Коронавирусын халдварын үед айж сандрахгүй байх 10 шалтгаан

Twitter Print
2020 оны 03-р сар 18-нд 09:23 цагт
Мэдээний зураг,

1. Коронавирусын халдварын үүсгэгчийг нь тогтоочихсон.

1981 оны 6-р сард ДОХ-ын анхны тохиолдлууд бүртгэгдэхэд уг өвчнийг үүсгэдэг ХДХВ-ийг эрдэмтэд тогтоох гэж хоёр гаруй жилийг зарцуулж байсан. Тэгвэл БНХАУ-д үл мэдэгдэх уушгины хатгалгаа өвчин 12-р сарын сүүлээр бүртгэгдэж эхэлсэн бол 1-р сарын 7 гэхэд эрдэмтэд уг халдварт өвчин коронавирусын шинэ төрлийн вирус болох Ковид-19 вирусээр үүсгэгдсэнийг нь олж тогтоосон билээ. Эрдэмтдийн тогтоосноор Ковид-19 нь 2000 оны эхээр дэгдсэн SARS-ийн вирустэй нэг төрөлд багтах аж. Түүнчлэн Ковид-19 вирус нь байгалиас гаралтай ба мутацид ордгийг нь тогтоогоод байгаа юм.

2. Ковид-19 вирусын халдвар авсан эсэхийг оношлож чадаж байна. 

Ковид-19 буюу шинэ төрлийн коронавирусын халдварыг 1-р сарын 13-наас эхлэн оношлож эхэлсэн.

3. Коронавирусын халдварын голомт болсон Хятадад нөхцөл байдал сайжирсаар байна. 

БНХАУ-ын эрх баригчид хатуу хяналт тавьж, хөл хориог чангатгаснаар сүүлийн хэдэн долоо хоногт Хятадад коронавирусын халдвар авсан иргэдийг тоо өдөр өдрөөр буурч байна. 3-р сарын 9-ны байдлаар Хятадад коронавирусын халдвар авсан 19 тохиолдол шинээр бүртгэгдээд байна.

4. Коронавирусын халдвар авсан иргэдийн 80 хувьд нь өвчний шинж тэмдэг хөнгөн хэлбэрээр илэрч байна.

Коронавирусын халдвар авсан хүнд өвчний шинж тэмдэг илрэхгүй байж болох ба халдвар авсан нийт иргэдийн 81 хувьд нь хөнгөн хэлбэрээр илэрч байна. Үлдсэн 19 хувьд нь коронавирусын халдвар уушгины цочмог хатгалгаа өвчин үүсгэжээ.

5. Коронавирусын халдвар нь эдгэрдэг өвчин.

Коронавирусын халдвар авч, уг вирусын халдварын улмаас нас барсан иргэдийн талаар голчлон мэдээлж байгаа ч халдвар авсан иргэдийн дийлэнх нь эдгэрээд байгаа билээ. Коронавирусын халдвар авч, эдгэрсэн хүний тоо уг вирусын халдварын улмаас нас барсан иргэдийн тооноос даруй 13 дахин их байгаа юм. Дэлхий даяар коронавирусын халдвар авсан 108 мянга гаруй тохиолдол бүртгэгдээд байгаагийн 63 663 нь эдгэрээд байна.

6. Хүүхдүүдэд шинж тэмдэг хөнгөн илэрч байна.

Коронавирусын халдвар авсан нийт тохиолдлын 3 хувь нь л 20-иос доош насныхан байгаа ба 40-өөс доош насныхны дунд нас баралтын хувь 0.2 хувь байна. Хүүхдүүдэд коронавирусын халдварын шинж тэмдэг хөнгөн хэлбэрээр эсвэл огт илрэхгүй байх нь элбэг аж.

7. Ковид-19 нь ариутгалын бодист устдаг. 

Эд зүйлсийн гадаргуу дээрх Ковид-19 вирус нь 62-71 хувийн этилийн спирт, 0.5 хувийн устөрөгчийн хэт исэл буюу перекись, 0.1 хувийн жавелины уусмалд 1 минутын дотор устаж үгүй болж байгааг тогтоосон билээ. Түүнчлэн гараа тогтмол савандаж угаах нь халдвараас сэргийлэх хамгийн үр дүнтэй арга юм.

8. Олон улсын эрдэмтэд уг Ковид-19 вирусыг судалсаар байна. 

Олон улсын эрдэмтэд хамтран ажиллаж, Ковид-19 вирусыг судалж, сар хүрэхгүй хугацаанд хэдэн зуун судалгаа шинжилгээний ажлыг нийтлээд байна. Түүнчлэн Ковид-19 вирусын эсрэг вакцин, уг вирусын эсрэг эмчилгээ, оношлуур зэргийг үйлдвэрлэх олон ажлууд хэдийн явагдаж эхлээд байна.

9. Ковид-19 вирусын эсрэг вакциныг туршиж эхэлсэн. 

Орчин үеийн техник технологийн ачаар ямарваа нэг өвчний эсрэг вакцин гаргаж авах боломж бололцоо өндөр түвшинд хүрсэн билээ. Өнөөдрийн байдлаар шинэ төрлийн коронавирус болох Ковид-19 вирусын эсрэг вакцин бүтээх 8 төсөл явагдаж байна. Австралийн Квинслендийн их сургуулийн эрдэмтэд Ковид-19 вирусын эсрэг вакциныг бүтээх ажилд шинэ технологи ашиглаж байгаа нь уг вирусын эсрэг вакцин ойрын хугацаанд бэлэн болох найдварыг төрүүлж байгаа ба вакциныг удахгүй хүн дээр туршиж үзэхээр ажиллаж байна.

10. Ковид-19 вирусын эсрэг эмчилгээг туршиж байна. 

Вакцин бол өвчнөөс урьдчилан сэргийлэх үүрэгтэй бол хэдийн халдвар авсан иргэдийн эмчилгээ мөн л чухал ач холбогдолтой билээ. Тэгвэл коронавирусын халдварын эсрэг эмчилгээний тухайд 80 гаруй клиникийн туршилт явагдаж байна. Коронавирусын халдварын эсрэг өөр бусад халдварт өвчний эсрэг хэрэглэдэг эмүүдийг туршиж үзэж байна. Коронавирусын халдвар авсан хүмүүс дээр хэдийн туршиж эхэлсэн эмүүдийн нэг бол вирусын эсрэг үйлчилгээтэй Ремдезивир нэртэй эм юм. Түүнчлэн хумхаа өвчний эсрэг хлорохин эмийг коронавирусын халдварын эсрэг эмчилгээнд туршиж байгаа ба уг эмийг коронавирусээр үүсгэгдсэн уушгины хатгалгаатай өвчтнүүдэд хэрэглэдэг аж.

Эх сурвалж: nationalinterest.org/

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.