"Magic Box" Говь-Алтай аймгийн Тонхил сумд

Twitter Print
2021 оны 11-р сар 22-нд 12:10 цагт
Мэдээний зураг,

\Аян замын тэмдэглэл\

Бидний санаачилж бүтээсэн “Magic Box” тѳслѳѳ аль сумд байрлуулах талаар зарласан тендэрт Говь-Алтай аймгийн Тонхил сум шалгарсан юм. Яг үнэндээ манай багийнханы хэн нь ч энэ сумд очиж үзээгүй байлаа. “Magic Box” маань нутгийн олны дэмжлэгтэйгээр Тонхил сумдаа очиж байрласны дараа энэ сарын 14 нд манай багийн 15 залуус 4 машинтайгаар энэ сумыг зорьцгоолоо. Бүгдээрээ нэг 7 хоногийн ажлуудаа зохицуулж, зардлуудаа ѳѳрсдѳѳ зохицуулахаар ярьцгаасан л даа.

Гэвч “Шунхлай” компани бүх машины бензинийг дааж, замд “Урьхан” үйлчилгээний тѳвд хооллож, Баянхонгор хотод “Бид Монгол” хоолны газрын эзэн биднийг тосон авч ѳдрийн хоолыг хариуцаж, Aлтай хотод “Ентум” зочид буудалд хонох болон хоолны зардлыг @Batbayar Myagmardash дүү тѳлсѳн байлаа.

Буцаж Алтай хотод мѳнѳѳх “Ентум” зочид буудалд хонох болон хоолны зардлыг Говь-Aлтай аймгийн ЗДТГ хариуцаж, Баянхонгор аймгийн тѳвд “Ѳлзийт Палас” зочид буудлын эзэн бүсгүй биднийг хүндэтгэн зоог барьсан юм. Анхандаа бидэнд жаахан эвгүй байсан хэдий ч энэ тѳслийг дэмжин талархсан сэтгэлээ илэрхийлж буй энэ хүмүүсийн саналаас татгалзах аргагүй байв. Та нартаа чин сэтгэлээсээ талархаж байна.

 
 
сонин mn
 
Ѳѳ тэгээд сайхан байсаан. “Ямар ч ажлыг баяр хѳѳртэй хийж, хохирсон ч аз жаргалтайгаар хохир” гэдэг уриатай манай залуус 1250 орчим км замыг баяр хѳѳртэй туулсан. Толь шиг сайхан замаар тал шиг сэтгэлтэй явсан биднийг Говь-Алтай аймгийн Дарви сумын нутагт Тонхил сумын засаг дарга М.Насанбат, сургуулийн захирал Ганчулуун нар угтан авснаар бид хамтдаа хѳндлѳн хѳх уулсыг зѳндѳѳ их хавцлаар туулан давж зорьсон нутагтаа ирцгээлээ. Монгол Алтайн их нурууны ноён оргил Сутай хайрханаас эх авсан Зүйлийн гол Тонхил нууранд цутгадаг, ѳвѳлдѳѳ дулаахан хэрнээ зундаа сэрүүхэн энэ нутаг байгалын үзэсгэлэнг цогцлоожээ. Баруун хойноосоо байнга салхилах нь жаахан жиндүүдүү гэвч “Magic Box” тѳслийг хүлээж авч, хүлээлгэн ѳгч буй биднийг тэгтлээ дааруулсангүй. Машинаас буусан биднийг сургуулийн багш сурагчид “Манайд ирээрэй” дуугаар угтаж, бидний зурагтай аяганд сүү барьж угтан баяр хѳѳр болоход ѳѳрийн эрхгүй уяран аньсага чийглэж байснаа нуух юун. Нэг л тийм халуун дотно сэтгэл мэдрэгдэж, биднийг холбож байгаа гэгээлэг холбоос аль хэдийн биднийг дотно найзууд болгосон байв. Биднээс ѳмнѳ  энэ сургууль аль хэдийн “Magic Box”-оор “амьсгалж” байсан нь бидний сэтгэлийг их догдлуулсан.
 
Сургуулийн гал тогоонд хооллоод бид шууд л 3 ѳдрийн арга хэмжээний бэлтгэл ажилдаа орцгоов. “Долгион тааруулах” энэ уулзалт тууз хайчлах, алга ташилт, элдэв магтаалгүйгээр эгэл жирийн болсон. Яг энэ мѳчѳѳс сумын удирдлага, сургуулийн хамт олон, манай залуус нэг баг болцгоож бүх ажлуудаа хуваарилан шууд л бэлтгэлдээ орлоо. Манай багийг ахалж байсан Мѳнхтулга бүх ажлуудыг зангидаж минут секүндээр бүх ажлаа тѳлѳвлѳж бас гуйцэтгэлийг хянаж байв. Бүгдээрээ л баяр хѳѳртэйгээр шѳнѳ дѳл хүртэл ажиллацгаасан. Сумын “Соёлын тѳв”-ийг “Корпорейт” шиг засч чимэглэх ажил нилээд удаан үргэлжилсэн дээ. Тайз заслын бүх материалууд болон хадах хадаасаа хүртэл Улаанбаатар хотоос бэлтгэж авч очсон юм шүү дээ. Шѳнѳ дѳл болсон хэрнээ бүгдээрээ сэтгэл догдлоостой. Бага насанд наадам болохын урд шѳнѳ унтаж чадалгүй эргэн эргэн хѳрвѳѳдѳгтэй адил гэх үү дээ. Маргааш нэг л сайхан зүйл болох шиг гэгэлгэн мэдрэмж…
 
