Эквадор, Катар, Армянд коронавирусын халдвар авсан анхны тохиолдлууд бүртгэгдлээ

Twitter Print
2020 оны 03-р сар 02-нд 12:57 цагт
Мэдээний зураг,

Коронавирусын халдвар хурдацтайгаар тархаж байгаатай холбоотойгоор Европ, Ойрх Дорнод болон Америкийн эрх баригчид нэмэлт хориг арга хэмжээнүүдийг аваад байна.

Өнгөрсөн бямба гарагт АНУ-д коронавирусын халдварын улмаас нас барсан анхны тохиолдол бүртгэгджээ. Тодруулбал, Вашингтон мужид 50 орчим насны эрэгтэй коронавирусын халдварын улмаас нас барсан ба тус мужид уг вирусын халдвар авсан 4д тохиолдол бүртгэгдсэн аж. АНУ-ын эрх баригчдын мэдээлж байгаагаар тус улсад коронавирусын халдвар авсан иргэдийн тоо нэмэгдэх хандлагатай байгаа ч халдвар өргөнөөр тархах эрсдэл бага аж.

Итали болон БНСУ-аас АНУ-д ирж буй иргэдэд нэмэлт шалгалт шинжилгээг хийхээр болсон бол Америкийн засгийн газрын зүгээс Иранаас АНУ рүү зорчихоор төлөвлөсөн болон сүүлийн 14 хоногт Иран руу зорчсон иргэдийг АНУ-д нэвтрүүлэхгүй байх хориг арга хэмжээгээ сунгасан талаар АНУ-ын Дэд Ерөнхийлөгч Майк Пэнс онцолжээ. Түүнчлэн эрх баригчид иргэдийг коронавирусын халдвар бүртгэгдсэн бүс нутгууд рүү зорчихгүй байхыг анхааруулжээ. Өнгөрсөн бямба гарагт Эквадорт коронавирусын халдвар авсан анхны тохиолдол бүртгэгдсэн ба халдвар авсан эмэгтэй Испанийн Мадрид хотоос ирсэн байжээ. Харин Мексикт коронавирусын халдвар авсан 4 тохиолдол бүртгэгдсэн ба халдвар авсан иргэд бүгд Итали улсаар аялаад ирсэн байжээ.

Gatherings banned, travel restricted as coronavirus cases grow worldwide-н зурган илэрц

Бразилд коронавирусын халдвар авсан 2 дахь тохиолдол бүртгэгдсэн нь мөн л Италид зорчсон иргэн байсан байна. Коронавирусын халдварын дэгдэлтийг зогсоох үүднээс Францын эрх баригчид 5000-аас дээш тооны хүмүүсийг битүү орчинд цуглуулахыг хориглох шийдвэр гаргажээ. Тус улсад Ковид-19 вирусын халдварын 73 тохиолдол бүртгэгдээд байгаа билээ. Швейцарийн эрх баригчид 1000-аас дээш тооны хүмүүс цугларах боломжтой бүх арга хэмжээнүүдийг цуцлах шийдвэр гаргаад байна. Испанийн Канарын арлууд дээрх зочид буудалд Итали улсын иргэд коронавирусын халдвар авсан нь тогтоогдсонтой холбоотойгоор тус зочид буудалд буусан 700 гаруй иргэд хөл хорионд орсон хэвээр байна. Коронавирусын халдвар авсан 1100 гаруй тохиолдол бүртгэгдэж, уг халдварын улмаас 34 хүн нас бараад буй Итали улсын хойд зүгийн 3 мужид хөл хорио тогтоогоод байна.

Иракт коронавирусын халдвар авсан 13 тохиолдол бүртгэгдсэн бол Катарт өнгөрсөн бямба гарагт уг вирусын халдвар авсан анхны тохиолдол бүртгэгджээ. Ингэснээр Персийн булангийн улс орнуудаас ганц Саудын Араб улсад л коронавирусын халдвар бүртгэгдээгүй үлдсэн байна. Персийн булангийн улс орнуудад коронавирусын халдвар авсан иргэдийн дийлэнх нь Иран улсад зорчсон эсвэл Иран улсад зорчсон хүнтэй харьцсан иргэд байжээ. Өнгөрсөн ням гарагт Армянд коронавирусын халдвар авсан анхны тохиолдол бүртгэгдсэн нь хөрш Иран улсад зорчоод ирсэн иргэн байсан байна. Ираны эрх баригчид сургуулиудын үйл ажиллагааг ирэх мягмар гараг хүртэл зогсоож, урлагийн тоглолт, спорт арга хэмжээнүүдийг зохион байгуулахыг долоо хоног хориглох шийдвэр гаргаад байна.

Gatherings banned, travel restricted as coronavirus cases grow worldwide-н зурган илэрц

Түүнчлэн эмнэлэг болон асрамжийн газруудад эргэлт оруулахыг хоригложээ. Иранд нийтдээ коронавирусын халдвар авсан 60 орчим тохиолдол бүртгэгдээд байгаа ба уг вирусын халдварын улмаас 54 хүн нас барсан байна. Азербайжанд коронавирусын халдвар авсан 2 тохиолдол бүртгэгдсэн ба тус улсын эрх баригчид коронавирусын халдварын дэгдэлтээс урьдчилан сэргийлэх үүднээс Ирантай хиллэдэг хилээ хоёр долоо хоногийн турш хаахаар болсон байна. Тайланд болон Австралид коронавирусын халдварын улмаас нас барсан анхны тохиолдлууд бүртгэгджээ.

Коронавирусын халдвар авсан нийт 3526 тохиолдол бүртгэгдээд байгаа БНСУ-д сүмүүд үйл ажиллагаагаа цахимаар явуулж эхэлжээ. БНХАУ-ын Хубэй мужид 12-р сараас эхлэн дэгдсэн коронавирусын халдварын улмаас дэлхий даяар 3000 гаруй хүн нас барж, уг вирусын халдвараар нийт 88 443 хүн өвчлөөд байна. Хятадын эрх баригчдын мэдээлсэнээр коронавирусын халдвар авсан иргэдийн 44 462 нь эдгэрч, эмнэлгээс гарчээ.

Эх сурвалж: Reuters

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.