Гавьяат жүжигчин Ж.Сүххуяг таалал төгсчээ

Twitter Print
2020 оны 10-р сар 05-нд 12:50 цагт
Мэдээний зураг,

"Мандухай сэцэн хатан" уран сайхны киноны Батмөнх даян хаан,  "Мөнх тэнгэрийн хүчин дор" киноны Чилүгэний дүрээр монгол түмний сэтгэлд мөнхөрсөн Монгол Улсын Гавьяат жүжигчин Жамсрангийн Сүххуяг хүнд өвчний улмаас 2020 оны 10 дугаар сарын 05-ны өдөр таалал төгсч, бидэнд хүнд гарз хохирол тохиолоо.

Ж.Сүххуяг 1959 онд Улаанбаатар хотод төрсөн бөгөөд 1978 онд нийслэлийн 53 дугаар сургууль, 1978-1982 онд Улсын Багшийн дээд сургууль, 1986-1988 онд Маркизм-Ленинизмийн дээд сургууль, 1982 онд УБДС-ийн кино драмын ангийг Д.Маамхүү, Б.Мөнхдорж багш нарын удирдлага дор жүжигчин мэргэжлийг эзэмшин төгсчээ.

Тэрээр 1982 оноос Улсын хүүхэд залуучуудын театрт 11 жил, Улсын драмын театр, орчин үеийн театр, Монгол кино үйлдвэрт тус тус 23 жил жүжигчин, туслах найруулагчаар ажиллаж байлаа. Энэ хугацаанд 1983 онд “Болд хэрхэн хатаагдсан нь” жүжгийн Павел Корчагин 1988 онд Д.Батбаярын “Хайрыг хайрла” жүжгийн Амаржаргалын дүрээр, “Мөнх тэнгэрийн хүчин дор” киноны Чилүгэний дүрээр Монголын урлагийн ажилчдын холбоо, Соёлын яамны шилдэг дүрийн шагналыг 3 удаа хүртэж байв. Мөн “Хатанбаатар” киноны Сундуйсүрэн, “Намрын халуун өдрүүд” киноны Нацагдорж, “Ацаг шүдний зөрүү” киноны Ананд-Очир, “Цагаан дуганы гэгээ” киноны Дилав хутагт Жамсранжав, “Хүн чулууны нулимс” киноны Элдэв, “Намар нахиалсан мод” киноны Самдан багш, “Давааны цаана даваа” киноны Жаргал, “Тань руу нүүж явна” киноны Очир… гээд тоолоод ч барамгүй олон дүр нь үзэгч түмний сэтгэлд зүрхэнд мөнхрөн үлдлээ.

Ж.Сүххуяг 1992 онд Армийн соёл, урлагийн 60 жилийн ойгоор Монгол Улсын Соёлын тэргүүний ажилтан, 1995 онд Монголын Киноны 60 жилийн ойгоор “Хөдөлмөрийн Гавьяаны Улаан тугийн одон”, 2006 онд Ард түмний гавьяат, 2010 онд “Монгол Улсын Гавьяат жүжигчин” цол тус тус хүртжээ.

Монголын тайз, дэлгэцийн урлагийн нэрт жүжигчин эрхэм таны эх орондоо хайртай, хүнлэг эрхэм чанар, ард түмнийхээ сэтгэлд хоногшсон олон сайхан дүр нь бидний сэтгэл зүрхэнд мөнхөд орших болно.

Г.Ганаа

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.