Хөлбөмбөгийн тэмцээний үеэр үймээн гарч, 125 хүн амиа алджээ

Индонезид хөлбөмбөгийн тэмцээний үеэр талбай руу орж ирсэн хөгжөөн дэмжигчдийг тараахын тулд цагдаа нар нулимс асгаруулагч хий ашигласнаас болж үймээн үүсэж, 125 хүн амиа алдаж, 320 гаруй хүн бэртжээ.

Өнгөрсөн бямба гарагийн орой Зүүн Ява мужийн Маланг хотод хөлбөмбөгийн Арема болон Персебая багуудын дунд болсон тэмцээн дуусах үед хожигдсон багийн хөгжөөн дэмжигчид эсэргүүцлээ илэрхийлж, хөлбөмбөгийн талбайд олноорол гарч ирчээ.

Цагдаа нар тэдгээр хөгжөөн дэмжигчдийг талбайгаас гаргахын тулд нулимс асгаруулагч хий ашигласнаар цэнгэлдэхэд байсан үзэгчид айж сандралдан бүгд нэгэн зэрэг цэнгэлдэхээс гарахыг оролдож, үймэлдэж эхэлсэн байна.

Олон улсын хөлбөмбөгийн холбоо хөлбөмбөгийн тэмцээний үеэр аюулгүй байдал хангахад цагдаа нар эсвэл хамгаалагчид цэнгэлдэхэд ямар ч галт зэвсэг, нулимс асгаруулагч хий ашиглах ёсгүй гэдгийг онцолжээ.

Өмнө нь хөлбөмбөгийн цэнгэлдэхэд гарч байсан ослууд дундаас хамгийн оллн хүн амиа алдсан осол нь Индонезид болсон дээрх осол тооцогдож байна.

Маланг хотын Эрүүл мэндийн агентлагийн дарга Вияанто Вижоёогийн мэдээлснээр ослын үеэр 125 хүн амиа алдаж, 323 хүн бэртжээ.

Орон нутгийн цагаар оройны 22 цагийн үед Арема FC баг Персебая багт 3-2 харьцаатайгаар хожигдсоны дараагаар Арема FC багийн хөгжөөн дэмжигчид хөлбөмбөгийн талбайд олноороо гарч ирсэн дүрс бичлэг орон нутгийн хэвлэл мэдээллийн хэрэгслүүдээр цацагджээ.

Цэнгэлдэхэд гарсан үймээн, шахцалдааны үеэр бэртэж гэмтсэн иргэдийн дийлэнх нь ойр байрлах Канжурухан эмнэлэгт хүргэгджээ. Ихэнх нь бэртсэн, нулимс асгаруулагч хий болон шахцалдсанаас болж амьсгалын дутагдалд орсон хэмээн тус эмнэлгийн дарга Боби Прабово мэдэгджээ. Түүний мэдээлснээр тархиндаа гэмтэл авсан хэд хэдэн тохиолдол бүртгэгдсэн ба амиа алдагсдын дотор 5, 14, 15 настай хүүхдүүд байсан аж.

Индонезийн Ерөнхийлөгч Жоко Видодо эрх баригчдыг хөлбөмбөгийн тэмцээний үеэр авч буй аюулгүй байдлын арга хэмжээнүүдийг сайтар шалгахыг үүрэг болгосон ба Маланг хотод болсон осол Индонезийн хөлбөмбөгийн түүхэн дэх сүүлийн осол байх болно гэж найдаж байгаагаа илэрхийлжээ.

Түүнчлэн Маланг хоытн цэнгэлдэхэд болсон ослыг шалгаж дуусах хүртэл тус улсын хөлбөмбөгийн дээд лигийн тоглолтуудыг цуцлахыг үүрэг болгожээ.

Олон Улсын Хөлбөмбөгийн холбооны Ерөнхийлөгч Жианни Инфантино хөлбөмбөгийн спортын салбарынхан, хөлбөмбөгийн хөгжөөн дэмжигчид бүгд Индонезид болсон харамсалтай явдалд цочирдсон болохыг онцолжээ. Олон Улсын Хөлбөмбөгийн холбоо Индонезийн Хөлбөмбөгийн холбооноос болсон үйл явдлын тухай дэлгэрэнгүй тайланг илгээхийг шаардсанаас гадна мэргэжилтнүүдийн багаа Маланг хот руу илгээжээ. Индонезийн Хүний эрхийг комисс цэнгэлдэхэд аюулгүй байдлыг хэрхэн хангаж байсныг, тэр дундаа нулимс асгаруулагч хий ашигласан явдал зэргийг шалгахаар төлөвлөжээ.

Ням гарагийн өглөөнөөс эхлэн үймээн гарсан цэнгэлдэхийн гадаа иргэд амиа алдсан иргэдийн дурсгалыг хүндэтгэн, цэцэг өргөж эхэлсэн ба орой нь Арема клубын бэлгэ тэмдгийн урд лаа асаажээ. Нийслэл Жакартад иргэд мөн лаа асааж, зарим нь "Цагдаа нарын харгис хэрцгий үйлдлийг зогсоо" гэсэн уриа лоозон барьсан байжээ.

Индонези дэх Эмнэсти Интернэшнл байгууллага тэмцээний үеэр авсан аюулгүй байдлын арга хэмжээг буруушааж, хөгжөөн дэмжигчдийн эсрэг хүч хэрэглэх явдлыг зөвтгөх ямар ч үндэслэл байхгүй гэжээ.

Индонезийн Аюулгүй байдлын сайд Махфуд өөрийн Инстаграм хуудсандаа цэнгэлдэх 38 мянган хүний багтаамжтай байсан ч зохион байгуулагчид 42 мянган тасалбар зарсан тухай бичжээ.

Эх сурвалж: Reuters

Содномцэрэнгийн Энхзаяа

mongolcom.mn

 

 

Энэ мэдээ танд таалагдаж байвал LIKE хийгээрэй. Танд баярлалаа.