Оросууд Лисичаньск хотыг хяналтандаа авсан хэмээн мэдэгджээ

Twitter Print
2022 оны 07-р сар 03-нд 09:10 цагт
Мэдээний зураг,

ОХУ-ын зэвсэгт хүчнийхэн Украины зүүн хязгаарын Лисичаньск хотыг хяналтандаа авсан хэмээн мэдэгдсэн байна.

Оросыг дэмжигч салан тусгаарлагчид оросууд Лисичаньск хотын төвд орсон хэмээн мэдэгдэж, Оросын хэвлэл мэдээллийн хэрэгслүүдээр ОХУ-ын зэвсэгт хүчний албан хаагчид Лисичаньск хотын гудамжаар жагсаж буй видео бичлэгийг цацжээ. Нөгөө талаас Украины арми Лисичаньск хотын хяналтыг оросуудад алдаагүй хэмээн онцолжээ.

Лисичаньск хот нь Луганск мужид Оросын армид эзлэгдээгүй цорын ганц хот юм. Өнгөрсөн сард ОХУ-ын зэвсэгт хүчнийхэн Лисичаньск хоттой ойролцоо байрлах Северодонецк хотыг хяналтандаа авч чадсан билээ.

Луганск мужийн захирагч Сергей Гайдай Лисичаньск хотын төлөөх тулаан үргэлжилсээр байгаа ба оросууд хот руу бүх талаас давшилж байна хэмээн мэдэгджээ.

ОХУ-аас Луганск мужид томилогдсон Родион Мирошник Оросын арми Лисичаньск хотыг хяналтандаа авсан ч хотыг "бүрэн чөлөөлж" амжаагүй хэмээн мэдэгдсэн байна.

Лисичаньск хотын төлөөх тулаантай зэрэгцэн Оросын бөмбөгдөлтийн улмаас Украины хойд зүгийн Харьков хотод төмөр зам, цахилгаан эрчим хүчний шугамнууд эвдэрсэн талаар мэдээлж байна.

Түүнчлэн Одесса боомт хотод хүрэх гол зам дагуу байрлах өмнөд зүгийн Николаев хот мөн адил бөмбөгдөлтөнд өртжээ.

Оросын Батлан хамгаалахын яам ОХУ-ын агаарын зэвсэгт хүчин Украины армийн 5 штаб, зэр зэвсгийн хэд хэдэн агуулахыг устгасан хэмээн мэдэгдээд байна.

Эх сурвалж: Reuters

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.