АНУ-д коронавирусын халдварын улмаас 6 хүн нас бараад байна

Twitter Print
2020 оны 03-р сар 03-нд 13:19 цагт
Мэдээний зураг,

ДЭМБ-ын Ерөнхий захирал Тедрос Гебрейесус Өмнөд Солонгос, Итали, Иран, Японд коронавирусын халдвар хурдацтайгаар тархаж байгаа явдалд санаа нь зовниж буйгаа илэрхийлжээ.

Түүний хэлж байгаагаар БНХАУ-аас гадна коронавирусын халдвар хамгийн ихээр бүртгэгдээд байгаа Өмнөд Солонгост уг вирусын халдварын дэгдэлтийг хяналтандаа авах боломж байгаа аж. БНСУ-д коронавирусын халдвар авсан 4812 тохиолдол бүртгэгдээд байгаагийн дийлэнх нь Дэгү хот болон Дэгү хотын ойр орчмын бүс нутагт бүртгэгдээд байна. Түүнчлэн уг вирусын халдварын улмаас нас барсан иргэдийн тоо 28-д хүрчээ. Өмнөд Солонгост коронавирусын халдвар хурдацтай тархах шалтгаан болсон Синчонжи шашны урсгалын цуглаан, түүнийг зохион байгуулсан сүмийн удирдлагууд болон Синчонжи шашны урсгалын үүсгэн байгуулагч нарыг хүн амины хэргээр шалгах хүсэлтийг эрх баригчдын зүгээс Сөүлийн прокурорын албанд гаргасан байна.

АНУ-ын Вашингтон мужийн Киркланд хотод коронавирусын халдварын улмаас 6 хүн нас бараад байна. Нас барсан иргэд тус хотод байрлах ахмад настны асрамжийн төвийн асруулагчид байжээ. Үүнтэй холбоотойгоор тус асрамжийн төвд байрлаж байсан хэдэн арван асруулагчид болон ажилчид, тус төвд дуудлагаар очсон 27 гал сөнөөгчийг хөл хорионд оруулжээ. АНУ-ын Дэд Ерөнхийлөгч Майк Пэнсийн мэдээлсэнээр БНСУ болон Италид байрлах нисэх онгоцны буудлууд зорчигчдыг бүгдийг нь коронавирусын халдвар авсан эсэхийг шинжилж эхлэх гэнэ.

Түүнчлэн Америкийн Хүнс, Эмийн албаны тэргүүний мэдээлсэнээр энэ долоо хоногийн сүүл гэхэд АНУ коронавирусын 1 сая оношлуурыг үйлдвэрлэхээр төлөвлөжээ. Дэлхий даяар коронавирусын халдварын улмаас 3000 гаруй хүн нас бараад байна. Италид уг вирусын халдварын улмаас нас барсан иргэдийн тоо 52-т хүрчээ. Латви, Саудын Араб, Сенегал, Мароккод коронавирусын халдвар авсан анхны тохиолдлууд бүртгэгдсэнээр Ковид-19 вирусын халдвар дэлхийн 60 гаруй улсад бүртгэгдээд байна. Их Британид Ковид-19 вирусын халдвар авсан 40 тохиолдол бүртгэгдээд байгаа ба тус улсын Ерөнхий сайд Борис Жонсон дээрх тоо нэмэгдэхийг анхааруулжээ. Иранд коронавирусын халдвар авсан 1500 гаруй тохиолдол бүртгэгдээд байгаа ба уг вирусын халдварын улмаас 66 хүн нас бараад байгаа нь нас барагсдын тоогоороо Хятадын дараа бичигдэж байна.

Coronavirus spreading fast USA-н зурган илэрц

Харин халдварын голомт болоод байсан БНХАУ-д коронавирусын халдвар авсан иргэдийн тоо буурсаар байна. Мягмар гарагийн байдлаар Хятадад Ковид-19 вирусын халдварыг авсан 125 тохиолдол бүртгэгдэж, коронавирусын халдвар авсан иргэдийн тоо буурсанаар эрх баригчид уг вирусын дэгдэлттэй холбоотойгоор барьсан 16 эмнэлгийнхээ нэгийг хаасан байна. Ковид-19 вирусын халдвар анх Хятадын Ухань хотод өнгөрсөн 12-р сард дэгдсэн ба түүнээс хойш уг вирусын халдвараар 86 500 гаруй хүн өвчилсөн юм. 

Эх сурвалж: Reuters

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.