ДЭМБ-ын мэргэжилтнүүд коронавирусын гарал үүслийг тодорхойлохын тулд ирэх сард Хятад руу явна

Twitter Print
2020 оны 12-р сар 16-нд 12:55 цагт
Мэдээний зураг,

ДЭМБ-ын мэргэжилтнүүдийн баг КОВИД-19 өвчнийг үүсгэгч SARS-CoV-2 вирусын гарал үүслийг тодорхойлохын тулд ирэх сард БНХАУ-д ажиллахаар төлөвлөжээ.

Тус багийн гишүүн Фабиан Лендертцийн хэлж байгаагаар ДЭМБ Хятадын эрдэмтэдтэй хамтран ажиллах талаар ярилцаж эхэлсэн ба ДЭМБ-ын мэргэжилтнүүд ажлаа коронавирусын халдвар анх бүртгэгдсэн Ухань хотоос эхлэх аж. Тэрээр, "Гол нь буруутныг хайх биш юу болж өнгөрснийг ойлгох хэрэгтэй байна.

Олж авсан мэдээллээс үндэслэн бид цаашид гарч болох эрсдлийг бууруулж чадах уу, үгүй юу гэдгийг тодорхойлно." хэмээн онцолжээ. Эрдэмтэд КОВИД-19 өвчнийг үүсгэгч коронавирусээр цар тахлаас өмнө хүмүүс өвчилж байсан эсэхийг нягтлахаар төлөвлөж байгаа ба ингэхийн тулд цар тахлаас өмнө авсан иргэдийн шинжилгээний сорьцуудыг судалж үзэх аж. Түүнээс гадна эрдэмтэд коронавирус хүнд халдсан тохиолдол анх бүртгэгдсэн Ухань хотын далайн гаралтай хүнс зардаг захыг судлахаар төлөвлөсөн ба коронавирусын тээгч байж болзошгүй сарьсан багваахай зэрэг амьтнуудаас сорьц авах гэнэ.

Фабиан Лендертцийн хэлж байгаагаар ДЭМБ-ын ажилд Бээжингийн талаас ямар нэг хязгаарлалт тавихгүй ба Бээжингийн зүгээс ДЭМБ-ын эрдэмтдийн багийг Хятадад ирсэн даруйдаа 14 хоног тусгаарлалтанд байх ёстой гэсэн шаардлагыг тавиад байгаа аж. ДЭМБ-ын мэргэжилтнүүдийн баг Хятадад нийтдээ 4-5 долоо хоног ажиллахаар төлөвлөжээ. КОВИД-19 өвчнийг үүсгэгч коронавирусын халдварыг авсан анхны тохиолдол 2019 оны 11-р сарын 17-нд Хятадын Ухань хотод бүртгэгдсэн гэж үзэж байгаа ба олон улсын эрдэмтэд уг вирусыг амьтны гаралтай гэж үзэж байгаа юм. Тодруулбал коронавирус нь сарьсан багваахайгаас хүнд халдсан байж болзошгүй юм.

Эх сурвалж: Interfax.ru

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.