О.Баасанхүү: Х.Баттулга нар АН-ыг хагалан бутаргаж байна

Twitter Print
2021 оны 10-р сар 28-нд 12:56 цагт
Мэдээний зураг,

АН-ын "4-11" мэдээллийн цаг боллоо. Мэдээллийн цагт АН-ын дэд дарга Ц.Оюундарь, Р.Эрдэнэбүрэн, Д.Ганбаяр, АН-ын Нарийн Бичгийн дарга О.Баасанхүү нар оролцов. Мэдээллийн эхэнд Ц.Оюундарь: "АН-ын зүгээс УИХ-ын нөхөн сонгуулийн дүнг хүлээн зөвшөөрөхгүй гэдгээ СЕХ-нд илэрхийлсэн байгаа. Мөн СЕХ-г Захиргааны Хэргийн Шүүхэд өгсөн" гэлээ.

Харин АН-ын Нарийн бичгийн дарга О.Баасанхүү "Жагсаал цуглаан хийсэн хорь гаруй хүнд эрүүгийн хэрэг үүсгэсэн. Нэгдүгээрт, 20 гаруй хүнд эрүүгийн хэрэг үүсгэж, Э.Одбаяр, Д.Монголхүү нарыг баривчлан саатуулсан. Э.Одбаяр өлсгөлөн зарлаж, байдал хүнд байна. Тодорхой хүмүүсийг яаж баривчлан саатуулдаг вэ гэдгийг харсан байх. Жишээлбэл, таван хүний амь насанд хүрсэн, хоёр нялх хүүхдийн аав, ээжтэй нь амь насыг нь хохироож, сэжиглэгдэн яллагдаж, гурван шатны шүүхээр ял авч, буцаад шалгагдаж байгаа хүмүүс Марууш гэдэг хүн намайг гэрчилсэн гээд гудамжинд явж байвал тэр хүнийг баривчлан хорих ёстой. Тэрнээс биш одоо энэ хүнийг хорих ангиас гаргавал дахин жагсч магадгүй гэдэг хардлагаар хүнийг барьж хорьж болохгүй. Хүний эрхийн асуудалд онцгойлон анхаараач.

Уг нь бол хүргэн гэх хүнээ алчихаад, гянданд хоригдож байгаад гарч ирээд хүмүүсийг эрэмдэглэнэ, зэрэмдэглэнэ гэж олон нийтийг сүрдүүлэн, заналхийлж байгаа хүнийг баривчлан хорих ёстой байх. Түүнээс биш энэ хүнийг гаргачихвал ахиад жагсаж магадгүй гэдэг үндэслэлээр хүнийг хорьж болдоггүй юм. Н.Учрал гишүүн өөрөө үхэл амьдралын зааг дээр байсан хүний хувьд хүн үхэх гэдгийг сайн ойлгох болов уу? Тиймээс ч  өөртэй нь адилхан амь нас нь эрсдэлтэй байгаа асуудал дээр Хүний эрхийн дэд хорооны гишүүний хувьд онцгойлон  хуралдаа оролцооч ээ.

Мөн АН-ынхан бид эвлэлдэн нэгдэхийг маш их хүсэж байгаа. Харамсалтай нь Ерөнхийлөгч асан Х.Баттулга буюу МАН-ын даргын зөвлөх хийж байгаа хүнийг дэмждэг зарим нөлөө бүхий хүмүүс эвлэрлийг эсэргүүцэн, хагаралдааныг бий болгож, шүүхийн үйл ажиллагаанд нөлөөлөх гээд байгаа учраас бид анхааралтай байж, мөн чанараар эвлэрэх ёстой юм.

Энэ ч утгаараа нөхцөл байдал хараахан бэлэн болоогүй байна. Хоёр талаас ажлын хэсэг гарч, ойр ойрхон уулзах ёстой. МАН-ын даргын зөвлөх хийж байгаа хүний тойрон хүрээлэгчид бол МАН-ынхаа бодлого шийдвэрийг дагаад явж байгаа гэж бид ойлгож байгаа. Тийм учраас жинхэнэ ардчилал дээр, хүний эрх дээр, хувь хүний эрхийг дээдлэн эвлэлдэн нэгдэх зайлшгүй шаардлага байна" гэв.

11 дүгээр сарын 05-ны өдөр хуралдахаар зарлагдсан намын их хурлын талаар Ардчилсан намын дэд дарга Р.ЭРДЭНЭБҮРЭН "Ардчилсан нам нэгдэх чиглэлээр зөвшилцөх ажлын хэсэг гарсан. Энэ хүрээнд нөхөн сонгуулийн сурталчилгааны үеэр зөвшилцөх ажлын хэсгүүд, сонгогдсон хоёр дарга нэгдэж ажилласан. Ардчилсан намын гишүүд нэгдэж, их хурлаа хийе гэж байна. Тиймээс ирэх арваннэгдүгээр сарын 5-нд их хурлаа хийх санал гаргасан. Гэхдээ бид их хурлыг хэд хэдэн удаа зарлаж, нэг удаа хийсэн ч тодорхой үр дүнд хүрээгүй. Энэ удаагийн их хурлыг маш сайн бэлдэж байж нэгдсэн зохион байгуулалттай хийх ёстой. Одоогийн байдлаар албан ёсны шийдвэр гараагүй. Бэлтгэл ажлыг маш сайн хийх ёстой. Ирэх сараас хоёр талын зөвшилцөх талууд уулзаж ярилцана" гэлээ.

