Украины Батлан хамгаалахын дэд сайд Ханна Маляр Донецк мужийн Бахмут хотыг тойрсон бүс нутагт Украины армийн давшилт тодорхой амжилт олсон болохыг мэдэгджээ. Энэ нь олон сарын турш яригдаж буй Украины армийн сөрөг довтолгооны эхлэл эсэх нь тодорхойгүй байна.
Москвагийн зүгээс ОХУ-ын арми Украины давшилтанд хариу цохилт өгч, байршлаа хадгалж чадсан хэмээн мэдэгдсэн байна. Донецк мужийн Бахмут хот нь дайны гол цэг болоод байгаа ба тухайн хотыг эзлэх нь стратегийн ач холбогдол багатай ч Москва, Киев хоёрын хувьд бэлгэ тэмдгийн хувьд чухал ач холбогдолтой болоод байгаа юм.
Ханна Маляр нийгмийн сүлжээнд нийтэлсэн мэдэгдэлдээ, "дайсны тал хатуу эсэргүүцэл үзүүлж, байршлаа хадгалахыг хичээсэн ч манай армийн анги бүрэлдэхүүнүүд тулааны үеэр хэд хэдэн чиглэлд давамгайлж чадсан" хэмээн бичжээ. Түүний бичсэнээр Орихово-Василивка, Парасковийвкад Украины арми 200-1600 м, Иванивське, Клищийвкад 100-700 м газар эргүүлэн авч чаджээ. Эдгээр 4 тосгон нь Бахмут хотоос хэдхэн км-ийн зайд байрлах ба Бахмут хотын төлөөх тулаан нь ОХУ-Украины дайны хамгийн удаан үргэлжилсэн, хамгийн их цус урсгасан тулаан болж байгаа юм.
Өнгөрсөн даваа гарагийн орой нийтэлсэн видео мэдэгдэлдээ Украины Ерөнхийлөгч Володимир Зеленский Бахмутын талаар сонсохыг хүсэж байсан мэдээг дамжуулсан Украины дайчдад талархаж буйгаа илэрхийлсэн байна.
Өнгөрсөн сарын сүүлээр Оросын хувийн цэргийн Вагнер компани Бахмутыг бүрэн эзэлсэн хэмээн мэдэгдсэн билээ. Зарим шинжээчид Украины арми Бахмут хотыг бүсэлж, Оросын армийг занганд оруулахыг оролдоно хэмээн үзэж байгаа юм.
Нөгөө талаас Москва Украины армийн довтолгоонд хариу цохилт үзүүлж, тулааны явцад Украины 28 танкийг устгаж, дайсны талын олон зуун цэрэг амь үрэгдсэн хэмээн мэдэгджээ.
Өнгөрсөн ням гарагт оросууд Украины армийн томоохон хэмжээний сөрөг довтолгоо Донецк мужид эхэлсэн ч бүтэлгүйтсэн хэмээн мэдэгдсэн бол Украины зэвсэгт хүчнээс тухайн бүс нутагт ямар нэг цэргийг ажиллагаа болсон гэх мэдээлэл байхгүй хэмээн хариу мэдэгдэл хийсэн юм.
Украины Гадаад харилцааны сайд Дмитрий Кулёба Украин улс сөрөг довтолгоо явуулахад хангалттай хэмжээний зэр зэвсэгтэй болсон хэмээн мэдэгдсэн ч сөрөг довтолгоо эхэлсэн эсэх талаар мэдээлэл өгөхөөс татгалзжээ.
Украины эрх баригчид сөрөг довтолгооны тухай ямар нэг мэдээлэл өгөхөөс татгалзаж байгаа ба сөрөг довтолгоо эхэлсэн талаар ямар нэг мэдэгдэл гарахгүй гэдгийг Украины Батлан хамгаалахын яам онцолжээ.
Украинчуудад оросуудад эзлэгдсэн газар нутгаа тэр дундаа Крымийн хойгийг эргүүлэн авахын тулд багагүй хугацаа шаардагдана гэж мэргэжилтнүүд үзэж байна.
Нөгөө талаас Украины засгийн газар ард иргэддээ төдийгүй барууны түнш орнууддаа Оросын армийг бут цохиж, дайны мухардалд цэг тавьж, газар нутгаа эргүүлэн авах чадвартай гэдгээ батлах шаардлагатай болж байгаа юм.
Нөгөө талд Украины талд байлдаж буй Оросын Эрх Чөлөөний Легион, Оросын Сайн Дурын Корпус зэрэг хагас цэрэгжсэн бүлэглэлүүд ОХУ-ын Белгород мужид Оросын армийн цэргүүдийг олзолсон тухайгаа мэдэгджээ.
Дээрх хоёр бүлэглэл нь ОХУ-ын Ерөнхийлөгч Владимир Путины засгийн газрыг унагаж, түүний Украины эсрэг явуулж буй дайныг зогсоох зорилготой аж.
Кремль ОХУ-ын хилийн бүс нутагт болж буй халдлагуудад Киевийг буруутгаж байгаа бол Киев эдгээр халдлагад хамааралгүй болохоо мэдэгдсэн билээ.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
