Өчигдөр буюу мягмар гарагт ОХУ-ын Байконур сансрын төвөөс Союз МС-19 сансрын хөлөг онгоц Олон Улсын Сансрын Станц руу хөөрсөн байна.
Уг хөлөг онгоцонд сансрын нисгэгч Антон Шкаплеровоос гадна кино найруулагч Клим Шипенко, жүжигчин Юлия Пересильд нар зорчиж байгаа ба Клим Шипенко, Юлия Пересильд нар Олон Улсын Сансрын станц дээр "Сорил" нэртэй уран сайхны киноны зураг авалтыг хийх аж.
Ингэснээр ОХУ сансарт мэргэжлийн кино баг илгээж, уран сайхны киноны зураг авалт хийсэн анхны улс болж байгаа юм.
Найруулагч Клим Шипенко, жүжигчин Юлия Пересильд нар Олон Улсын Сансрын станц дээр ойролцоогоор 10 өдөр болох ба энэ сарын 17-нд дэлхий дээр буухаар төлөвлөжээ.
"Сорил" уран сайхны багийнхныг Олон Улсын Сансрын станц руу хөөрөхийг Оросын хэвлэл мэдээллийн хэрэгслүүдээр шууд дамжуулсан ба тус киног бүтээж байгаа Первый каналын гүйцэтгэх захирал Константин Эрнст багийнхныгаа аян замд нь гаргаж өгөхөөр Байконурт хүрэлцэн иржээ.
Түүний хэлж байгаагаар сансарт зураг авалтаа хийх "Сорил" уран сайхны киноны гол дүрийн сонгон шалгаруулалтанд ойролцоогоор 3000 бүсгүй оролцсон ба эцсийн дүнд жүжигчин Юлия Пересильд сонгогджээ.
Эх сурвалж: ria.ru
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