 
сонин mn
 
Маргааш ѳглѳѳ 8.30 цагаас “Magic Box” дээрээ очоод анхны үйлчлүүлэгч болох бяцхан охин орж ирэхэд бүгдээрээ дуу алдан алга ташицгаалаа. Яг энэ мѳчид бид бүгдээрээ юуны тѳлѳѳ зорьж юуг бүтээснээ ухаарсан байх. Сэтгэлдээ бүүр түүрхэн мэдэрч байсан мѳрѳѳдѳл яг бодитоор биелэх нь хамгийн сайхан мэдрэмж аж. Бараг 2 сарын ѳмнѳ 15 найзуудаараа Улаанбаатар хотод мѳрѳѳдѳж байсан мѳрѳѳдѳл Монгол орны баруун хязгаарын энэ сумд биелэлээ олох нь сайхан сэтгэлтэй олон хүмүүсийн дэмжлэгийн тус байлаа.
 
 
 
Буйдхан энэ хѳдѳѳ нутгийн хүүхдүүдэд дутагдаад байсан мѳрѳѳдлийн галыг асааж байгаадаа бид баяртай байсан. Энэ гурван ѳдѳрт Тонхил сумын хүүхдүүдийн нүдэнд гэрэлтэж буй баяр хѳѳр, бидний бусдыг хайрлах хайрыг улам ихээр бадрааж ѳѳрийн эрхгүй инээмсэглүүлж байв.
 
 
 
9.30 цагаас эхэлсэн “Mind Tour” арга хэмжээний илтгэлүүд үнэхээр гайхалтай байсан. Бидний дасгалжуулагч Мѳнгѳн маань энэ арга хэмжээг хѳтѳлж, урд шѳнѳ нь хянаж байсан залуус ийм сайхан илтгэлүүд тавина гэж би лав тѳсѳѳлѳѳгүй. Энэ хүртэл тѳслийг санаачлагч залуус бие биенээ тэгтэлээ сайн таниагүй явсан юм шүү дээ. Ямар сайхан залуустай нэгэн баг болж яваагаа энэ үед мэдрэхдээ би лав маш их баярлаж урам орсон. Залуус маань энэ амьдралд ѳѳртѳѳ зорилго тавьж хичнээн амаргүй байсан ч сайн муу бүхнийг даван туулж амжилтад хүрсэн бодит түүхээ хүүрнэцгээсэн юм. Үзэж ѳнгѳрүүлсэн, туулж давсан бүхнээс олсон ухаарлаа бусадтай чин сэтгэлээсээ хуваалцаж байсан нь хамгийн гайхалтай байлаа.
 
 
сонин mn
 
1.     Б.Галбадрах      “Эрүүл амьдрах миний тэмцэл”
2.     M.Цэвэлмаа      “Дэлхийн мисс - миний оролцоо”
3.     Д.Оюунсүрэн    “Задгайгаас эхэлсэн мѳрѳѳдѳл”
4.     Ч.Ганжавхлан   “Ид шид байдагт итгэсэн”
5.     Г.Галбадрах       “Хүн хэзээ хѳгширдѳг вэ?”
6.     Т.Цолмон           “Маgic Box” бүтсэн түүх”
7.     M.Mѳнхтулга     “Бүтээлч хандлага”
8.     Б.Энхболд          “Баялгаа бүтээ”
 
Энэ арга хэмжээнд Тонхил сумын сурагч охин ѳѳрийн мѳрѳѳдлийн талаар илтгэж, Анука маань ая дуугаа ѳргѳсѳн нь үзэгчдийн сэтгэлийг ихэд хѳѳргѳв. Бид энэ илтгэлүүдээрээ хѳдѳѳгийн залууст итгэл урам ѳгч, амьдралд байгаа боломжуудыг ойлгуулж, нутаг орныхоо хѳгжилд оролцох оролцоог дэмжихийг л хүссэн.
 
 
сонин mn
 
 
 
сонин mn
 
 \Үргэлжлэл бий\
 
 
Харнууд овгийн Гомбосүрэнгийн Галбадрах
 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.