Цар тахлын үед антибиотикийн буруу хэрэглээ ихэссэнээр тэдгээр нь үйлчлэхгүй болох эрсдэл ихсэж байна

Twitter Print
2021 оны 11-р сар 21-нд 10:22 цагт
Мэдээний зураг,

Коронавирусын цар тахлын үед антибиотикийн буруу хэрэглээ ихээр бүртгэгджээ. Коронавирусын цар тахлын үед антибиотик болон нянгийн эсрэг үйлчилгээтэй эмнүүдийн зохисгүй хэрэглээ нэмэгдсэнээс болж нянгууд антибиотик тэсвэртэй болж, антибиотик болон нянгийн эсрэг эмүүд удахгүй ямар ч үр дүнгүй болох эрсдлийг дагуулж байна хэмээн ДЭМБ-ын дэргэдэх Пан Америкийн Эрүүл мэндийн байгууллагаас анхааруулжээ.

Аргентин, Уругвай, Эквадор, Гватемал, Парагвай зэрэг Америкийн хэдэн улсад антибиотикт тэсвэртэй нянгийн халдварын өсөлт бүртгэгджээ. Энэ нь эпгээр улс орнуудад коронавирусын халдварын улмаас эмнэлэгт хэвтэн эмчлүүлж байгаа өвчтнүүд нас барах явдалд нөлөөлсөн байх өндөр магадлалтай аж.

Пан Америкийн Эрүүл мэндийн байгууллагын захирал Карисса Этьен, "Антибиотикийн хэрэглээ замбараагүй түвшинд хүрсэн болох нь харагдаж байна. Энэ нь цаашлаад маш их хор уршигтай юм. Үүнээс болж халдварт өвчнүүдийн эмчилгээнд хэрэглэгддэг нэн чухал эмнүүд ямар ч үр дүнгүй болоход ойрхон байна" хэмээн онцолжээ.

Эмнэлгийн орчноос гадуур антибиотикийн зохисгүй хэрэглээ ихээр бүртгэгдэх болж, коронавирусын халдварын үед хэрэглэх нь үр дүнгүй гэдэг нь батлагдсан ивэрмектин, хлорохин зэрэг эмүүдийг зарим улс орны эрх баригчид коронавирусын эмчилгээнд хэрэглэхийг зөвлөсөн хэвээр байна.

Бразилд л гэхэд коронавирусын халдварын улмаас эмнэлэгт хэвтэн эмчлүүлж буй иргэдийн 90-100 хувьд нь нянгийн эсрэг эмчилгээ хийж байгаа аж. Гэтэл тэдгээр өвчтнүүдийн зөвхөн 7 хувь нь л нянгийн эсрэг эмчилгээ хийлгэх шаардлагатай, хоёрдогч халдвар авсан байжээ.

Нянгийн эсрэг эмийг зохисгүй хэрэглэх, хэт их хэрэглэсний улмаас антибиотикт тэсвэртэй супер нянгууд үүсэх аюултай бөгөөд одоо хэрэглэгдэж байгаа антибиотикнууд нь тэдгээр супер нянгуудын эсрэг ямар ч үр дүнгүй болох юм. Карисса Этьений онцолсноор коронавирусын цар тахлын үеийн антибиотикийн замбараагүй хэрэглээний хор уршиг хэдэн сар, жилийн дараа гэхэд мэдрэгдэх аж.

Эмийн компаниуд нянгийн эсрэг цөөн хэдэн шинэ эм бүтээсэн ч тэдгээр эмнүүдээ үр дүнтэй хэвээр байлгах үүднээс хязгаартай тоогоор л үйлдвэрлэдэг ба тэдгээр нь санхүүгийн талаас зах зээлд байгаа бусад нянгийн эмнүүдээс бага ашиг олдог байна.

Эх сурвалж: Reuters

Содномцэрэнгийн Энхзаяа 

mongolcom.mn

 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.