Ж. Байден Швед, Финландын төрийн тэргүүнүүдийг хүлээн авч уулзлаа

Twitter Print
2022 оны 05-р сар 20-нд 11:23 цагт
Мэдээний зураг,

АНУ-ын Ерөнхийлөгч Жо Байден Финланд болон Шведийн төрийн тэргүүнүүдийг Цагаан ордонд хүлээн авч уулзжээ. Тэрээр дээрх хоёр улсын НАТО-д элсэх хүсэлтийг бүрэн дүүрэн дэмжиж буйгаа илэрхийлсэн байна.

Цагаан ордны гадаа хийсэн хэвлэлийн бага хурлын үеэр Финландын Ерөнхийлөгч Саули Нийнисто, Шведийн Ерөнхий сайд Магдалена Андерссон нар Туркийн төрийн тэргүүн Режеп Таийп Эрдоганы эсэргүүцэл хоёр улсын НАТО-д элсэх үйл явцад тулгараад буй хамгийн том бэрхшээл болж байгааг дурджээ.

Туркийн Ерөнхийлөгч Режеп Таийп Эрдоган Финланд, Шведийн НАТО-д элсэх хүсэлтийг хүлээн зөвшөөрөхгүй гэдгээ илэрхийлэн шаардлагатай тохиолдолд хориг тавихаа мэдэгдсэн байна.

НАТО-гийн журманд зааснаар НАТО-д элсэх хүсэлт тавьсан улс НАТО-гийн гишүүн орнуудын бүгдийнх нь дэмжлэгийг авч тус байгууллагад гишүүнээр элсэх боломжтой аж.

Туркийн төрийн тэргүүний зүгээс ийнхүү эсэргүүцэж байгаа нь Швед болон Финланд улс Курдистаны Хөдөлмөрчдийн нам зэвсэгт бүлэглэлийнхнийг орогнуулж, санхүүжүүлдэгтэй холбоотой хэмээн тайлбарлаад байгаа билээ.

Цагаан ордонд хийсэн хэвлэлийн бага хурлын үеэр Финландын Ерөнхийлөгч Саули Нийнисто Финланд улс терроризмын байж болох бүх төрлийг буруушааж, терроризмтой тэмцсээр байгааг онцолж, Туркийн талаас хийсэн мэдэгдлийг нээлттэй бөгөөд ул суурьтайгаар хэлэлцэхэд бэлэн гэжээ.

Түүнчлэн тэрээр, "Финландын зэвсэгт хүчин Европын хамгийн хүчирхэг армийн нэг. Бид зэвсэгт хүчний салбартаа тасралтгүй хөрөнгө оруулсаар ирсэн." хэмээн онцолжээ.

Шведийн Ерөнхий сайд Магдалена Андерссон Шведийн засгийн газар НАТО-д гишүүнээр элсэх үйл явцад тулгарсан асуудлыг яг одоо НАТО-гийн гишүүн орнууд тэр дундаа Турктэй ярилцаж байгааг дурджээ.

Түүнчлэн ОХУ Украин руу дайрсан явдал Швед төвийг сахих бодлогоосоо татгалзахад хүргэснийг онцолсон байна. АНУ-ын Ерөнхийлөгч Жо Байдений хувьд Финланд, Швед хоёр улс нь хоёулаа НАТО-гийн гишүүн орнуудад тавигддаг бүх шаардлагуудыг хангасан гэдгийг онцолж, хоёр улсын НАТО-д элсэх хүсэлтийг нь дэмжиж буйгаа илэрхийлжээ.

Эх сурвалж: The Guardian

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.