Ардчилсан намын бүлгийн зөвлөх Ц.ОЮУНДАРЬ "Эрх баригчид цар тахлын дэглэмийн үеэр далимдуулан давхар стандарт бий болгож байгаатай холбоотойгоор өнгөрсөн зургадугаар сарын 25-наас эхлэн залуучууд сайн дурын хөдөлгөөн өрнүүлэн тэмцсэн. Ардчилсан намаас залуусын сайн дурын үйл ажиллагааг улс төржүүлчих вий гэдэг үүднээс хэдий дэмжиж байсан ч үйл ажиллагаанд нь оролцож байгаагүй. Энэ хугацаанд цагдаагийн байгууллагаас Үндсэн хуульд заасан үг хэлэх, үзэл бодлоо илэрхийлэх, тайван замаар жагсах, эвлэлдэн нэгдэх эрхийг ноцтойгоор зөрчсөн үйлдлийг удаа дараа гаргаж байсан. Улмаар тэднийг хэд хэдэн удаа баривчлан, хүний эрхийн баримтуудад заасан байдаг уран сайхны аргаар үзэл бодлоо илэрхийлэх зорилгоор хийсэн эд материалыг нь хураах, бүдүүлгээр халдах үйлдлүүдийг хийж ирсэн. Энэ бүхнийг Ардчилсан нам тэвчээртэйгээр ажиглаж байсан. Аравдугаар сарын 4-нөөс 5-нд шилжих шөнө цагдаагийн байгууллагаас гүйцэтгэх ажиллагаа явуулж, Э.Одбаяр, Д.Монголхүү нарыг баривчилсан.

Ард түмэн мэднэ. Тэртээ 1937 оны есдүгээр сарын 10-ны шөнө хэлмэгдүүлэлтийн анхны баривчилгааг хийж байсан. Одоо үйлчилж буй хуулиар оргон зайлахыг завдсан онц ноцтой гэмт хэрэгтэн, хүний аминд хүрсэн, хорлон сүйтгэх ажиллагаа явуулахаас бусад бүх үйл ажиллагааг ажлын цагаар хийх ёстой. Мөн шүүх, прокурорын зөвшөөрөлтэй зарлан дуудах хуудастай баривчилгаа хийдэг. Гэтэл ямар ч үндэслэлгүйгээр шөнө ажиллагаа явуулж, Э.Одбаяр, Д.Монголхүү нарыг баривчлах нь хэрээс хэтэрч байна.

Ардчилсан нам Хууль зүй, дотоод хэргийн яамны гадна суулт хийж, салбарын сайдад нь шаардлага хүргүүлсэн. Мөн баривчлагдсан иргэдийн өмгөөллийн үйлчилгээ авах бүх эрхийг хааж, эс үйлдэхүйгээр хааж боосон учраас УИХ дахь АН-ын бүлгийн дарга Д.Ганбат цагдан хорих 461 дүгээр анги руу очиж, уулзсан. Хорих 461 дүгээр ангиас оргуулсан гэх үндэслэлтэй тогтоолыг хүчингүй болгосон. Одоо анх баривчилсан зүйл анги нь өөрчлөгдөж, цагдаагийн шаардлагыг эсэргүүцсэн 23.1 гэдэг заалт руу шилжүүлсэн. Энэ заалтаар цагдан хоригдох ямар ч үндэслэл байхгүй. Гадуур байцаалт авч болдог. Таслан сэргийлэх арга хэмжээг нь өөрчлөх Улсын ерөнхий прокурорт тавьсан хүсэлт дүүргийн прокурорт шилжсэн. Дүүргийн прокуророос арга хэмжээ авч байгаа гэж мэдээлсэн.

УИХ дахь Ардчилсан намын бүлэг Хүний эрхийн дэд хорооны гишүүдтэй уулзаж, өчигдөр дэд хорооны хуралдааныг хуралдуулахаар товлосон. Эрх баригчид цагдаа, иргэн хоёрыг турхираад, ард нь нуугдчихдаг. Тэрнээс гадна эрх баригчид хүний эрхэд асар бүдүүлгээр халдаж, зөрчиж байна. Хүний эрхийн үндэсний комиссын төсвийг УИХ дээр хэлэлцээд, оруулсан дүнгээр нь баталсан байхад Засгийн газраас хянахдаа 50 хувь хассан. Санхүүгээр нь боож хаасан үйлдэл. Хүний эрхийн үндэсний комиссоос өдөр болгон 461 дүгээр ангид очиж, хоригдож буй залууст анализ хийж байна" гэлээ.

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.