2020 онд Netflix Ази-Номхон далайн бүс нутагт шинээр 9.3 сая хэрэглэгчтэй болжээ

Twitter Print
2021 оны 02-р сар 04-нд 13:45 цагт
Мэдээний зураг,

Netflix стрийминг үйлчилгээ өдгөө 200 сая хэрэглэгчидтэй болж, стрийминг үйлчилгээгээрээ дэлхийд тэргүүлж байна. Тэгвэл Netflix компанийн зүгээс сүүлийн жилүүдэд стрийминг үйлчилгээ нь хамгийн хурдацтай өсч буй Ази-Номхон далайн бүс нутагт үйлчилгээгээ өргөжүүлэх зорилго тавьжээ.

2020 онд л гэхэд Ази-Номхон бүс нутагт 9.3 сая хүн Netflix-ийн шинэ хэрэглэгч болсон нь 2019 оны үзүүлэлтээс даруй 65 хувиар өссөн үзүүлэлт юм. Тус бүс нутаг дахь Netflix стрийминг үйлчилгээний ашиг орлого 62 орчим хувиар өссөн бол Европ, Ойрх Дорнод болон Африкт 40 хувиар өсчээ. Netflix компанийн зүгээс Ази-Номхон далайн бүс нутагт хийгдэх контентуудад хийх хөрөнгө оруулалтаа 2 дахин нэмэгдүүлж, Энэтхэг, Өмнөд Солонгос, Япон зэрэг улс орнуудад илү олон хэрэглэгчидтэй болохыг зорьж байна.

Netflix Японд 5 жилийн өмнө стрийминг үйлчилгээгээ нэвтрүүлснээр Ази-Номхон далайн бүс нутаг дахь үйл ажиллагаагаа анх эхлүүлж байсан аж. Тэр үед Калифорнид төвтэй тус компани нь байгуулагдаад удаагүй "старт-ап" байсан ба өөрийн гэсэн оффис ч үгүй байсан болохыг Netflix компанийн үйл ажиллагаа хариуцсан захирал Грег Питерс онцолжээ. 2018-2020 онуудад Netflix компани Азид контент бүтээхэд зориулж 2 тэрбум ам. доллар зарцуулж, одоогийн байдлаар Азийн 200 гаруй бүтээлд хөрөнгө оруулжээ.

Түүнчлэн Ази-Номхон далайн бүс нутгийн улс орнуудад Netflix компани 600 ажилчидтай ба бүс нутгийн төв байр нь Сингапур улсад байрлаж байна. Netflix компани Ази-Номхон далайн бүс нутгийн хэрэглэгчид зөвхөн барууны улс орнуудын телевизийн шоунуудыг үзээд байх хүсэлгүйг олж мэдсэн байна. БНСУ, Зүүн Өмнөд Ази, Австрали, Шинэ Зеланд дахь контентыг хариуцсан дэд ерөнхийлөгч Ким Мин Ён 2016 онд Netflix компанийн Азийн бүс нутгийг хариуцсан дахь анхны захирал болсон ба Азийн улс орнуудын хэрэглэгчдийн хувьд орон нутгийнх контент маш чухал ач холбогдолтой гэдгийг олж мэдсэнийг онцолжээ. Тэгвэл Netflix компанийн Азид бүтээсэн контентууд зөвхөн бүс нутагтаа бус олон улсад байлдан дагуулж эхэлжээ. Өмнөд Солонгосын "Kingdom", Японы "Alice in Borderland", Энэтхэгийн "Indian Matchmaking" зэрэг шоунууд бүгд дэлхий даяар үзэгчдийг байлдан дагуулсан билээ. Түүнчлэн өнгөрсөн жил Өмнөд Солонгосын олон ангит кинонууд Зүүн Өмнөд Азийн удс орнуудад хамгийн их үзэлттэй шоунуудыг тэргүүлжээ. 2020 онд Өмнөд Солонгосын контентын үзэлтийн тоо 2019 оныхтой харьцуулахад 4 дахин өссөн бол Японы анимэ хүүхэлдэйн кинонуудын үзэлт 2 дахин нэмэгдсэн байна.

Азид үйл ажиллагаагаа өргөжүүлэхийн тулд Netflix компани контентуудаа Хинди, Хятад, Вьетнам, Малай зэрэг нийт 35 хэлээр нэвтрүүлж байна. Азийн хэрэглэгчдийн ачаар Netflix компани олон төрлийн шинэ технологи нэвтрүүлсэний дотор Netflix-ийн контентуудыг үзэж гадаад хэл сурч байгаа азийн хэрэглэгчдэд зориулж тус компани видеог ухрааж үзэх, удаашруулах үйлчилгээтэй болсон нь дэлхий даяар үйлчилж байна.

Эх сурвалж: CNN

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.