар 07-нд 11:38 цагт
Мэдээний зураг,

Амьд домог Адриано Челентано дэлхийн загварын ертөнцийн нийслэл гэгддэг италийн Милан хотод 1938 оны 1-р сарын 6-ны энэ өдөр олон хүүхэдтэй, тарчиг амьдралтай гэр бүлд төржээ.

Нэрт хөгжмийн зохиолч, дуучин, жүжигчин, кино найруулагч, телевизийн хөтлөгч, олон нийт, нийгмийн зүтгэлтэн Челентано аавыгаа өнгөрсний дараа амьдралын эрхээр 12 настайгаасаа ажил хийж эхэлсэн бөгөөд цаг засварын газарт туслахаар ажиллаж байсан нь одоо түүний нэг дуртай хобби нь болсон байна.

17 настайгаасаа рок н ролл хөгжимд дурлах болж өөрийн "Rock Boys"рок хамтлагийг байгуулж байжээ.

Тайзан дээрх өвөрмөц хөдөлгөөнт бүжиглэлт нь Molleggiato буюу пүршин дээрх гэж нэр авсан Адрианогийн шүтдэг хөгжимчид Элвис Пресли, Майкл Жексон нар юм.

1959 онд "Хүүхдүүд ба хөгжмийн автомат" кинонд тоглон дэлгэцэнд анх гарсан ба 1963 онд кино зураг авалтын үеэр эхнэр дуучин, жүжигчин Клаудиа Мори -той танилцан бүх арга чаргаа хэрэглэж олон удаагийн оролдлого хичээл зүтгэлийн ачаар эхнэрээ болгон санасандаа хүрч паппараци гэрэл зурагчид, сэтгүүлчдээс зугтан нууцаар шөнийн 03 цагт Гроссето хотын "Ариун Францискийн" сүмд хуримын ёслолоо маш даруухан хийснээр Италийн хамгийн гоё, сайхан хосууд амьдралаа холбон өдгөө алтан хуримаа хийж өнгөрүүлээд 58 жил хамтдаа жаргал зовлонгоо хуваалцан сайхан амьдарч байгаа билээ.

Өмнө нь хэдэн удаа шагналгүй хоцорч байсан Адриано Челентано 1968 онд Сан - Ремо -"18" фестивальд түрүүлснээ Клаудиа аз авчирсаных гэдэг.

Зураг дээр 1968 оны 18 дахь "Сан Ремо" фестивалийн үеэр Клаудитай гудамжинд зургаа авахуулсан нь

Онгоцоор нисэхээс айдаг, дургуй эр маань өглөө сэрэхдээ ердийн сэрүүлэгтэй цаганд сэрдэггүй насаараа зөвхөн рок хөгжим, дуунд сэрдэг бөгөөд рэп, рок н ролл дууг анх итали хэлээр дуулсан дуучин юм.

Өөрийгөө кино жүжигчин гэхээсээ илүү дуучин хөгжимчин гэж үздэг амьд домог маань 600 гаруй дуу зохиосон нь 30 гаруй альбом болдог ба тэдгээрээс маш олон дуу нь италийн шилдэг хит болсон байна.

Үе үе олныг алмайруулсан үйлдэл хийдэг Челентано маш олон мянган хүн үзэх концертынхоо тасалбарыг хамгийн хямд буюу 1еврогоор зарсан нь түүний санаачилга байсан.

Нэг удаа гудамжинд олны хөлийн газар гэнэт бүжиглэхэд олон зуун хүн маш хурдан цуглан дагаж бүжин гудамжны хөдөлгөөнийг тэр чигт нь хаасан бөгөөд дараа нь цагдаад байцаагдаж яагаад ийм үйлдэл хийсэн бэ гэхэд Челентано - Өө зүгээр л шинэ тоглох дүрийнхээ бүжгийг давтсан юм гэжээ.

1956 оноос өнөөдрийг хүртэл дуу, хөгжмөө зохиосоор буй Адриано Челентаногийн нэрээр 1987 онд Сансрын астероид биетийг нэрлэжээ.

2007 онд дэлхийн хамгийн тод гэрэлтэх 100 одын тоонд тэр багтан орсон юм.

Олон мянга мянган хүний шүтээн италичуудын хамгийн хүндэтгэл хайрыг татсан амьд домгийн охин Розалинда, Россита нар жүжигчин, хүү Жакомо нь нэртэй дизайнер ажээ.

Дашдондогийн Бат-Ирээдүй

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.