Австралийн засгийн газар Квийнслэнд мужид нүүрсний шинэ уурхай барих төслийг баталжээ. Төв Квийнслэндэд баригдах Айзак Ривер нүүрсний уурхайн төслийг батлахдаа Австралийн засгийн газар тухайн төсөл нь Үндэсний байгаль хамгаалах хуулинд нийцэх эсэхийг давхар авч үзсэн гэжээ.
Өмнө нь уг хуулийн дагуу зөвхөн нэг уурхайн төсөл цуцлагдаж байсан аж. Эрдэмтэд нүүрс олборлохтой холбоотой ямарваа нэг шинэ төсөл нь дэлхийн цаг уурын өөрчлөлтийн эсрэг тэмцэлтэй үл нийцнэ гэдгийг удаа дараа анхааруулсаар ирсэн билээ.
Айзак Ривер нүүрсний уурхай нь Квийнслэнд мужийн Моранба хотын ойролцоо баригдах ба 5 жилийн дотор 2.5 сая тонн нүүрс олборлоно гэсэн хүлээлттэй байгаа аж.
Тус уурхайд металлургийн нүүрс буюу коксжих нүүрс олборлох ба уг нүүрсийг голчлон гангийн үйлдвэрт ашигладаг юм.
Квийнслэнд мужид үйл ажиллагаа явуулж байгаа нүүрсний бусад үйлдвэрүүдтэй харьцуулахад хэмжээгээ жижиг ч Айзак Ривер уурхай үйл ажиллагаагаа явуулах хугацаандаа 7 сая тонн хүлэмжийн хий ялгаруулах төлөвтэй байгааг Австралия Институт судалгаагаар тогтоожээ.
Байгаль хамгаалах байгууллагууд засгийн газрыг уг төсөлд хориг тавихыг шаардаж, шинэ нүүрсний уурхай нь агаар дахь хүлэмжийн хийг нэмэгдүүлж, коала баавгай, могой, уутат хөхтөн амьтдын амьдрах орчинд сөргөөр нөлөөлнө хэмээн үзэж байна.
2022 оны 5-р сард бүрдсэн Австралийн засгийн газар цаг уурын өөрчлөлтийн эсрэг тууштай тэмцэхээ илэрхийлж, төрийн эрхэнд гарсан билээ. Энтони Албанезийн засгийн газар 2030 он гэхэд хүлэмжийн хийг 43 хувиар бууруулах, аж үйлдвэрүүдийн ялгаруулах хүлэмжийн хийнд хязгаарлалт тогтоох зорилт тавьсан юм.
Нөгөө талаас Австралийн засгийн газар өнгөрсөн 2-р сард түүхэндээ анх удаа нүүрсний уурхайн төсөлд хориг тавьсан аж.
НҮБ-ын Засгийн газар хоорондын Цаг уурын өөрчлөлтийн асуудал хариуцсан зөвлөл ашигт малтмалтай холбоотой шинэ төсөл нь дэлхийн дулаарлыг цельсийн 1.5 хэмээс хэтрүүлэхгүй байх зорилго бүхий Парисын гэрээтэй зөрчилдөнө гэдгийг анхааруулсаар байгаа билээ. Түүнчлэн нүүрсний эрчим хүчийг даруй цэвэр эрчим хүчний үүсвэрээр солихыг шаардаж байгаа юм.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
